ಚಳಿಗಾಲದಲ್ಲಿ ಘಂ ಎನ್ನುವ ದಮ್ ಆಲೂ ಇರಲಿ

ದಮ್ ಆಲೂಗೆ ಏನೇನು ಬೇಕು?: 10-15 ಸಣ್ಣ ಆಲೂಗಡ್ಡೆಗಳು, 2 ಈರುಳ್ಳಿ (1 ಕತ್ತರಿಸಿರಬೇಕು, ಮತ್ತೊಂದು ಪೇಸ್ಟ್ ಗೆ), 1 ಚಮಚ ಶುಂಠಿ-ಬೆಳ್ಳುಳ್ಳಿ ಪೇಸ್ಟ್, 1 ಟೊಮೆಟೊ, 1 ಚಮಚ ಜೀರಿಗೆ, ಸ್ವಲ್ಪ ಅರಿಶಿಣ, 1 ಚಮಚ ಕೆಂಪುಮೆಣಸಿನ ಪುಡಿ, 1 ಚಮಚ ಜೀರಿಗೆ ಪುಡಿ, 1 ಚಮಚ ಧನ್ಯಾ ಪುಡಿ, 4 ಹಸಿರು ಮೆಣಸಿನಕಾಯಿ, 2 ಪಲಾವ್ ಎಲೆ, ಗರಂ ಮಸಾಲ, 1 ಚಮಚ ತುಪ್ಪ, ಎಣ್ಣೆ, ಉಪ್ಪು, ಕೊತ್ತಂಬರಿ

ದಮ್ ಆಲೂ ಮಾಡುವುದು ಹೇಗೆ?
* ಕುಕ್ಕರಿನಲ್ಲಿ ಆಲೂಗಡ್ಡೆ ಹಾಕಿ 2 ವಿಸಲ್ ಕೂಗಿಸಬೇಕು ಅಥವಾ ಪಾತ್ರೆಯಲ್ಲಿ 10 ನಿಮಿಷ ಬೇಯಿಸಿದರೂ ಆಯಿತು.

* ಒಂದು ಬಟ್ಟಲಿನಲ್ಲಿ ಗರಂ ಮಸಾಲೆಯನ್ನು ಸ್ವಲ್ಪ ನೀರಿನೊಂದಿಗೆ ಕಲೆಸಿಕೊಳ್ಳಬೇಕು.

* ಈರುಳ್ಳಿ, ಬೆಳ್ಳುಳ್ಳಿ, ಶುಂಠಿಯನ್ನು ಪೇಸ್ಟ್ ಮಾಡಿಕೊಂಡು, ಟೊಮೆಟೊವನ್ನು ಪ್ರತ್ಯೇಕವಾಗಿ ಕಿವುಚಿಟ್ಟಿಕೊಳ್ಳಬೇಕು.

* ಈಗ ಬಾಣಲೆಗೆ ಎಣ್ಣೆ ಹಾಕಿ ಅದು ಕಾದ ನಂತರ ಅದಕ್ಕೆ ಬೇಯಿಸಿದ ಆಲೂಗಡ್ಡೆ ಹಾಕಿ ಸ್ವಲ್ಪ ಕೆಂಪಗಾಗುವ ತನಕ ಹುರಿದುಕೊಂಡು ಒಂದೆಡೆ ಇಡಬೇಕು.

* ಅದೇ ಬಾಣಲೆಗೆ ಮತ್ತೆ ಸ್ವಲ್ಪ ಎಣ್ಣೆ ಹಾಕಿ ಅದರಲ್ಲಿ ಪಲಾವ್ ಎಲೆ, ಜೀರಿಗೆ ಹಾಕಿ, ಕತ್ತರಿಸಿದ ಈರುಳ್ಳಿಯನ್ನು ಕೆಂಪಗೆ ಹುರಿದುಕೊಳ್ಳಬೇಕು ನಂತರ ಈರುಳ್ಳಿ, ಬೆಳ್ಳುಳ್ಳಿ ಮತ್ತು ಶುಂಠಿ ಪೇಸ್ಟನ್ನು ಸೇರಿಸಿ 2 ನಿಮಿಷ ತಿರುಗಿಸಿ ಕಿವುಚಿದ ಟೊಮೆಟೊ ಬೆರೆಸಬೇಕು.

* ಇದರ ಮೇಲೆ ಉಪ್ಪನ್ನು ಉದುರಿಸಬೇಕು. ಆಗ ಟೊಮೆಟೊ ಬೇಗ ಬೇಯುತ್ತದೆ.

* ಈಗ ಮೇಲೆ ತಿಳಿಸಿದ ಪುಡಿಗಳನ್ನು ಹಾಕಿ ಚೆನ್ನಾಗಿ ತಿರುಗಿಸಬೇಕು. ಈ ಮಿಶ್ರಣ 2 ನಿಮಿಷ ಬೆಂದ ನಂತರ ತುಂಬಾ ಒಣಗಿದಂತೆ ಕಾಣದಿರಲು ಸ್ವಲ್ಪ ನೀರು ಹಾಕಬೇಕು.

* ಆಲೂಗಡ್ಡೆಯನ್ನು ಸ್ವಲ್ಪ ಸೀಳಿ ಅದನ್ನು ಬಾಣಲೆಯಲ್ಲಿ ತಯಾರಿಸಿದ ಗ್ರೇವಿಯೊಂದಿಗೆ ಬೆರೆಸಬೇಕು. ನಂತರ ಉದ್ದವಾಗಿ ಕತ್ತರಿಸಿದ ಹಸಿರು ಮೆಣಸಿನಕಾಯಿ ಬೆರೆಸಿ 3-4 ನಿಮಿಷ ನಿರಂತರವಾಗಿ ಹುರಿಯುತ್ತಿರಬೇಕು.

* 1 1/2 ಕಪ್ ನೀರು ಹಾಕಿ ಮುಚ್ಚುಳವನ್ನು ಮುಚ್ಚಿ ಕಡಿಮೆ ಉರಿಯಲ್ಲಿ 7-8 ನಿಮಿಷ ಬೇಯಿಸಬೇಕು.

* ಒಲೆಯಿಂದ ಕೆಳಗೆ ಇಳಿಸುವ ಮುನ್ನ ತುಪ್ಪ ಹಾಕಿ ನೀರಿನಲ್ಲಿ ಕಲೆಸಿದ್ದ ಗರಂಮಸಾಲವನ್ನು ಹಾಕಿ ಚೆನ್ನಾಗಿ ತಿರುಗಿಸಬೇಕು.

ಕೊನೆಗೆ ಇದರ ಮೇಲೆ ಚಿಕ್ಕದಾಗಿ ಕತ್ತರಿಸಿದ ಕೊತ್ತಂಬರಿ ಉದುರಿಸಿದರೆ ರುಚಿರುಚಿಯಾದ ದಮ್ ಆಲೂ ತಿನ್ನಲು ಸಿದ್ಧ.