ಊಟದ ರುಚಿ ಹೆಚ್ಚಿಸುವ ಟೊಮೆಟೊ, ಈರುಳ್ಳಿ ರಾಯತ

Snacks

oi-Reena

By Hema S

Published: Monday, April 30, 2012, 13:03 [IST]

ರಾಯತ ಊಟಕ್ಕಿದ್ದರೆ ಬಾಯಿ ರುಚಿ ಹೆಚ್ಚುವುದು. ರಾಯತವನ್ನು ತೆಂಗಿನ ಕಾಯಿ ರಾಯತ, ಪುದೀನಾ ರಾಯತ ಹೀಗೆ ಅನೇಕ ಬಗೆಯಲ್ಲಿ ತಯಾರಿಸಬಹುದು. ಈ ರಾಯತಗಳು ರುಚಿಯಲ್ಲಿ ಒಂದಕ್ಕೊಂದು ಭಿನ್ನವಾಗಿರುತ್ತದೆ. ಇವತ್ತು ನಾವು ಟೊಮೆಟೊ ಮತ್ತು ಈರುಳ್ಳಿಯಿಂದ ರಾಯತ ಮಾಡುವ ವಿಧಾನ ತಿಳಿಯೋಣ:

( ಈ ಕೆಳಗಿನ ಅಳತೆಯಲ್ಲಿ ಸಾಮಾಗ್ರಿಗಳನ್ನು ಹಾಕಿ ಮಾಡಿದರೆ 2-3 ಜನಕ್ಕೆ ಸಾಕಾಗುವುದು.)

ಬೇಕಾಗುವ ಸಾಮಾಗ್ರಿಗಳು:

* 2 ಕಪ್ ಮೊಸರು
* ಒಂದು ಕಪ್ ಈರುಳ್ಳಿ ಮತ್ತು ಟೊಮೆಟೊ
* 1 ಚಮಚ ತುರಿದ ಶುಂಠಿ
* ಸ್ವಲ್ಪ ಕೊತ್ತಂಬರಿ ಸೊಪ್ಪು (ಕತ್ತರಿಸಿದ್ದು)
* ರುಚಿಗೆ ತಕ್ಕ ಉಪ್ಪು
* ಚಿಟಿಕೆಯಷ್ಟು ಸಕ್ಕರೆ
* 2 ಚಮಚ ಎಣ್ಣೆ
* 1/4 ಚಮಚ ಜೀರಿಗೆ
* 1/4 ಚಮಚ ಸಾಸಿವೆ
* 1 ಹಸಿ ಮೆಣಸಿನಕಾಯಿ
* 2-3 ಕರಿಬೇವಿನ ಎಲೆ

ಮಾಡುವ ವಿಧಾನ:

1. ಟೊಮೆಟೊ, ಈರುಳ್ಳಿ, ಶುಂಠಿ, ರುಚಿಗೆ ತಕ್ಕ ಉಪ್ಪು, ಚಿಟಿಕೆಯಷ್ಟು ಸಕ್ಕರೆ ಹಾಕಿ ಮಿಶ್ರ ಮಾಡಬೇಕು.

2. ಬಾಣಲೆಯಲ್ಲಿ ಎಣ್ಣೆ ಹಾಕಿ ಬಿಸಿ ಮಾಡಿ, ಸಾಸಿವೆ ಹಾಕಿ ಅದು ಚಟಾಪಟ ಶಬ್ದ ಬರುವಾಗ ಜೀರಿಗೆ ಮತ್ತು ಕರಿಬೇವಿನ ಎಲೆ ಮತ್ತು ಹಸಿಮೆಣಸಿನಕಾಯಿ ಹಾಕಿ ಸ್ವಲ್ಪ ಹೊತ್ತು ಹುರಿಯಬೇಕು.

3. ಈಗ ಈ ಒಗ್ಗರಣೆಯನ್ನು ಟೊಮೆಟೊ ಮತ್ತು ಈರುಳ್ಳಿ ಮಿಶ್ರಣಕ್ಕೆ ಸುರಿದು, ಅದಕ್ಕೆ ಮೊಸರು ಹಾಕಿ ಚೆನ್ನಾಗಿ ಮಿಶ್ರ ಮಾಡಿದರೆ ರುಚಿಕರವಾದ ರಾಯತ ರೆಡಿ.
ಇದನ್ನು ರೊಟ್ಟಿ ಅಥವಾ ಅನ್ನದ ಜೊತೆ ತಿನ್ನಲು ತುಂಬಾ ರುಚಿಕರವಾಗಿರುತ್ತದೆ.