ಥಟ್ ಅಂತ ರೆಡಿಯಾಗುತ್ತೆ ಬದನೆಕಾಯಿ ಕರಿ

ಟೇಸ್ಟಲ್ಲಿ ಸಾಟಿಯಿಲ್ಲದ ಈ ಬದನೆಕಾಯಿ ಮಾಡುವ ವಿಧಾನವನ್ನು ಇಲ್ಲಿ ತಿಳಿದುಕೊಳ್ಳಿ.

ಬದನೆಕಾಯಿ ಕರಿಗೆ ಏನೇನು ಬೇಕು?: 1 ದುಂಡು ಬದನೆಕಾಯಿ, 1 ಈರುಳ್ಳಿ, 1 ಟೊಮೆಟೊ, ಚೂರು ಶುಂಠಿ, 4 ಮೆಣಸಿನಕಾಯಿ, 1 ಚಮಚ ಜೀರಿಗೆ, 1 ಚಮಚ ಜೀರಿಗೆ ಪುಡಿ, 1 ಚಮಚ ಧನಿಯಾ ಪುಡಿ, 1 ಚಮಚ ಕೆಂಪು ಮೆಣಸಿನಕಾಯಿ ಪುಡಿ, ಸ್ವಲ್ಪ ಇಂಗು, ಕೊತ್ತಂಬರಿ, ಪಲಾವ್ ಎಲೆ 1, ಎಣ್ಣೆ, ಉಪ್ಪು.

ಬದನೆಕಾಯಿ ಕರಿ ಮಾಡುವುದು ಹೇಗೆ?
* ಮೊದಲು ಬದನೆಕಾಯಿಯನ್ನು ಗ್ಯಾಸ್ ಉರಿಯಲ್ಲಿ ಎಲ್ಲ ಬದಿಯಲ್ಲೂ ಚೆನ್ನಾಗಿ ಸುಟ್ಟುಕೊಳ್ಳಬೇಕು (ಸ್ಟೀಲ್ ಕಡ್ಡಿಯನ್ನು ಚುಚ್ಚಿ ಸುಟ್ಟುಕೊಳ್ಳಬಹುದು)

* ಬದನೆಕಾಯಿ ಕಪ್ಪಗಾದಂತೆ ಕಂಡಾಗ ಒಲೆಯಿಂದ ತೆಗೆದು ತಣ್ಣಗಾಗಲು ಬಿಡಬೇಕು. ಅದು ತಣ್ಣಗಾದ ನಂತರ ಚೆನ್ನಾಗಿ ಹಿಸುಕಿ ಒಂದೆಡೆ ಇಟ್ಟುಕೊಳ್ಳಬೇಕು.

* ಈಗ ಬಾಣಲೆಗೆ ಎಣ್ಣೆ ಹಾಕಿ ಕಾದ ನಂತರ ಜೀರಿಗೆ, ಪಲಾವ್ ಎಲೆ ಮತ್ತು ಇಂಗನ್ನು ಹುರಿದುಕೊಳ್ಳಬೇಕು. ನಂತರ ಈರುಳ್ಳಿ ಹಾಕಿ ಕೆಂಪಗಾಗುವ ತನಕ ಹುರಿಯಬೇಕು.

* ಈ ಮಿಶ್ರಣಕ್ಕೆ ಶುಂಠಿ, ಹಸಿರು ಮೆಣಸಿನಕಾಯಿ ಹಾಕಿ ಚೆನ್ನಾಗಿ ತಿರುಗಿಸಿ ಟೊಮೆಟೊ ಬೆರೆಸಿ ಮೇಲೆ ರುಚಿಗೆ ತಕ್ಕಷ್ಟು ಉಪ್ಪು ಹಾಕಬೇಕು. 2 ನಿಮಿಷ ಟೊಮೆಟೊ ಬೇಯಿಸಿದ ನಂತರ ಕಲೆಸಿಟ್ಟಿದ್ದ ಬದನೆಕಾಯಿಯನ್ನು ಇದಕ್ಕೆ ಬೆರೆಸಿ ಜೀರಿಗೆ ಪುಡಿ, ಧನಿಯಾ ಪುಡಿ, ಕೆಂಪುಮೆಣಸಿನ ಪುಡಿ ಬೆರೆಸಿ ಚೆನ್ನಾಗಿ ತಿರುಗಿಸಬೇಕು.

* ಈ ಮಿಶ್ರಣ ಸುಮಾರು 7 ನಿಮಿಷ ಚೆನ್ನಾಗಿ ಬೆಂದ ನಂತರ ಕೆಳಗಿಳಿಸಿ ಕತ್ತರಿಸಿದ್ದ ಕೊತ್ತಂಬರಿ ಹಾಕಬೇಕು. ಆದರೆ ಇದು ತಳ ಹಿಡಿಯದಂತೆ ಎಚ್ಚರಿಕೆವಹಿಸಬೇಕು. ಈಗ ಬದನೆಕಾಯಿ ಕರಿ ತಿನ್ನಲು ರೆಡಿ.