ತಿಂದಷ್ಟೂ ತಿನ್ನಬೇಕೆನಿಸುವ ಸಬ್ಬಸಿಗೆ ಈರುಳ್ಳಿ ಭಜಿ

Snacks

oi-Prasad P Naik

By * ನಿವೇದಿತಾ ಪ್ರಭಾಕರ್, ಬೆಂಗಳೂರು

Published: Monday, July 25, 2011, 12:59 [IST]

ಹೊರಗೆ ಮುಂಗಾರು ಮಳೆ ಹನಿಸುತ್ತಿರುವಾಗ, ಬೇರೆ ಏನೂ ಕೆಲಸ ಇಲ್ಲದಿರುವಾಗ ನಾಲಗೆ ಚಟಪಡಿಸಲು ಪ್ರಾರಂಭಿಸುತ್ತದೆ. ಅದರಲ್ಲೂ ನೀವು ಕರಿದ ತಿಂಡಿಗಳನ್ನು ಇಷ್ಟಪಡುವವರಾಗಿದ್ದರೆ ಸಬ್ಬಸಿಗೆ ಸೊಪ್ಪು, ಈರುಳ್ಳಿ ಮತ್ತು ಹಸಿ ಕೊಬ್ಬರಿಯಿಂದ ತಯಾರಿಸಿದ ಭಜಿಯಂಥ ರುಚಿಯಾದ ಕರಿದ ತಿನಿಸು ನಿಜಕ್ಕೂ ಅಪ್ಯಾಯಮಾನ.

ಬೇಕಾಗುವ ಪದಾರ್ಥಗಳು

ಸಬ್ಬಸಿಗೆ ಸೊಪ್ಪು - ಸಣ್ಣಗೆ ಹೆಚ್ಚಿದ್ದು 1 ಕಪ್
ಈರುಳ್ಳಿ - ಸಣ್ಣಗೆ ಹೆಚ್ಚಿದ್ದು 1 ಕಪ್
ಹಸಿ ಕೊಬ್ಬರಿ - ತುರಿದದ್ದು ಮುಕ್ಕಾಲು ಕಪ್
ಹಸಿ ಮೆಣಸಿನಕಾಯಿ - 3ರಿಂದ 4
ಕಡಲೆಹಿಟ್ಟು 3 ಚಮಚ
ಜೀರಿಗೆ, ಉಪ್ಪು, ಕರಿಬೇವು
ಕರಿಯಲು ಎಣ್ಣೆ

ತಯಾರಿಸುವ ವಿಧಾನ

* ಚೆನ್ನಾಗಿ ತೊಳೆದು ಸಣ್ಣದಾಗಿ ಹೆಚ್ಚಿಕೊಂಡ ಸಬ್ಬಸಿಗೆ ಸೊಪ್ಪು, ಹೆಚ್ಚಿಟ್ಟುಕೊಂಡ ಈರುಳ್ಳಿ ಮತ್ತು ತುರಿದುಕೊಂಡ ಕೊಬ್ಬರಿಯನ್ನು ಒಂದು ಪಾತ್ರೆಯಲ್ಲಿ ಹಾಕಿ ಮಿಶ್ರಣ ಮಾಡಿ.

* ಈ ಮಿಶ್ರಣಕ್ಕೆ ನೀರು ಹಾಕುವ ಅಗತ್ಯವೇ ಇಲ್ಲ. ಹಸಿ ಕೊಬ್ಬರಿಯಲ್ಲಿ ನೀರನಂಶ ಇರುವುದರಿಂದ ಹಾಗೆಯೇ ಬೆರೆಸಿಕೊಳ್ಳಿ.

* ಸಬ್ಬಸಿಗೆ, ಈರುಳ್ಳಿ ಮತ್ತು ಕೊಬ್ಬರಿ ಚೆನ್ನಾಗಿ ಬೆರೆತುಕೊಳ್ಳಲು ಎರಡು ಚಮಚ ಕಡಲೆಹಿಟ್ಟು ಹಾಕಿ ಕೈಯಾಡಿಸಿ. ಈಗ ಕರಿಯಲು ಯೋಗ್ಯವಾದ ಮಿಶ್ರಣ ತಯಾರಾಗಿರುತ್ತದೆ.

* ಇದಕ್ಕೆ ಸಣ್ಣಗೆ ಹೆಚ್ಚಿಕೊಂಡ ಹಸಿ ಮೆಣಸಿನಕಾಯಿ (ಮಕ್ಕಳು ತಿನ್ನುವುದರಿಂದ ಕಡಿಮೆಯಿರಲಿ), ಜೀರಿಗೆ ಮತ್ತು ಉಪ್ಪು ಹಾಕಿ ಚೆನ್ನಾಗಿ ಕೈಯಾಡಿಸಿ.

* ಇಷ್ಟಾದ ನಂತರ ಒಲೆ ಹೊತ್ತಿಸಿ ಬೋಗುಣಿಯಲ್ಲಿ ಎಣ್ಣೆ ಹಾಕಿ ಕಾದ ನಂತರ, ಹಸಿ ಕೈಯಿಂದ ಮಿಶ್ರಣವನ್ನು ಮುಷ್ಠಿಯಲ್ಲಿ ಉಂಡೆ ಮಾಡಿ, ಸ್ವಲ್ಪ ತಟ್ಟಿ ಎಣ್ಣೆಯಲ್ಲಿ ತೇಲಿಬಿಡಿ.

* ಕರಿದ ಭಜಿಗಳನ್ನು ಪೇಪರ್ ಮೇಲೆ ಹರವಿಟ್ಟರೆ ಎಣ್ಣೆ ಹೀರಿಕೊಂಡು ತಿನ್ನಲು ಯೋಗ್ಯವಾಗಿರುತ್ತದೆ. ಹೊರಗಡೆ ಮಳೆ ಸುರಿಯುತ್ತಿರುವಾಗ ಕಾಫಿ, ಚಹಾದ ಜೊತೆಗೆ ಬಿಸಿಬಿಸಿಯಾಗಿರುವಾಗಲೇ ಸೇವಿಸಿ.