ಥಟ್ ಅಂತ ರೆಡಿಯಾಗುತ್ತೆ ಕ್ಯಾಪ್ಸಿಕಂ ಮಸಾಲ

Palya

oi-Sumalatha N

By Sumalatha N

Published: Tuesday, September 6, 2011, 12:53 [IST]

ದುಂಡು ಮೆಣಸಿನ ಕಾಯಿಯನ್ನು ಅಡುಗೆಯಲ್ಲಿ ತರಕಾರಿಗಳೊಂದಿಗೆ ಬಳಸುವುದು ರೂಢಿ. ಆದರೆ ಕ್ಯಾಪ್ಸಿಕಂನಿಂದಲೇ ದಿಢೀರ್ ಅಂತ ಪಲ್ಯವನ್ನು ತಯಾರಿಸಬಹುದು. ಚಪಾತಿ, ಪೂರಿ, ದೋಸೆ ಮಾತ್ರವಲ್ಲದೆ ಅನ್ನದೊಂದಿಗೂ ಈ ಕ್ಯಾಪ್ಸಿಕಂ ಮಸಾಲ ಒಳ್ಳೆ ಕಾಂಬಿನೇಶನ್. ಕ್ಯಾಪ್ಸಿಕಂ ಮಸಾಲ ತಯಾರಿಸುವುದು ಹೇಗೆ ಎಂದು ನೋಡಿ.

ಕ್ಯಾಪ್ಸಿಕಂ ಮಸಾಲಾಗೆ ಬೇಕಾಗುವ ಸಾಮಾಗ್ರಿಗಳು:
* 1 ಕ್ಯಾಪ್ಸಿಕಂ
* 1 ಟೊಮೊಟೊ, 1 ಈರುಳ್ಳಿ
* 1/2 ಕಪ್ ತೆಂಗಿನ ತುರಿ
* 1/4 ಕಪ್ ಕಡಲೆಬೀಜ
* 4 ಮೆಣಸು
* 2 ಲವಂಗ, 1/2 ಇಂಚು ಚೆಕ್ಕೆ
* ಕರಿಬೇವು, ಕೊತ್ತಂಬರಿ
* ಉಪ್ಪು, ಎಣ್ಣೆ, ಸಾಸಿವೆ

ಮಸಾಲಾ ತಯಾರಿಸುವ ವಿಧಾನ:
* ಮೊದಲು ದುಂಡು ಮೆಣಸಿನ ಕಾಯಿ, ಟೊಮೊಟೊ ಮತ್ತು ಈರುಳ್ಳಿಯನ್ನು ನಿಮಗೆ ಬೇಕಾದ ಆಕಾರದಲ್ಲಿ ಕತ್ತರಿಸಿಕೊಳ್ಳಬೇಕು.
* ಬಾಣಲೆಯಲ್ಲಿ ಎಣ್ಣೆ ಕಾಯಿಸಿ ಅದಕ್ಕೆ ಕರಿಬೇವು, ಕಡಲೆಬೀಜ, ಮೆಣಸು, ಚಕ್ಕೆ, ಲವಂಗ, ಕೊತ್ತಂಬರಿ ಮತ್ತು ತೆಂಗಿನತುರಿಯನ್ನು ಹಾಕಿ ಕೆಂಪಗಾಗುವ ತನಕ ಹುರಿದು ನುಣ್ಣಗೆ ರುಬ್ಬಿಕೊಳ್ಳಬೇಕು.
* ಮತ್ತೆ ಬಾಣಲೆಗೆ ಎಣ್ಣೆ ಕಾಯಿಸಿ ಅದಕ್ಕೆ ಸಾಸಿವೆ, ಈರುಳ್ಳಿ ಹಾಕಿ ಕೆಂಪಗಾಗು ತನಕ ಹುರಿದು ನಂತರ ಕ್ಯಾಪ್ಸಿಕಂ ಹಾಕಬೇಕು. ಇದಕ್ಕೆ ಟೊಮೊಟೊ ಸೇರಿಸಿ ಚೆನ್ನಾಗಿ ತಿರುಗಿಸಬೇಕು. ಟೊಮೊಟೊ ಮೆತ್ತಗಾದಂತೆ ಕಂಡಾಗ ಅದಕ್ಕೆ ರುಬ್ಬಿಟ್ಟಿದ್ದ ಮಸಾಲೆ ಬೆರೆಸಿ ಸ್ವಲ್ಪ ಎಣ್ಣೆ ಹಾಕಬೇಕು.
* ಈ ಮಿಶ್ರಣಕ್ಕೆ ರುಚಿಗೆ ತಕ್ಕಂತೆ ಉಪ್ಪು ಬೆರೆಸಿ ಅರ್ಧ ಕಪ್ ನೀರು ಸೇರಿಸಿ ಕುದಿಸಬೇಕು. ಕೊನೆಗೆ ಸಣ್ಣಗೆ ಹೆಚ್ಚಿದ ಕೊತ್ತಂಬರಿ ಸೊಪ್ಪನ್ನು ಉದುರಿಸಬೇಕು. ಈಗ ಕ್ಯಾಪ್ಸಿಕಂ ಮಸಾಲ ತಿನ್ನೋದಕ್ಕೆ ತಯಾರಾಗಿದೆ. ಚಪಾತಿ, ರೋಟಿ, ದೋಸೆ, ಅನ್ನ ಯಾವುದಕ್ಕಾದರೂ ಸರಿ, ಕ್ಯಾಪ್ಸಿಕಂ ಮಸಾಲಾ ಬೆರೆಸಿ ತಿನ್ನಬಹುದು.