ಚುಮುಚುಮು ಚಳಿಯಲ್ಲಿ ಬಿಸಿ ಬಿಸಿ ಮಸಾಲ್ ಪುರಿ

Snacks

oi-Sumalatha

By Sumalatha

Published: Saturday, October 29, 2011, 15:32 [IST]

ಈ ಚಳಿಗಾಲದಲ್ಲಿ ಬಿಸಿ ಬಿಸಿ ಮಸಾಲ ಪುರಿ ತಿನ್ನುತ್ತಿದ್ದರೆ ಅದರ ಮಜವೇ ಬೇರೆ. ಆದರೆ ಯಾವಾಗಲೂ ಹೊರಗೆ ತಿನ್ನುವುದು ಆರೋಗ್ಯಕರವಲ್ಲ. ಹಾಗಂತ ತಿನ್ನುವ ಮಜವನ್ನೂ ಕಳೆದುಕೊಳ್ಳಬೇಕಿಲ್ಲ. ಮಸಾಲ ಪುರಿಯನ್ನು ಇಷ್ಟ ಪಡುವವರು ಮನೆಯಲ್ಲೇ ಇದನ್ನು ಮಾಡಿ ಸವಿಯಬಹುದು.

ಮಸಾಲ ಪುರಿಗೆ ಏನೇನು ಬೇಕು?
* ಒಂದು ಪ್ಯಾಕ್ ಪೂರಿ (ಮಸಾಲ ಪುರಿಗೆ ಬಳಸುವುದು)
* 2 ಕಪ್ ಬೇಯಿಸಿದ ಬಟಾಣಿ
* 1 ದೊಡ್ಡ ಈರುಳ್ಳಿ (ಕತ್ತರಿಸಿದ್ದು)
* 1 ಆಲೂಗಡ್ಡೆ (ಬೇಯಿಸಿ ಸಿಪ್ಪೆ ತೆಗೆದು ಕಲೆಸಿದ್ದು)
* 1 ಚಮಚ ಗರಂ ಮಸಾಲ, 1 ಚಮಚ ಚಾಟ್ ಮಸಾಲ
* 1 ಚಮಚ ಕೆಂಪು ಮೆಣಸಿನ ಪುಡಿ, 1 ಚಮಚ ಅರಿಶಿಣ ಪುಡಿ
* 1 ಚಮಚ ಬೆಲ್ಲ, 1 ಚಮಚ ಹುಣಸೆ ರಸ
* 1 ಕಪ್ ಕತ್ತರಿಸಿದ ಕೊತ್ತಂಬರಿ
* 1 ಕಪ್ ಕತ್ತರಿಸಿದ ಕ್ಯಾರೆಟ್
* 1 ಪ್ಯಾಕ್ ಸೇವ್
* ಉಪ್ಪು

ಚಟ್ನಿಗೆ ಏನೇನು ಬೇಕು?
1 ರಿಂದ 2 ಚಮಚ ಜೀರಿಗೆ, ಸ್ವಲ್ಪ ಶುಂಠಿ, ಕೊತ್ತಂಬರಿ, 2-3 ಹಸಿರು ಮೆಣಸಿನಕಾಯಿ, 3-4 ಪುದೀನಾ ಎಲೆ

ಮಸಾಲಾ ಪುರಿ ಮಾಡುವ ಬಗೆ:
* ಚಟ್ನಿಗೆ ತಿಳಿಸಿರುವ ಎಲ್ಲಾ ಪದಾರ್ಥಗಳನ್ನು ರುಬ್ಬಬೇಕು.
* ಒಂದು ಪಾತ್ರೆಯಲ್ಲಿ ಬೇಯಿಸಿದ ಬಟಾಣಿಗೆ ಒಂದು ಲೋಟ ನೀರು ಬೆರೆಸಿ ರುಬ್ಬಿಕೊಂಡ ಚಟ್ನಿಯನ್ನು ಹಾಕಿ ಸಣ್ಣ ಉರಿಯಲ್ಲಿ ಕಾಯಿಸುತ್ತಿರಬೇಕು.
* ಇನ್ನೊಂದು ಪಾತ್ರೆಯಲ್ಲಿ ಸ್ವಲ್ಪ ನೀರಿಗೆ ಗರಂ ಮಸಾಲ, ಕೆಂಪುಮೆಣಸಿನ ಪುಡಿ, ಅರಿಶಿಣ ಪುಡಿ, ಹುಣಸೇ ರಸ, ಬೆಲ್ಲ, ಉಪ್ಪನ್ನು ಸೇರಿಸಿ ಈ ಮಸಾಲೆಯನ್ನು ಸಣ್ಣ ಉರಿಯಲ್ಲಿ ಕೆಲವು ನಿಮಿಷ ಬೇಯಲು ಬಿಡಬೇಕು.
* ಈಗ ಕತ್ತರಿಸಿದ್ದ ಕ್ಯಾರೆಟ್, ಈರುಳ್ಳಿ, ಕೊತ್ತಂಬರಿಯನ್ನು ಬೆರೆಸಿ ಒಂದೆಡೆ ಇಟ್ಟುಕೊಳ್ಳಬೇಕು.

ಮಸಾಲ ಪುರಿ ಬೆರೆಸುವ ವಿಧಾನ:
* ಪೂರಿಗಳನ್ನು ಸ್ವಲ್ಪ ಪುಡಿ ಮಾಡಿ ತಟ್ಟೆಗಳ ಮೇಲೆ ಹಾಕಬೇಕು. ಅದರ ಮೇಲೆ ಕಲಸಿದ ಆಲೂಗಡ್ಡೆಯನ್ನು ಹಾಕಬೇಕು.
* ನಂತರ ಬಟಾಣಿ ಮಿಶ್ರಣ, ಮಸಾಲೆ ಮಿಶ್ರಣವನ್ನು ಇದರ ಮೇಲೆ ಹಾಕಬೇಕು.
* ಬೆರೆಸಿದ್ದ ತರಕಾರಿಗಳನ್ನೂ ಇದರ ಮೇಲೆ ಹಾಕಬೇಕು.
* ಕೊನೆಯಲ್ಲಿ ಒಂದು ಹಿಡಿ ಸೇವ್ ಹಾಕಿ ತಿನ್ನಲು ಕೊಟ್ಟರೆ ಮಸಾಲ ಪುರಿ ತುಂಬಾ ರುಚಿಕರವಾಗಿರುತ್ತೆ.

ಈ ಮಸಾಲ ಪುರಿಯನ್ನು ಬಿಸಿ ಬಿಸಿ ಇದ್ದಾಗಲೆ ತಿಂದರೆ ರುಚಿಯ ಘಮ್ಮತ್ತಿರುತ್ತದೆ.