ಸಂಜೆಯ ಬಾಯಿರುಚಿಗೆ ಎಗ್ ಬೋಂಡ

ಮನೆಯ ಫ್ರಿಜ್ ನಲ್ಲಿ ಯಾವಾಗಲೂ ಮೊಟ್ಟೆ ಇದ್ದೇ ಇರುತ್ತದೆ ಅಲ್ಲವೆ. ಹಾಗಿದ್ದ ಮೇಲೆ ತಿಂಡಿಯನ್ನು ಮಾಡಲು ಸುಲಭ. ಇದು ಆರೋಗ್ಯಕ್ಕೆ ಕೂಡ ಒಳ್ಳೆಯದು. ಆಫೀಸು ಅಥವ ಕಾಲೇಜು ಮುಗಿಸಿ ಮನೆಗೆ ಬಂದ ತಕ್ಷಣ ಏನಾದರೂ ಮಾಡಿ ತಿನ್ನಬೇಕೆನಿಸಿದಾಗ ಈ ಸುಲಭ ತಿಂಡಿಯನ್ನು ಪ್ರಯತ್ನಿಸಬಹುದು.

ಮೊಟ್ಟೆಯನ್ನು ಬಳಸಿ ಮಾಡುವ ತಿಂಡಿಗಳು ಮಾಡಲು ಸುಲಭ ಮತ್ತು ಆರೋಗ್ಯಕ್ಕೆ ಒಳ್ಳೆಯದು ಕೂಡ. ಎಗ್ ಬೋಂಡ ಅಥವ ಎಗ್ ಪಕೋಡ ಎಂದು ಕೂಡ ಇದನ್ನು ಕರೆಯುತ್ತಾರೆ. ಇದನ್ನು ತಯಾರಿಸಲು ಹೆಚ್ಚಿನ ಸಾಮಗ್ರಿಗಳ ಅಗತ್ಯವಿಲ್ಲ.

ಬೇಕಾಗುವ ಸಾಮಗ್ರಿಗಳು
1. ಮೊಟ್ಟೆಗಳು- 5
2. ಕಡಲೆಹಿಟ್ಟು- 1/2 ಕಪ್
3. ಅಚ್ಚಖಾರದ ಪುಡಿ- 1 ಟೀಚಮಚ
4. ಉಪ್ಪು- ರುಚಿಗೆ ತಕ್ಕಷ್ಟು
5. ಎಣ್ಣೆ

ಮಾಡುವ ವಿಧಾನ
1. ಮೊಟ್ಟೆಯನ್ನು ಬೇಯಿಸಿ ಅದರ ಸಿಪ್ಪೆಯನ್ನು ಬಿಡಿಸಿಕೊಳ್ಳಿ. ಅದನ್ನು ಸಣ್ಣದಾಗಿ ಕತ್ತರಿಸಿಕೊಳ್ಳಬಹುದು ಇಲ್ಲವೇ ಇಡಿಯಾಗಿ ಕೂಡ ಬಳಸಬಹುದು.
2. ಒಂದು ಪಾತ್ರೆಯಲ್ಲಿ ಕಡಲೆಹಿಟ್ಟನ್ನು ಖಾರದಪುಡಿ ಮತ್ತು ಉಪ್ಪು ಹಾಕಿ ಕಲಸಿಟ್ಟುಕೊಳ್ಳಿ.
3. ಬಾಣಲಿಯಲ್ಲಿ ಎಣ್ಣೆಯನ್ನು ಹಾಕಿ ಕಾದ ನಂತರ ಮೊಟ್ಟಯನ್ನು ಹಿಟ್ಟಲ್ಲಿ ಅದ್ದಿ ಎಣ್ಣೆಗೆ ಬಿಡಿ.
4. ಅದು ಹೊಂಬಣ್ಣಕ್ಕೆ ತಿರುಗುವವರೆಗೆ ಕರಿಯಿರಿ.
ಎಗ್ ಬೋಂಡ ತಿನ್ನಲು ಸಿದ್ಧ. ಇದನ್ನು ಟೊಮೊಟೊ ಕೆಚಪ್ ಅಥವ ಕೊತ್ತಂಬರಿ ಚಟ್ನಿಯೊಂದಿಗೆ ತಿನ್ನಲು ರುಚಿಯಾಗಿರುತ್ತದೆ.