ಬೇಬಿ ಕಾರ್ನ್ ಫ್ರೈ ಟ್ರೈ ಮಾಡಿ ಟೇಸ್ಟ್ ನೋಡಿ

ಬೇಬಿ ಕಾರ್ನ್ ಫ್ರೈಗೆ ಏನೇನು ಬೇಕು?: 250 ಗ್ರಾಂ ಬೇಬಿ ಕಾರ್ನ್, 1/2 ಕಪ್ ಜೋಳದ ಹಿಟ್ಟು, 3 ಈರುಳ್ಳಿ, ಮೆಣಸಿನಕಾಯಿ, 1 ಕ್ಯಾಪ್ಸಿಕಂ, 1 ಚಮಚ ನಿಂಬೆರಸ, 1 ಚಮಚ ಸೋಯಾ ಸಾಸ್, 1 ಚಮಚ ಚಿಲ್ಲಿ ಸಾಸ್, ಟೊಮೆಟೊ ಕೆಚಪ್, ಕೆಂಪುಮೆಣಸಿನಕಾಯಿ ಪುಡಿ, ಉಪ್ಪು, ಕಪ್ಪು ಮೆಣಸಿನ ಪುಡಿ, ಎಣ್ಣೆ, ವೃತ್ತಾಕಾರವಾಗಿ ಕತ್ತರಿಸಿದ ಈರುಳ್ಳಿ ತುಂಡು

ಬೇಬಿ ಕಾರ್ನ್ ಫ್ರೈ ಮಾಡುವ ವಿಧಾನ:

* ಬೇಬಿ ಕಾರ್ನ್ ಗಳನ್ನು ಎರಡು ಹೋಳುಗಳಾಗಿ ಕತ್ತರಿಸಿ ಅದನ್ನು ಬಿಸಿ ನೀರಿನಲ್ಲಿ ಉಪ್ಪಿನೊಂದಿಗೆ ಕುದಿಸಬೇಕು. ಅದು ಮೃದುಗೊಳ್ಳುವವರೆಗೂ ಬೇಯಿಸಿ ಬಸಿದು ಒಂದೆಡೆ ಇಡಬೇಕು.

* ಒಂದು ಬಟ್ಟಲಿನಲ್ಲಿ ಜೋಳದ ಹಿಟ್ಟು, ಮೆಣಸಿನಕಾಯಿ ಪುಡಿ ಮತ್ತು ಉಪ್ಪನ್ನು ಬೆರೆಸಿ ಅದಕ್ಕೆ ಬೇಯಿಸಿದ ಬೇಬಿ ಕಾರ್ನ್ ಗಳನ್ನು ಬೆರೆಸಿ ಚೆನ್ನಾಗಿ ಮಿಶ್ರಣ ಮಾಡಿ ಹಿಟ್ಟು ಎಲ್ಲ ಕಡೆಯೂ ಮೆತ್ತಿಕೊಳ್ಳುವಂತೆ ಮಾಡಬೇಕು. ಕೆಲವು ಹನಿ ನಿಂಬೆರಸವನ್ನು ಬೆರೆಸಬೇಕು.

* ಬಾಣಲೆಯಲ್ಲಿ ಎಣ್ಣೆ ಹಾಕಿ ಕಾಯಿಸಿ ಅದರಲ್ಲಿ ಬೇಬಿ ಕಾರ್ನ್ ಹುರಿಯಬೇಕು. ಅದು ಕೆಂಪಗಾಗುವ ತನಕವೂ ಹುರಿದು ಒಂದೆಡೆ ಇಡಬೇಕು.

* ಇನ್ನೊಂದು ಬಾಣಲೆಯಲ್ಲಿ ಎಣ್ಣೆ ಹಾಕಿ ಅದರಲ್ಲಿ ಈರುಳ್ಳಿಯನ್ನು ಕೆಂಪಗಾಗುವವರೆಗೂ ಹುರಿಯಬೇಕು. ಈಗ ಕ್ಯಾಪ್ಸಿಕಂ ಬೆರೆಸಿ 3-4 ನಿಮಿಷ ತಿರುಗಿಸೇಕು. ರುಚಿಗೆ ತಕ್ಕಷ್ಟು ಉಪ್ಪು, ಮೆಣಸಿನಕಾಯಿ ಪುಡಿ, ಸೋಯಾ ಸಾಸ್, ಚಿಲ್ಲಿ ಸಾಸ್, ಟೊಮೆಟೊ ಕೆಚಪ್, ಮೆಣಸಿನ ಪುಡಿ ಮತ್ತು ಹಸಿರು ಮೆಣಸಿನಕಾಯಿಯನ್ನು ಹಾಕಿ ಚೆನ್ನಾಗಿ ತಿರುಗಿಸಬೇಕು.

* ಇದಕ್ಕೆ ಬೇಬಿ ಕಾರ್ನ್ ಹಾಕಿ ಮಿಶ್ರಣ ಚೆನ್ನಾಗಿ ಹೊಂದಿಕೊಳ್ಳುವಂತೆ ತಿರುಗಿಸಬೇಕು. ಎಲ್ಲಾ ಮುಗಿದ ಮೇಲೆ ವೃತ್ತಾಕಾರವಾಗಿ ಕತ್ತರಿಸಿದ ಈರುಳ್ಳಿಯನ್ನು ಅಲಂಕಾರಕ್ಕೆ ಹಾಕಿ ಶೃಂಗರಿಸಬೇಕು. ಈಗ ಬೇಬಿ ಕಾರ್ನ್ ಫ್ರೈ ತಿನ್ನಲು ರೆಡಿಯಾಗಿದೆ.