ಆಹಾ ಅಕ್ಕಿಪಾಯಸ!

ನೀರು ಬೆರೆಸದ ಹಾಲು ಬಳಸಿದರೆ, ಈ ಅಕ್ಕಿ ಪಾಯಸದ ಸೊಗಸು ಹೆಚ್ಚು!

ಹರುಕು ಹೋಳಿಗೆ ಲೇಸು। ಮುರುಕು ಹಪ್ಪಳ ಲೇಸು।
ಕುರುಕುರು ಕಡಲೆ ಲೇಸು। ಪಾಯಸದ
ಸುರುಕು ಬಲುಲೇಸು ಸರ್ವಜ್ಞ।।

ಅಡುಗೆ ಕುರಿತು ಕವಿ ಸರ್ವಜ್ಞ ಹೇಳಿರುವ ಈ ವಚನ ಎಷ್ಟು ಜನರಿಗೆ ಗೊತ್ತಿದೆಯೋ ಏನೋ...? ಆದರೆ ಪಾಯಸ ಗೊತ್ತಿಲ್ಲದವರು ಯಾರಿದ್ದಾರೆ ಹೇಳಿ? ಅಂದಹಾಗೆ ಪಾಯಸಗಳಲ್ಲಿ ಹಲವು ಬಗೆಗಳುಂಟು. ಇಂದು ಅಕ್ಕಿ ಪಾಯಸ ಮಾಡುವ ಕುರಿತು ತಿಳಿಯೋಣ ಬನ್ನಿ...

ಬೇಕಾಗುವ ಸಾಮಗ್ರಿಗಳು :

ಅರ್ಧ ಲೀಟರ್‌ ಗಟ್ಟಿ ಹಾಲು
ಒಂದೂವರೆ ಟೀ ಗ್ಲಾಸ್‌ನಷ್ಟು ಅಕ್ಕಿ
ಎರಡು ಟೀ ಗ್ಲಾಸ್‌ನಷ್ಟು ಸಕ್ಕರೆ
ಅರ್ಧ ಚಹಾ ಚಮಚದಷ್ಟು ಏಲಕ್ಕಿ ಪುಡಿ
ಒಂದು ಚಿಟಿಕೆ ಕೇಸರಿ
ಗೋಡಂಬಿ
ಒಣಗಿದ ದ್ರಾಕ್ಷಿ
ಸ್ವಲ್ಪ ಬೆಣ್ಣೆ

ಮಾಡುವ ವಿಧಾನ :

ಹಾಲು ಹಾಗೂ ಅಕ್ಕಿಯನ್ನು ಪಾತ್ರೆಯಾಂದರಲ್ಲಿ ಹಾಕಿಕೊಂಡು, ಕಡಿಮೆ ಪ್ರಮಾಣದ ಶಾಖದಲ್ಲಿ ಕುದಿಯಲು ಬಿಡಿ. ಸುಮಾರು 20-30ನಿಮಿಷಗಳ ಕಾಲ ಬೇಯಿಸಿದ ನಂತರ ಅದಕ್ಕೆ ಸಕ್ಕರೆ, ಏಲಕ್ಕಿ, ಕೇಸರಿ, ಗೋಡಂಬಿ, ಒಣಗಿದ ದ್ರಾಕ್ಷಿ ಹಾಕಿ. ಬೇಕಿದ್ದರೆ ಸ್ವಲ್ಪ ಬೆಣ್ಣೆಯನ್ನೂ ಹಾಕಿಕೊಳ್ಳಿ.

ಹದಿನೈದು-ಇಪ್ಪತ್ತು ನಿಮಿಷಗಳ ಕಾಲ ಈ ಮಿಶ್ರಣವನ್ನು ಹಾಗೆಯೇ ತಿರುವಾಡುತ್ತಿರಿ. ಎಲ್ಲವೂ ಹದವಾಗಿ ಬೆರೆತ ಮೇಲೆ ಒಲೆಯಿಂದ ಕೆಳಕ್ಕೆ ಇಳಿಸಿ. ಈಗ ಅಕ್ಕಿಪಾಯಸ ರೆಡಿ. ಇದನ್ನು ಹಾಗೆಯೇ ಸವಿಯಬಹುದು ಅಥವಾ ಚಪಾತಿಯನ್ನು ಇದರಲ್ಲಿ ಅದ್ದಿಕೊಂಡೂ ತಿನ್ನಬಹುದು. ನೀರು ಬೆರೆಸದ ಹಾಲು ಬಳಸಿದರೆ ಪಾಯಸದ ಸೊಗಸು ಹೆಚ್ಚು.