ಹುಣಿಸೆ ಎಲೆ ಚಿಗುರಿನ ದಾಲ್ಮಖಾನಿ

Rasam

oi-Staff

By * ಪ್ರಮೋದಿನಿ ಪಾಠಕ್, ಪುಣೆ

Published: Tuesday, September 29, 2009, 17:57 [IST]

ಹುಣಸೆ ಮರ ಕಂಡ್ರೆ ಸಾಕು ಕಣ್ಣು ನೇರವಾಗಿ ಗೊಂಚಲು ಗೊಂಚಲಾಗಿ ಜೋತುಬಿದ್ದಿರುವ ಹುಣಸೆ ಹಣ್ಣಿನ ಮೇಲೇ ಹೋಗುತ್ತದೆ. ವಯಸ್ಸು ಯಾವುದೇ ಇರಲಿ ಶಕ್ತಿಯೆಲ್ಲಾ ಉಪಯೋಗಿಸಿ ಕಲ್ಲು ಬೀಸಿ ಕೆಳಗೆ ಬಿದ್ದ ಹಣ್ಣೋ, ಕಾಯಿಯನ್ನೋ ತಿನ್ನುವುದಂದ್ರೆ ಯಾರಿಗೆ ಪ್ರೀತಿಯಿಲ್ಲ. ಬಾಯಲ್ಲಿ ಆಗಲೇ ನೀರೂರಲು ಪ್ರಾರಂಭಿಸಿತೆ?

ಅನೇಕರಿಗೆ ಗೊತ್ತಿರಲಿಕ್ಕಿಲ್ಲ. ಹುಣಸೆಹಣ್ಣಿನ ಜೊತೆಗೆ ಕೈಗೆಟಕುವ ಅಳತೆಯಲ್ಲಿ ಜೋತಾಡುವ ಗಿಡದ ಎಳೆ ಚಿಗುರು ಕೂಡ ಅಡುಗೆಯೋಗ್ಯ. ಅದರಿಂದ ತಯಾರಿಸಿದ ಹುಳಿ ಬಲೇ ಪಸಂದಾಗಿರ್ತದೆ. ಹುಣಸೆ ಚಿಗುರೆಲೆಯನ್ನು ಬರೀ ಬಾಯಲ್ಲೇ ತಿನ್ನಬಹುದು. ಹುಳಿ ಮತ್ತು ರುಚಿಯ ಅದ್ಭುತ ಸಂಗಮದಂತಿರುತ್ತದೆ. ಅಡ್ಡಾಡಲು ಹೋದಾಗ ಹುಣಿಸೆ ಮರ ಕಂಡರೆ ಚಿಗುರೆಲೆಗಳನ್ನು ವ್ಯಾನಿಟಿಗೆ ಬ್ಯಾಗಿಗೆ ತುಂಬಿಕೊಳ್ಳುವುದನ್ನು ಮರೆಯಬೇಡಿ. ಬಹುಶಃ ಕಾಸಿಲ್ಲದೇ ಸಿಗುವ ಸೊಪ್ಪು ಇದೊಂದೇ ಇರಬಹುದು.

ಬೇಕಾಗುವ ಸಾಮಾನುಗಳು :

ಎಳೆಯ ಹುಣಸೆ ಚಿಗುರೆಲೆ, ಏಳೆಂಟು
ಒಂದು ಕಪ್ ಹೆಸರುಬೇಳೆ
ಮೆಣಸಿನಪುಡಿ ಒಂದು ಚಮಚ
ಚಿಟಿಕೆ ಇಂಗು
ಸಾಸಿವೆ ಚಮಚ - 1/2 ಟೀ ಚಮಚ
ಒಣ ಮೆಣಸಿನಕಾಯಿ ಕೆಂಪು ನಾಲಕ್ಕು
ಚೂರು ಬೆಣ್ಣೆ, ಕರಿಬೇವು, ಉಪ್ಪು

ಮಾಡುವ ವಿಧಾನ :

ಎಳೆ ಹುಣಸೆ ಎಲೆಗಳನ್ನು ಕಡ್ಡಿಯಿಂದ ಬೇರ್ಪಡಿಸಿಕೊಂಡು ಚೆನ್ನಾಗಿ ತೊಳೆಯಿರಿ. ಎರಡು ಲೋಟ ನೀರು ಮತ್ತು ಹೆಸರುಬೇಳೆ ಹಾಗೂ ಎಲೆಗಳನ್ನು ಹಾಕಿ ಕುದಿಸಿ. ಒಣಮೆಣಸಿನಕಾಯಿಯನ್ನು ಸಣ್ಣ ಸಣ್ಣ ಚೂರು ಮಾಡಿ ಸಾಸಿವೆ, ಉದ್ದಿನಬೇಳೆ, ಕರಿಬೇವಿನ ಸೊಪ್ಪು ಬೆರೆಸಿ ಹುರಿಯಿರಿ. ಕುದಿಯುತ್ತಿರುವ ಬೇಳೆಗೆ ಇದನ್ನೆಲ್ಲಾ ಹಾಕಿ ಸಣ್ಣ ಉರಿಯಲ್ಲಿ ಬೇಯಿಸಿ. ಉಪ್ಪು, ಮೆಣಸಿನಪುಡಿ ಮತ್ತು ಇಂಗನ್ನು ಹಾಕಿ ದಪ್ಪವಾಗುವವರೆಗೆ ಕುದಿಸಿ. ಪಾತ್ರೆ ಇಳಿಸಿದ ನಂತರ ಬೆಣ್ಣೆ ಹಾಕಿ. ಚಪಾತಿಗೆ, ರೊಟ್ಟಿಯ ಜತೆಗೆ ಸೊಗಸಾಗಿರುತ್ತದೆ. ಹೆಸರು ಬೇಳೆ ಅಲ್ಲದಿದ್ದರೆ ತೊಗರಿಬೇಳೆಯನ್ನು ಬಳಸಬಹುದು.

ಎಳೆ ಹುಣಸೆ ಎಲೆಗಳನ್ನು ತಟಕು ಉಪ್ಪು, ಖಾರ, ಜೀರಿಗೆ ಹಾಕಿ ರುಬ್ಬಿ ಇನ್ ಸ್ಟಂಟ್ ಚಟ್ನಿ ಮಾಡಿಕೊಂಡು ಕೂಡ ತಿನ್ನಬಹುದು. ಜಾಸ್ತಿ ತಿಂದ್ರೆ ಹಲ್ಲು ಚುಳ್ ಅಂದೀತು ಹುಷಾರ್.