ದಹಿಸುವ ಸೆಕೆಗೆ ತಂಪು ನೀಡುತ್ತೆ ದಹಿವಡೆ

Snacks

oi-Reena

By Hema S

Published: Saturday, March 3, 2012, 15:04 [IST]

ಬೇಸಿಗೆಯಲ್ಲಿ ಮೊಸರು, ಮಜ್ಜಿಗೆ ಹೆಚ್ಚಾಗಿ ಸೇವಿಸಿದದಷ್ಟೂ ಆರೋಗ್ಯಕ್ಕೆ ಒಳ್ಳೆಯದು. ಬೇಸಿಗೆಯಲ್ಲಿ ತಂಪು ಅನಿಸುವ ಪದಾರ್ಥಗಳನ್ನು ಸೇವಿಸಲು ಇಷ್ಟಪಡುತ್ತೇವೆ. ಆದ್ದರಿಂದ ಈ ಸಮಯದಲ್ಲಿ ದಹಿ ವಡೆ (ಮೊಸರು ವಡೆ) ತಿನ್ನಲು ಖುಷಿಯಾಗುವುದು. ಇದನ್ನು ಮಾಡುವ ಸುಲಭ ವಿಧಾನ ನೋಡಿ ಇಲ್ಲಿದೆ.

ಬೇಕಾಗುವ ಸಾಮಾಗ್ರಿಗಳು:

1. ಮೊಸರು 1 ಲೋಟ
2. ಉದ್ದಿನ ಬೇಳೆ 1 ಕಪ್
3. ಹೆಸರು ಬೇಳೆ 1 ಕಪ್
4. ಹಸಿ ಮೆಣಸಿನ ಕಾಯಿ 3-4
5. ಇಂಗು 1 ಚಿಟಿಕೆಯಷ್ಟು
6. ಕರಿಮೆಣಸಿನ ಪುಡಿ, ಚಕ್ಕೆ, ಏಲಕ್ಕಿ, ಬೆಳ್ಳುಳ್ಳಿ ಎಸಳು ಇವುಗಳಿಂದ ತಯಾರಿಸಿದ ಗರಂ ಮಸಾಲ
7. ಕೆಂಪು ಮೆಣಸಿನ ಪುಡಿ 1 ಚಮಚ
8. ಹುಣಸೆ ಹಣ್ಣಿನ ರಸ 4 ಚಮಚ
9. ಜೀರಿಗೆ 1 ಚಮಚ
10. ತುಪ್ಪ 1 ಚಮಚ
11. ಎಣ್ಣೆ
12.ರುಚಿಗೆ ತಕ್ಕ ಉಪ್ಪು

ತಯಾರಿಸುವ ವಿಧಾನ:

1. ಉದ್ದಿನ ಬೇಳೆ ಮತ್ತು ಹೆಸರು ಬೇಳೆಯನ್ನು ರಾತ್ರಿ ನೀರಿನಲ್ಲಿ ನೆನೆ ಹಾಕಬೇಕು. ಇದರ ಜೊತೆ ಸಣ್ಣ ಬಟ್ಟಲಿನಲ್ಲಿ ಸ್ವಲ್ಪ ಹುಣಸೆ ಹುಳಿ ನೆನೆ ಹಾಕುವುದು ಒಳ್ಳೆಯದು.

2. ವಡೆ ಮಾಡುವಾಗ ಹಸಿಮೆಣಸಿನ ಕಾಯಿ, ಉಪ್ಪು ಮತ್ತು ಇಂಗು ಹಾಕಿ ಗಟ್ಟಿಯಾಗಿ ಅರೆಯಬೇಕು. ನಂತರ ರುಚಿಗೆ ತಕ್ಕ ುಪ್ಪು ಹಾಕಬೇಕು. ಈ ಮಿಶ್ರಣದಿಂದ ವಡೆಗೆ ಬೇಕಾಗುವ ಆಕಾರದಲ್ಲಿ ತಟ್ಟಿಡಬೆಕು.

3. ಎಣ್ಣೆಯನ್ನು ಬಾಣಲೆಯಲ್ಲಿ ಹಾಕಿ ಕುದಿಸಬೇಕು. ಕುದಿಯುವ ಎಣ್ಣಿಗೆ ವಡೆ ಹಿಟ್ಟನ್ನು ಹಾಕಿ ಕಂದು ಬಣ್ಣ ಬರುವಾಗ ತೆಗೆಯಬೇಕು.

4. ಬಿಸಿಯಾದ ವಡೆಯನ್ನು ಮಾಡಿದ ತಣ್ಣೀರಿನಲ್ಲಿ ಮುಳುಗಿಸಬೇಕು.

5. ಮೊಸರನ್ನು ಚೆನ್ನಾಗಿ ಕದಡಿ ಗರಂ ಮಸಾಲ, ಉಪ್ಪು ಮತ್ತು ಕೆಂಪು ಮೆಣಸಿನ ಪುಡಿ ಹಾಕಬೇಕು. ಇದನ್ನು ವಡೆ ಮೇಲೆ ಸುರಿದು ಹುಣಸೆ ಹಣ್ಣಿನ ರಸವನ್ನು ಅದರ ಮೇಲೆ ಚಿಮುಕಿಸಬೇಕು.

6. ಬಾಣಲೆಯಲ್ಲಿ ಒಂದು ಚಮಚ ತುಪ್ಪ ಹಾಕಿ ಅದರಲ್ಲಿ ಜೀರಿಗೆ ಹಾಕಿ ಹುರಿದು ಅದನ್ನು ವಡೆ ಮೇಲೆ ಹಾಕಿದರೆ ರುಚಿಯಾದ ದಹಿ ವಡೆ ರೆಡಿ.