ಸಂಜೆ ಟೀ ಜೊತೆಗಿರಲಿ ಈ ಹಕ್ಕಾ ನೂಡಲ್ಸ್

Snacks

oi-Sumalatha

By Sumalatha

Published: Friday, December 2, 2011, 12:04 [IST]

ಹಕ್ಕಾ ನೂಡಲ್ಸ್ ಚೈನಾದ ಪ್ರಸಿದ್ಧ ತಿಂಡಿ. ಭಾರತದಲ್ಲೂ ಪ್ರಸಿದ್ದಿ ಪಡಿದಿರುವ ಈ ನೂಡಲ್ಸ್ ಮಕ್ಕಳಿಗಂತೂ ಬಲು ಇಷ್ಟ. ಆದರೆ ನೂಡಲ್ಸನ್ನು ಬೀದಿ ಬದಿ ತಿನ್ನುವುದಕ್ಕಿಂತ ಮನೆಯಲ್ಲೇ ಮಾಡಿ ತಿಂದರೆ ಆರೋಗ್ಯಕ್ಕೂ ಚೆಂದ, ಅಷ್ಟೇ ರುಚಿಯೂ ಸಿಗುತ್ತೆ. ಈ ಹಕ್ಕಾ ನೂಡಲ್ಸ್ ಮಾಡುವುದು ಹೇಗೆ ಎಂದು ಇಲ್ಲಿ ತಿಳಿದುಕೊಳ್ಳಿ.

ಹಕ್ಕಾ ನೂಡಲ್ಸ್ ಗೆ ಏನೇನು ಬೇಕು?
* ನೂಡಲ್ಸ್ 1 ಪ್ಯಾಕೆಟ್ (ಗಟ್ಟಿಯಾಗಿರಬೇಕು), 1 ಈರುಳ್ಳಿ, 5-6 ಎಸಳು ಬೆಳ್ಳುಳ್ಳಿ, ಸ್ವಲ್ಪ ಶುಂಠಿ ಪೇಸ್ಟ್, 2 ಚಮಚ ಟೊಮೆಟೊ ಕೆಚಪ್, 2 ಕ್ಯಾರೆಟ್, * 8-10 ಬೀನ್ಸ್, 1 ಕ್ಯಾಪ್ಸಿಕಂ, 3 ಹಸಿರು ಮೆಣಸಿನಕಾಯಿ, ವಿನೆಗರ್, ಮೆಣಸು, 1 ಚಮಚ ಸೋಯಾ ಸಾಸ್, ಎಣ್ಣೆ, ಉಪ್ಪು.

ಹಕ್ಕಾ ನೂಡಲ್ಸ್ ಮಾಡುವ ವಿಧಾನ:

* ನೂಡಲ್ಸನ್ನು ಸ್ವಲ್ಪ ಎಣ್ಣೆ ಬರೆಸಿ 5 ನಿಮಿಷ ಬೇಯಿಸಬೇಕು. ಇದರಿಂದ ನೂಡಲ್ಸ್ ಗರಿಗರಿಯಾಗಿರುತ್ತದೆ. ನೂಡಲ್ಸ್ ನಿಂದ ನೀರನ್ನು ಬಸಿದು ಒಂದೆಡೆ ಇಡಬೇಕು.
* ಇದೇ ಸಮಯದಲ್ಲಿ ಮೇಲೆ ತಿಳಿಸಿದ ತರಕಾರಿಗಳನ್ನು ಚಿಕ್ಕದಾಗಿ ಕತ್ತರಿಸಿಟ್ಟುಕೊಳ್ಳಬೇಕು. ನಂತರ ಬಾಣಲೆಯಲ್ಲಿ ಎಣ್ಣೆ ಕಾಯಿಸಿ ಅದರಲ್ಲಿ ಈರುಳ್ಳಿಯನ್ನು ಕೆಂಪಗಾಗುವ ತನಕ ಹುರಿಯಬೇಕು.

* ಈಗ ಚಿಕ್ಕದಾಗಿ ಕತ್ತರಿಸಿದ ಬೆಳ್ಳುಳ್ಳಿ ಮತ್ತು ಶುಂಠಿ ಪೇಸ್ಟನ್ನು ಹಾಕಿ ಕೆಲ ನಿಮಿಷ ಬಿಡಬೇಕು. ಇದಕ್ಕೆ ಹಸಿರು ಮೆಣಸಿನಕಾಯಿ ಮತ್ತು ಇನ್ನಿತರ ತರಕಾರಿಗಳನ್ನು ಹಾಕಿ ವಿನೆಗರ್ ಬೆರೆಸಬೇಕು. ಕೊನೆಯಲ್ಲಿ ಕ್ಯಾಪ್ಸಿಕಂ ಹಾಕಬೇಕು.

* ರುಚಿಗೆ ತಕ್ಕಂತೆ ಉಪ್ಪು ಮತ್ತು ಮೆಣಸಿನ ಪುಡಿ ಹಾಕಿ ಮಸಾಲೆ ವಾಸನೆ ಬರುವ ತನಕ ಮಿಶ್ರಣವನ್ನು ಬೇಯಿಸಬೇಕು.

* ಬಾಣಲೆಯಲ್ಲಿರುವ ತರಕಾರಿಗಳನ್ನು ಅಲ್ಲೇ ಒಂದು ಪಕ್ಕಕ್ಕೆ ಸರಿಸಿ ಟೊಮೆಟೊ ಕೆಚಪ್ ಮತ್ತು ಸೋಯಾ ಸಾಸನ್ನು ಒಂದು ನಿಮಿಷ ಬಿಸಿ ಮಾಡಿ ನಂತರ ಎಲ್ಲವನ್ನು ಬೆರೆಸಿ ತಿರುಗಿಸಬೇಕು.

* ಈ ಮಿಶ್ರಣವನ್ನು 2-3 ನಿಮಿಷ ಹಾಗೇ ಹುರಿದು ನಂತರ ಕೊನೆಯಲ್ಲಿ ನೂಡಲ್ಸ್ ಬೆರೆಸಿ ಕದಡಬೇಕು.

* 1 ನಿಮಿಷ ಬಾಣಲೆಯನ್ನು ಮುಚ್ಚಿ ನಂತರ ಉರಿಯನ್ನು ಆರಿಸಿ ತೆಗೆದರೆ ಹಕ್ಕಾ ನೂಡಲ್ಸ್ ತಿನ್ನಲು ತಯಾರಾಗಿರುತ್ತೆ. ಇದರೊಂದಿಗೆ ಮಂಚೂರಿಯನ್ ಗ್ರೇವಿ ಇದ್ದರೆ ತಿನ್ನಲು ಇನ್ನೂ ರುಚಿಕರ.