ಹಸಿವು ಹೆಚ್ಚಿಸುವ ದಂಟಿನ ಸೊಪ್ಪಿನ ಪಲ್ಯ

Palya

oi-Staff

Published: Thursday, October 8, 2009, 18:44 [IST]

ಹೆಚ್ಚು ನಾರಿನಂಶ ಹೊಂದಿರುವ ದಂಟಿನ ಸೊಪ್ಪಿನ ಪಲ್ಯ ಊಟದ ರುಚಿಯನ್ನು ಹೆಚ್ಚಿಸುತ್ತದೆ ಮಾತ್ರವಲ್ಲ ಆರೋಗ್ಯಕ್ಕೂ ಹಿತಕರ. ದಂಟಿನ ಸೊಪ್ಪಿನ ಪಲ್ಯವನ್ನು ಬಿಸಿಬಿಸಿ ಅನ್ನದೊಂದಿಗೆ ತುಪ್ಪ ಬೆರೆಸಿ ತಿಂದರೆ ನಿಮಗೆ ಗೊತ್ತಿಲ್ಲದಂತೆಯೇ ಎರಡು ತುತ್ತು ಜಾಸ್ತಿಯೇ ಹೊಟ್ಟೆಗಿಳಿದಿರುತ್ತದೆ. ಚಪಾತಿ, ರೊಟ್ಟಿಯೊಡನೆಯೂ ದಂಟಿನ ಸೊಪ್ಪಿನ ಪಲ್ಯವನ್ನು ತಿನ್ನಬಹುದು.

* ಭಾರತಿ ಎಚ್ಎಸ್, ಬೆಂಗಳೂರು

ಬೇಕಾಗುವ ಪದಾರ್ಥಗಳು

ದಂಟಿನ ಸೊಪ್ಪು ಒಂದು ಬಟ್ಟಲು
ಬೆಳ್ಳುಳ್ಳಿ ಆರು ಎಸಳು (ಬೇಕಾದರೆ)
ಎಣ್ಣೆ ಮೂರು ಚಮಚ
ಸಾಸಿವೆ ಅರ್ಧ ಚಮಚ
ಹಸಿ ಮೆಣಸಿನ ಕಾಯಿ ಮೂರು
ಈರುಳ್ಳಿ ಒಂದು ಹೆಚ್ಚಿದ್ದು
ಕರಿಬೇವು ಸ್ವಲ್ಪ
ಕೊತ್ತಂಬರಿ ಸ್ವಲ್ಪ
ತುರಿದ ತೆಂಗಿನಕಾಯಿ ಅರ್ಧ ಬಟ್ಟಲು
ಸಕ್ಕರೆ ಅರ್ಧ ಚಮಚ

ಮಾಡುವ ವಿಧಾನ

* ಬಾಣಲೆಗೆ ಎಣ್ಣೆ ಹಾಕಿ ಸಾಸಿವೆ, ಕರಿಬೇವು, ಬೆಳ್ಳುಳ್ಳಿ, ಹಸಿಮೆಣಸಿನಕಾಯಿ, ಈರುಳ್ಳಿ ಹಾಕಿ ಹುರಿಯಿರಿ.
* ಆಮೇಲೆ ಹೆಚ್ಚಿದ ದಂಟಿನ ಸೊಪ್ಪು, ಸಕ್ಕರೆ ಹಾಕಿ ಹುರಿಯಿರಿ.
* ಸಕ್ಕರೆ ಹಾಕುವುದರಿಂದ ಸೊಪ್ಪಿನ ಬಣ್ಣ ಹಾಳಾಗುವುದಿಲ್ಲ.
* ದಂಟಿನ ಸೊಪ್ಪು ಬೆಂದ ಮೇಲೆ ರುಚಿಗೆ ತಕ್ಕಷ್ಟು ಉಪ್ಪುನ್ನು ಹಾಕಿ ಕೈಯಾಡಿಸಿ.
* ಕಾಯಿತುರಿ, ಕೊತ್ತಂಬರಿ ಸೊಪ್ಪು ಹಾಕಿ ಮಿಕ್ಸ್ ಮಾಡಿ.

ದಂಟಿನ ಸೊಪ್ಪಿಗೆ ತೊಗರಿ ಬೇಳೆ ಕೂಡ ಹಾಕಿ ಮಾಡಬಹುದು. ಬೇಳೆ ಹಾಕಿದರೆ ಪಲ್ಯ ಗಟ್ಟಿಯಾಗುತ್ತದೆ. ವಿಧಾನ ಕೂಡ ಮೇಲಿನಂತೆಯೇ. ಒಗ್ಗರಣೆಗೆ ಸೊಪ್ಪು ಹಾಕುವ ಮೊದಲು ಕುಕ್ಕರಿನಲ್ಲಿ ಬೇಯಿಸಿದ ಬೇಳೆಯನ್ನು ಹಾಕಿ ನಂತರ ಸೊಪ್ಪು ಹಾಕಬೇಕು.