ಮಕ್ಕಳಿಗೆ ಕಾರ್ನ್ ಫ್ಲೇಕ್ ಚೌಚೌ ರೆಡಿ ಮಾಡಿ

Snacks

oi-Sumalatha

By Sumalatha

Published: Thursday, September 22, 2011, 11:54 [IST]

ಮಕ್ಕಳಿಗೆ ಕುರುಕಲು ತಿಂಡಿ ಎಂದರೆ ತುಂಬಾ ಇಷ್ಟ. ಮನೆಯಲ್ಲೇ ಮಕ್ಕಳಿಗೆ ತಿಂಡಿ ಮಾಡಿಕೊಟ್ಟರೆ ಹೊರಗೆ ತಿಂದು ಆರೋಗ್ಯ ಕೆಡಿಸಿಕೊಳ್ಳುವ ಗೋಜೂ ತಪ್ಪುತ್ತದೆ. ಆದ್ದರಿಂದ ಮಕ್ಕಳಿಗೆ ಇಷ್ಟವಾಗುವಂತೆ ಕಾರ್ನ್ ಫ್ಲೇಕ್ ಉಪಯೋಗಿಸಿಕೊಂಡು ಚೌಚೌ ಮಾಡುವುದು ಹೇಗೆ ಎಂದು ತಿಳಿದುಕೊಳ್ಳಿ. ಬಿಸಿ ಬೇಳೆ ಬಾತ್, ಮೊಸರನ್ನ, ಟೀ ಜೊತೆಗೆ ಈ ಕಾರ್ನ್ ಫ್ಲೇಕ್ ಚೌ ಚೌ ಇದ್ದರೆ ಇನ್ನೂ ರುಚಿ.

ಚೌಚೌಗೆ ಬೇಕಾಗುವ ಪದಾರ್ಥ:
* 1 ಬಟ್ಟಲು ಕಾರ್ನ್ ಫ್ಲೇಕ್
* 1 ಚಮಚ ಕೆಂಪುಮೆಣಸಿನ ಪುಡಿ
* 1 ಚಮಚ ಅರಿಶಿನ
* 1 ಕಪ್ ಒಣಗಿದ ತೆಂಗಿನ ಕಾಯಿ ಚೂರು
* 1 ಕಪ್ ಕರಿಬೇವು
* 2-3 ಒಣಗಿದ ಮೆಣಸಿನ ಕಾಯಿ
* ರುಚಿಗೆ ತಕ್ಕಷ್ಟು ಉಪ್ಪು, ಎಣ್ಣೆ
* ಗೋಡಂಬಿ, ದ್ರಾಕ್ಷಿ, ಬಾದಾಮಿ
* ಸ್ವಲ್ಪ ಇಂಗು
* 1 ಚಮಚ ಸಾಸಿವೆ

ಕಾರ್ನ್ ಫ್ಲೇಕ್ ಚೌಚೌ ತಯಾರಿಸುವುದು ಹೇಗೆ?
* ಒಂದು ಕಪ್ ಕಾರ್ನ್ ಫ್ಲೇಕ್ ಗೆ ಒಂದು ಚಮಚ ಎಣ್ಣೆ, ಉಪ್ಪು, ಕೆಂಪು ಮೆಣಸಿನಕಾಯಿ ಪುಡಿ (ಖಾರದ ಪುಡಿ), ಅರಿಶಿನ ಎಲ್ಲವನ್ನೂ ಬೆರೆಸಿ 1 ನಿಮಿಷ ಬಿಸಿ ಮಾಡಬೇಕು. (ಮೈಕ್ರೋವೇವ್ ನಲ್ಲಿ 30 ಸೆಕೆಂಡ್ ಬಿಸಿ ಮಾಡಬೇಕು)
* ಒಂದು ಬಾಣಲೆಗೆ ಒಂದು ಚಮಚ ಎಣ್ಣೆ ಹಾಕಿ ಅದರಲ್ಲಿ ಗೋಡಂಬಿ, ದ್ರಾಕ್ಷಿ, ಬಾದಾಮಿಯನ್ನು ಹಳದಿ ಬಣ್ಣಕ್ಕೆ ಬರುವವರೆಗೂ ಹುರಿಯಬೇಕು.
* ಇನ್ನೊಂದು ಬಾಣಲೆಯಲ್ಲಿ ಸಾಸಿವೆ, ಇಂಗು, ಒಣಗಿದ ಕೆಂಪು ಮೆಣಸಿನಕಾಯಿ, ಕರಿಬೇವು, ಒಣಗಿದ ತೆಂಗಿನ ಚೂರುಗಳನ್ನು ಹಾಕಿ ಹುರಿದು ತಣ್ಣಗಾಗಲು ಬಿಡಬೇಕು.
* ಕೊನೆಗೆ ಎಲ್ಲವನ್ನೂ ಒಂದು ಪಾತ್ರೆಗೆ ಹಾಕಿ ಚೆನ್ನಾಗಿ ಮಿಶ್ರಣ ಮಾಡಿದರೆ ಕಾರ್ನ್ ಫ್ಲೇಕ್ ಚೌಚೌ ತಿನ್ನಲು ರೆಡಿಯಾಗಿರುತ್ತೆ.