ರುಚಿಗೆ ಮೋಸ ಇಲ್ಲದ ಬೇಬಿ ಸಮೋಸ ತಿನ್ನಿ

ಸಮೋಸ ಮಾಡಲು ಬೇಕಾಗುವ ಪದಾರ್ಥಗಳು:
ಹಿಟ್ಟು ಕಲೆಸಿಕೊಳ್ಳಲು ಏನೇನು ಬೇಕು: 1 ಕಪ್ ಮೈದಾ ಹಿಟ್ಟು, ಅವಶ್ಯಕ ನೀರು, 2 ಚಮಚ ಎಣ್ಣೆ, ಸ್ವಲ್ಪ ಸೋಡಾ, ರುಚಿಗೆ ತಕ್ಕಷ್ಟು ಉಪ್ಪು, 1/4 ಚಮಚ ಓಂ ಕಾಳು

ಪಲ್ಯಕ್ಕೆ ಏನೇನು ಬೇಕು:
* 4-5 ಮೀಡಿಯಂ ಆಲೂಗಡ್ಡೆ (ಬೇಯಿಸಿ ಸಿಪ್ಪೆ ತೆಗೆದಿರಬೇಕು)
* 1/2 ಕಪ್ ಬೇಯಿಸಿದ ಬಟಾಣಿ
* 2-3 ಚಿಕ್ಕದಾಗಿ ಕತ್ತರಿಸಿದ ಹಸಿರು ಮೆಣಸಿನಕಾಯಿ
* ಕತ್ತರಿಸಿದ ಕೊತ್ತಂಬರಿ ಮತ್ತು ಪುದೀನಾ
* 2 ಚಮಚ ಎಣ್ಣೆ
* 1 ಚಮಚ ಜೀರಿಗೆ
* ಸ್ವಲ್ಪ ಶುಂಠಿ ಪೇಸ್ಟ್
* 1 ಚಮಚ ಮಾವಿನ ಪುಡಿ (ಬೇಕಿದ್ದರೆ)
* 1 ಚಮಚ ಗರಂ ಮಸಾಲ
* ರುಚಿಗೆ ತಕ್ಕಷ್ಟು ಉಪ್ಪು

ಸಮೋಸ ತಯಾರಿಸುವ ವಿಧಾನ:

* ಮೊದಲು ಹಿಟ್ಟಿಗೆಂದು ತಿಳಿಸಿದ ಸಾಮಗ್ರಿಗಳನ್ನು ಚೆನ್ನಾಗಿ ಮಿದ್ದು ಕಲೆಸಿಕೊಂಡು ಒಂದೆಡೆ ಇಟ್ಟುಕೊಳ್ಳಬೇಕು.

* 15 ನಿಮಿಷದ ನಂತರ ಹಿಟ್ಟನ್ನು ಸಣ್ಣ ಸಣ್ಣ ಉಂಡೆಗಳಾಗಿ ಮಾಡಿಕೊಳ್ಳಬೇಕು. ಒಂದೆಡೆ ಬಾಣಲೆಯಲ್ಲಿ ಎಣ್ಣೆ ಕಾಯಲು ಇಡಬೇಕು.

* ಇನ್ನೊಂದು ಪಾತ್ರೆಯಲ್ಲಿ ಪಲ್ಯಕ್ಕೆಂದು ತಿಳಿಸಿದ ಎಲ್ಲಾ ಸಾಮಾನುಗಳನ್ನು ಚೆನ್ನಾಗಿ ಬೆರೆಸಿಟ್ಟುಕೊಳ್ಳಬೇಕು.

* ಉಂಡೆಯನ್ನು ವೃತ್ತಾಕಾರವಾಗಿ ಒತ್ತಿಕೊಂಡು ಚಾಕುವಿನ ಸಹಾಯದಿಂದ ಅರ್ಧ ಕತ್ತರಿಸಬೇಕು.

* ಅರ್ಧ ಭಾಗಕ್ಕೆ ಪಲ್ಯ ತುಂಬಿ ಇನ್ನರ್ಧ ಭಾಗವನ್ನು ಸುರುಳಿ ಸುತ್ತಿ ತ್ರಿಕೋನಾಕಾರವಾಗಿ ಮಾಡಿ ಎಣ್ಣೆಗೆ ಬಿಡಬೇಕು.

* ಎಣ್ಣೆಯಲ್ಲಿ ಸಮೋಸ ಕೆಂಪಗಾಗುವವರೆಗೂ ಕರಿದು ಆಮೇಲೆ ಪೇಪರ್ ಮೇಲೆ ಎಣ್ಣೆ ಹೀರಿಕೊಳ್ಳಲು ಬಿಡಬೇಕು.

ಇದೀಗ ಬೇಬಿ ಸಮೋಸ ತಿನ್ನಲು ಸಿದ್ಧಗೊಂಡಿರುತ್ತೆ. ಇದನ್ನು ಸಾಸ್ ಜೊತೆ ಅಥವಾ ಸಿಹಿ ಹುಣಸೆ ಚಟ್ನಿ ಮಾಡಿ ಸೇವಿಸಿದರೆ ರುಚಿ ಬಲು ಜೋರು.