ಈರುಳ್ಳಿ, ಹುಣಸೆಹಣ್ಣಿನ ಬೊಂಬಾಟ್ ಗೊಜ್ಜು

Rasam

oi-Prasad P Naik

By * ಉಮಾ ಸುಬ್ರಮಣ್ಯ, ಬೆಂಗಳೂರು

Published: Wednesday, July 6, 2011, 14:12 [IST]

ಜ್ವರ ಬಂದು ಬಾಯಿ ಕೆಟ್ಟಿದ್ದರೆ ಈ ಗೊಜ್ಜು ಮಾಡಿಕೊಂಡು ಬಿಸಿ ಅನ್ನದ ಜೊತೆ ತಿಂದರೆ ಬಾಯಿಗೆ ಬಲು ರುಚಿಕರ ಹಾಗು ಹಿತಕರ. ಪ್ರತಿದಿನ ಬೇಳೆ ಸಾರು, ಹುಳಿ ಮಾಡುವ ಬದಲು ಆಗಾಗ ಇದನ್ನು ಮಾಡಿಕೊಳ್ಳಬಹುದು. ಈ ಗೊಜ್ಜು ಬಿಸಿಬಿಸಿಯಾಗಿ ತಯಾರಿಸಿದ ರಾಗಿ ಮುದ್ದೆಯೊಡನೆಯೂ ತಿನ್ನಲು ಚೆನ್ನಾಗಿರುತ್ತದೆ.

ಬೇಕಾಗುವ ಸಾಮಾನುಗಳು

ಈರುಳ್ಳಿ 2ರಿಂದ 3
ಹುಣಸೆಹಣ್ಣು ಒಂದು ಹಿಡಿ
ಬೆಲ್ಲ ಒಂದು ಬಟ್ಟಲು
ಮೆಣಸಿನ ಪುಡಿ - 1 ಚಮಚ
ಎಣ್ಣೆ
ಕರಿಬೇವು ಸೊಪ್ಪು
ಒಣ ಮೆಣಸಿನ ಕಾಯಿ
ಸಾಸಿವೆ
ಜೀರಿಗೆ
ಇಂಗು
ರುಚಿಗೆ ತಕ್ಕಷ್ಟು ಉಪ್ಪು

ಮಡುವ ವಿಧಾನ

* ಗೊಜ್ಜು ತಯಾರಿಕೆಗೆ ಬೇಕಾಗುವ ಎಲ್ಲಾ ಸಾಮಗ್ರಿಗಳನ್ನು ಜೋಡಿಸಿಟ್ಟುಕೊಳ್ಳುವ ಅರ್ಧ ಗಂಟೆ ಮೊದಲು ಹುಣಸೆಹಣ್ಣನ್ನು ಒಂದು ದೊಡ್ಡ ಬಟ್ಟಲಲ್ಲಿ ನೀರಲ್ಲಿ ನೆನೆಯಿಡಿ. ನಂತರ ಈರುಳ್ಳಿಯನ್ನು ಸಣ್ಣದಾಗಿ ಹೆಚ್ಚಿಟ್ಟುಕೊಂಡು ಒಂದು ಪಕ್ಕಕ್ಕೆ ತೆಗೆದಿಟ್ಟುಕೊಳ್ಳಿ.

* ಹುಣಸೆಹಣ್ಣು ನೆಂದು ಅರ್ಧಗಂಟೆಯಾದ ನಂತರ ಸಣ್ಣದಾಗಿ ಹೆಚ್ಚಿಟ್ಟುಕೊಂಡ ಈರುಳ್ಳಿಯನ್ನು ಒಂದು ಬೋಗುಣಿಯಲ್ಲಿ ಸ್ವಲ್ಪವೇ ಎಣ್ಣೆಹಾಕಿ ಕಂದು ಬಣ್ಣ ಬರುವವರೆಗೆ ತಾಳಿಸಿ ಸ್ಟೌನಿಂದ ಕೆಳಗಿಳಿಸಿಡಿ.

* ಒಂದು ತಳ ಹತ್ತದಿರುವ ಬಾಣಲೆಯಲ್ಲಿ ಹುಣಸೆಹಣ್ಣಿನ ರಸವನ್ನು ಹಿಂಡಿರಿ. ಇದಕ್ಕೆ ಪುಡಿ ಮಾಡಿಟ್ಟುಕೊಂಡ ಬೆಲ್ಲವನ್ನು ಹಾಕಿ ಕುದಿಯಲು ಬಿಡಿ. ಉರಿ ಕಡಿಮೆಯಿರಲಿ. ತಳ ಹತ್ತದಂತೆ ಆಗಾಗ ಕೈಯಾಡಿಸುತ್ತಿರಿ.

* ಚೆನ್ನಾಗಿ ಕುದ್ದ ನಂತರ ತಾಳಿಸಿಟ್ಟ ಈರುಳ್ಳಿ, ಖಾರದ ಪುಡಿ (ಮೆಣಸಿನ ಪುಡಿ), ರುಚಿಗೆ ತಕ್ಕಷ್ಟು ಉಪ್ಪು ಹಾಕಿ, ಮುಚ್ಚಿಟ್ಟು ಮತ್ತೆ ಎರಡು ನಿಮಿಷ ಕುದಿಯಲು ಬಿಟ್ಟು ಕೆಳಗಿಳಿಸಿಬಿಡಿ.

* ಇನ್ನೊಂದು ಪಾತ್ರೆಯಲ್ಲಿ ಎಣ್ಣೆ ಬಿಸಿ ಮಾಡಿ, ಸಾಸಿವೆ, ಇಂಗು, ಜೀರಿಗೆ, ಒಣ ಮೆಣಸಿನಕಾಯಿ, ಕರಿಬೇವು ಸೊಪ್ಪು ಹಾಕಿ ಬಾಡಿಸಿ. ಈ ಒಗ್ಗರಣೆಯನ್ನು ಕುದಿಸಿಟ್ಟ ಹುಣಸೆ ಗೊಜ್ಜಿಗೆ ಸೇರಿಸಿ. ಈರುಳ್ಳಿ, ಹುಣಸೆ ಹಣ್ಣಿನ ಗೊಜ್ಜು ರೆಡಿ. ಇದು ಬಿಸಿ ಅನ್ನದ ಜೊತೆ ತಿನ್ನಲು ತುಂಬಾ ಚೆನ್ನಾಗಿರುತ್ತದೆ.

* ದಿನಾ ಬೇಳೆ ಹಾಕಿ ಸಾರು, ಹುಳಿ ಮಾಡುವ ಬದಲು, ಆಗಾಗ ಇದನ್ನು ಮಾಡಿ ಕೊಳ್ಳಬಹುದು. ಮಾಡಿ, ತಿಂದು ನಿಮ್ಮ ಅನಿಸಿಕೆ ತಿಳಿಸಿ.