ದಟ್ಸ್ ಪಾಕಶಾಲೆ : ಆಲೂಗಡ್ಡೆ ಕೂಟು

100 ಗ್ರಾಂ ಆಲೂಗಡ್ಡೆ 80 ಕಿ.ಲೋ ಕ್ಯಾಲೊರಿಗಳಷ್ಟು ಶಕ್ತಿ ಕೊಡುತ್ತದೆ. ಅನ್ನಾಂಗ 'ಬಿ'ಯಿಂದ ಸಮೃದ್ಧವಾಗಿದ್ದು ಕಬ್ಬಿಣ, ಮೆಗ್ನಿಷಿಯಂ, ರಂಜಕ. ಪೊಟ್ಯಾಷಿಯಂ, ಸೋಡಿಯಂ ನಂತಹ ಖನಿಜಗಳು ಹೇರಳವಾಗಿವೆ. ದೈಹಿಕ ಕೆಲಸ ಅಧಿಕವಾಗಿ ಮಾಡುವವರಿಗೆ ಆಲೂಗಡ್ಡೆ ಮತ್ತಷ್ಟು ಶಕ್ತಿಯನ್ನು ಒದಗಿಸುತ್ತದೆ. ಆರೋಗ್ಯವಂತರು ಆಲೂಗಡ್ಡೆಯನ್ನು ತಿಂದರೆ ಯಾವುದೇ ತೊಂದರೆಯಾಗುವುದಿಲ್ಲ ಎಂಬುದನ್ನ್ನು ಮರೆಯಬೇಡಿ.

*ಶ್ರೀರಕ್ಷಾ, ಬೆಂಗಳೂರು

ಬೇಕಾಗುವ ಪದರ್ಥಗಳು

ಆಲೂಗಡ್ಡೆ: ¼ ಕೆ.ಜಿ
ಸಾಸಿವೆ: 1 ಚಮಚ
ಮೆಂತ್ಯ: ½ ಚಮಚ
ಉಪ್ಪು: ರುಚಿಗೆ ತಕ್ಕಷ್ಟು
ಕೆಂಪು ಮೆಣಸಿನಕಾಯಿ: 6
ಇಂಗು: 1 ಚಿಟಿಕೆ
ಹುಣಸೆಹಣ್ಣಿನ ರಸ: ½ ಕಪ್ಪು
ಹರಿಶಿಣ ಪುಡಿ: 2 ಚಿಟಿಕೆ
ಕರಿಬೇವು: ಒಗ್ಗರಣೆಗೆ
ಎಣ್ಣೆ: 6 ಚಮಚ

ಮಾಡುವ ವಿಧಾನ

ಮೊದಲು ಆಲೂಗಡ್ಡೆಯನ್ನು ನೀರಿನಲ್ಲಿ ಶುಚಿಯಾಗಿ ತೊಳೆದುಕೊಳ್ಳಿ. ನಂತರ ಸಿಪ್ಪೆ ಸುಲಿದು, ಸಣ್ಣಗೆ ಹೆಚ್ಚಿಕೊಳ್ಳಿ. ಉಪ್ಪು ಬೆರೆಸಿ ಒಂದು ಪಾತ್ರೆಯಲ್ಲಿ ಹಾಕಿ ಸ್ವಲ್ಪ ಸಮಯ ಬಿಟ್ಟ ನಂತರ, ಬಾಣಲೆಯಲ್ಲಿ ಹುರಿಯಿರಿ. ಆಲೂಗಡ್ಡೆ ಹೋಳುಗಳು ಹೊಂಬಣ್ಣಕ್ಕೆ ಬರುವವರೆಗೂ ಮಧ್ಯಮ ಪ್ರಮಾಣದ ಉರಿಯಲ್ಲಿ ಹುರಿಯಬೇಕು.

ಈಗ ಸಣ್ಣಗೆ ಹೆಚ್ಚಿಕೊಂಡ ಕೆಂಪು ಮೆಣಸಿನಕಾಯಿಯ ಜೊತೆಗೆ ಮೆಂತ್ಯ, ಸಾಸಿವೆ, ಕರಿಬೇವು, ಹರಿಶಿಣ ಪುಡಿ ಮತ್ತು ಇಂಗುಗಳನ್ನು ಸೇರಿಸಿ ಎರಡು ಚಮಚ ಎಣ್ಣೆಯಲ್ಲಿ ಹುರಿದುಕೊಂಡು ನಯವಾಗಿ ಅರೆದುಕೊಳ್ಳಬೇಕು. ಹುರಿದುಕೊಂಡ ಆಲೂಗಡ್ಡೆಗೆ ಹುಣಸೆ ರಸ, ಉಪ್ಪು ಸೇರಿಸಿ ಕಣಕವನ್ನು ತಯಾರಿಸಿಕೊಳ್ಳಬೇಕು. ಕೊನೆಯದಾಗಿ ಅರೆದ ಮಸಾಲೆಯನ್ನು ಆಲೂಗಡ್ಡೆ ತುಂಡುಗಳೊಂದಿಗೆ ಬೆರೆಸಿ ಅಗಲವಾದ ಪಾತ್ರೆಯಲ್ಲಿ 4 ಚಮಚ ಎಣ್ಣೆಯಲ್ಲಿ ಬಿಸಿ ಮಾಡಿ ಚೆನ್ನಾಗಿ ಕಲಕ ಬೇಕು. ಬಿಸಿಯಾಗಿದ್ದಾಗ ಬಡಿಸಿದರೆ ರುಚಿ ಮತ್ತಷ್ಟು ಸೊಗಸಾಗಿರುತ್ತದೆ.

ಸೂಚನೆ: ಬೇಕಿದ್ದರೆ ತುರಿದ ತೆಂಗಿನಕಾಯಿ, ¼ ಕೆ.ಜಿ ಹುರುಳಿಕಾಯಿ, ಕ್ಯಾರೆಟ್, ಒಂದು ಕಪ್ ತೊಗರಿ ಬೇಳೆಯನ್ನು ಉಪಯೋಗಿಸಬಹುದು.