For Quick Alerts
ALLOW NOTIFICATIONS  
For Daily Alerts

ದೊಡ್ಮೆಣಸಿನಕಾಯಿ ಮೊಸರು ಮಸಾಲಾ ರೆಸಿಪಿ

By * ಕುಮಾರಿ ಗೀತಾ, ಬೆಂಗಳೂರು
|

ಕ್ಯಾಪ್ಸಿಕಂ ಬಜ್ಜಿ ಯಾರು ತಾನೇ ತಿಂದಿಲ್ಲ? ಮೆಣಸಿನಕಾಯಿ ಎಂದರೆ ಮುಖ ಸಿಂಡರಿಸುವ ಸಿಹಿ ನಾಲಗೆಯ ಮಂದಿಯೂ ಕ್ಯಾಪ್ಸಿಕಂ ಕುರಿತು ಮೆದು ಧೋರಣೆ ವ್ಯಕ್ತಪಡಿಸುತ್ತಾರೆ. ಕ್ಯಾಪ್ಸಿಕಂ ಪಲ್ಯ ಕೂಡ ಭಲೇ ರುಚಿ! ಅಂದಹಾಗೆ, ನಾವೀಗ ಮಾಡಹೊರಟಿರುವುದು- ಪಲ್ಯವೂ ಅಲ್ಲ , ಬೋಂಡಾ ಕೂಡ ಅಲ್ಲ . ಇದು ಕ್ಯಾಪ್ಸಿಕಂ ಮೊಸರು ಮಸಾಲಾ! ಪೂರಿ ಹಾಗೂ ಪರೋಟಾಗಳಿಗೆ ಕ್ಯಾಪ್ಸಿಕಂ ಮೊಸರು ಮಸಾಲಾ ತುಂಬಾ ರುಚಿ. ಬಿಸಿಯಾಗಿರುವಾಗಲೇ ಬಳಸುವುದು ಒಳ್ಳೆಯದು. ಮಾಡಲು ಸಿದ್ಧ ತಾನೇ?

ಬೇಕಾಗುವ ಸಾಮಗ್ರಿಗಳು :

1. ಸಣ್ಣಗೆ ಕತ್ತರಿಸಿದ ಈರುಳ್ಳಿ- 1 ಕಪ್‌

2. ಕತ್ತರಿಸಿದ ಟೊಮಾಟೊ- 1 ಕಪ್‌

3. ಕತ್ತರಿಸಿದ ದೊಣ್ಣೆ(ದೊಡ್ಡ) ಮೆಣಸಿನಕಾಯಿ (ಕ್ಯಾಪ್ಸಿಕಂ)- 1 ಕಪ್‌

4. 2-3 ಟೀ ಸ್ಪೂನ್‌ ರೀಫೈನ್ಡ್‌ ಎಣ್ಣೆ

5. ಜೀರಿಗೆ- 1 ಟೀ ಸ್ಪೂನ್‌

6. ಉದ್ದುದ್ದ ಕತ್ತರಿಸಿದ ಹಸಿ ಮೆಣಸಿನಕಾಯಿ- 3

7. ನಾಲ್ಕಾರು ಎಸಳು ಕರಿಬೇವಿನ ಸೊಪ್ಪು

8. ರುಚಿಗೆ ತಕ್ಕಷ್ಟು ಉಪ್ಪು

9. ಅರಿಷಿಣ ಪುಡಿ

10. 1 ಟೀ ಸ್ಪೂನ್‌ ಖಾರದ ಪುಡಿ (ಒಣ ಮೆಣಸಿನಕಾಯಿ ಪುಡಿ)

11. 1 ಟೀ ಸ್ಪೂನ್‌ ಕೊತ್ತಂಬರಿ ಬೀಜದ ಪುಡಿ

12. ಅರ್ಧ ಟೀ ಸ್ಪೂನ್‌ ಗರಂ ಮಸಾಲಾ

13. ಗಟ್ಟಿಯಾಗಿರುವ ಸಿಹಿ ಮೊಸರು- 100 ಮಿಲೀ

14. ನೀರು- 1 ಲೋಟ

ಮಾಡುವ ವಿಧಾನ :

ಮೊದಲಿಗೆ- ಅಗಲ ತಳದ ಪಾತ್ರೆಯಾಂದರಲ್ಲಿ 2-3 ಟೀ ಸ್ಪೂನ್‌ ಎಣ್ಣೆ ಹಾಕಿ. ಪಾತ್ರೆಯನ್ನು ಸ್ಟವ್‌ ಮೇಲಿಡಿ. ಮಧ್ಯಮ ಉರಿಯಲ್ಲಿ ಜೀರಿಗೆಯನ್ನು ಹುರಿದುಕೊಳ್ಳಿ. ಜೀರಿಗೆ ಹುರಿಯಲು 1 ನಿಮಿಷ ಸಾಕು.

ಅದೇ ಪಾತ್ರೆಗೆ- ಕತ್ತರಿಸಿಟ್ಟುಕೊಂಡ ಈರುಳ್ಳಿ ತುಂಡುಗಳು, ತೊಳೆದಿಟ್ಟುಕೊಂಡ ಕರಿಬೇವಿನ ಎಲೆ, ಹಸಿ ಮೆಣಸಿನಕಾಯಿ ತುಂಡುಗಳನ್ನು ಹಾಕಿ. ಈರುಳ್ಳಿ ತುಂಡುಗಳು ಹೊಂಬಣ್ಣಕ್ಕೆ ಬರುವವರೆಗೆ ಬೇಯಲಿ. ಆನಂತರ ಕತ್ತರಿಸಿ ಸಿದ್ಧಪಡಿಸಿಕೊಂಡ ಟೊಮೊಟೊ ಹಾಗೂ ದೊಡ್ಡ ಮೆಣಸಿನಕಾಯಿ ತುಂಡುಗಳನ್ನು ಪಾತ್ರೆಗೆ ಸೇರಿಸಿ. ಚೆನ್ನಾಗಿ ಕೈಯಾಡಿಸಿ.

1 ಲೋಟ ನೀರನ್ನು ಪಾತ್ರೆಗೆ ಸೇರಿಸಿ, ಪ್ಲೇಟ್‌ ಮುಚ್ಚಿ. ಪಾತ್ರೆಯಲ್ಲಿನ ಪದಾರ್ಥಗಳು ಚೆನ್ನಾಗಿ ಕುದಿಯಲಿ. ತರಕಾರಿ ಚೆನ್ನಾಗಿ ಬೆಂದ ನಂತರ ಉಪ್ಪು, ಅರಿಷಿಣ ಹಾಗೂ ಕೊತ್ತಂಬರಿ ಪುಡಿ ಸೇರಿಸುವುದು. ಮಿಶ್ರಣವನ್ನು ಚೆನ್ನಾಗಿ ಕಲಕಿದ ನಂತರ ಮತ್ತೆ 5 ನಿಮಿಷ ಬೇಯಿಸುವುದು. ಈಗ ಸಿಹಿ ಮೊಸರು ಸೇರಿಸುವ ಸರದಿ. ಮೊಸರು ಸೇರಿಸಿದ ನಂತರದ ಮಿಶ್ರಣವನ್ನು ಮತ್ತೆ ಸ್ಟವ್‌ ಮೇಲಿಡಿ. ಉರಿ ಮಧ್ಯಮವಾಗಿರಲಿ. ಮೊಸರಿನಲ್ಲಿನ ನೀರಿನಂಶ ಸಂಪೂರ್ಣ ಆವಿಯಾಗುವ ತನಕ ಕುದಿಸುವುದು. ಒಲೆಯಿಂದ ಕೆಳಗಿಳಿಸುವ ಮುನ್ನ - ಗರಂ ಮಸಾಲಾ ಸೇರಿಸುವುದು.

ಪೂರಿ ಹಾಗೂ ಪರೋಟಾಗಳಿಗೆ ಕ್ಯಾಪ್ಸಿಕಂ ಮೊಸರು ಮಸಾಲಾ ಸೂಪರ್ ಕಾಂಬಿನೇಷನ್. ಬಿಸಿಯಾಗಿರುವಾಗಲೇ ಬಳಸುವುದು ಒಳ್ಳೆಯದು. ಹಸಿ ಈರುಳ್ಳಿ ಹಾಗೂ ಟೊಮೊಟೊ ತುಂಡುಗಳನ್ನು ದೊಡ್ಮೆಣಸಿನಕಾಯಿ ಮೊಸಲು ಮಸಾಲಾದ ಮೇಲೆ ಹರಡಬಹುದು.

Story first published: Friday, September 24, 2010, 11:55 [IST]
X