ಬಿಸಿಬಿಸಿ ಬೇಳೆ ದಮ್ ಬಿರಿಯಾನಿ ರೆಸಿಪಿ

Non Vegetarian

oi-Sumalatha

By Sumalatha

Published: Thursday, December 29, 2011, 11:55 [IST]

ನೀವು ಮಟನ್ ಅಥವಾ ಚಿಕನ್ ಬಿರಿಯಾನಿ ಬಗ್ಗೆ ಕೇಳಿರಬಹುದು. ಅದರಲ್ಲೂ ಹೈದರಾಬಾದ್ ದಮ್ ಬಿರಿಯಾನಿಯನ್ನು ಕೇಳೇ ಇರುತ್ತೀರ. ಆದ್ರೆ ಬೇಳೆ ಬಿರಿಯಾನಿ ಬಗ್ಗೆ ಎಂದಾದರೂ ಕೇಳಿದ್ದೀರಾ?
ಹಾಗಾದರೆ ನಿಮಗೆಂದೇ ಇಲ್ಲಿದೆ ಬೇಳೆ ಬಿರಿಯಾನಿ ರೆಸಿಪಿ. ರುಚಿ ರುಚಿಯಾದ ಮಸಾಲೆ ಭರಿತ ಈ ಬೇಳೆ ಬಿರಿಯಾನಿನ್ನಂತೂ ನಿಮ್ಮ ನಾಲಿಗೆ ಚಪ್ಪರಿಸುವಂತೆ ಮಾಡುವುದರಲ್ಲಿ ಸಂಶಯವೇ ಇಲ್ಲ. ಹಾಗಾದ್ರೆ ಬೇಳೆ ಬಿರಿಯಾನಿಯನ್ನು ಮಾಡೋದು ಹೇಗೆ ಎಂದು ಯೋಚಿಸುತ್ತಿದ್ದೀರಾ? ಇಲ್ಲಿದೆ ಅದರ ವಿವರ.

ಬೇಳೆ ಬಿರಿಯಾನಿಗೆ ಬೇಕಾಗುವ ಪದಾರ್ಥ:
* 2 ಕಪ್ ಅಕ್ಕಿ
* 1 ಕಪ್ ತೊಗರಿ ಬೇಳೆ
* 2 ಈರುಳ್ಳಿ
* 1 ಚಮಚ ಜೀರಿಗೆ
* 1 ಚಮಚ ಅರಿಶಿಣ
* 1 ಚಮಚ ಕೆಂಪು ಮೆಣಸಿನ ಪುಡಿ
* ತಲಾ 1 ಚಮಚ ಶುಂಠಿ, ಬೆಳ್ಳುಳ್ಳಿ ಮತ್ತು ಹಸಿರು ಮೆಣಸಿನಕಾಯಿ ಪೇಸ್ಟ್
* 2 ಚಮಚ ಬೆಣ್ಣೆ
* 1 ದೊಡ್ಡ ಟೊಮೆಟೊ
* 2 ಚಿಕ್ಕ ಈರುಳ್ಳಿ (ಕೆಂಪಗಾಗುವ ತನಕ ಹುರಿದಿರಬೇಕು)
* 1 ಆಲೂಗಡ್ಡೆ (ಹುರಿದಿದ್ದು)
* ಉಪ್ಪು
* 2 ಚೆಕ್ಕೆ, 2 ಏಲಕ್ಕಿ, 2 ಪೀಸ್ ಚೆಕ್ಕೆ, 4 ಮೆಣಸು ಸೇರಿಸಿ ತಯಾರಿಸಿದ ಪುಡಿ
* 1 ಚಮಚ ಗರಂ ಮಸಾಲೆ ಪುಡಿ
* ಕೊತ್ತಂಬರಿ, ಪುದೀನಾ
* 1 ಚಮಚ ತುಪ್ಪ

ಬೇಳೆ ಬಿರಿಯಾನಿ ತಯಾರಿಸುವ ವಿಧಾನ:
* ಅಕ್ಕಿಯನ್ನು ಒಂದು ಗಂಟೆ ನೆನೆಸಿ ಅರ್ಧ ಬೇಯಿಸಿರಬೇಕು. ಬೇಳೆಯನ್ನು ಕೂಡ 2 ಗಂಟೆ ನೆನೆಸಿ ಅರಿಶಿಣದೊಂದಿಗೆ ಅರ್ಧ ಬೇಯಿಸಬೇಕು.
* ಒಂದು ಬಾಣಲೆಯಲ್ಲಿ ತುಪ್ಪವನ್ನು ಕಾಯಿಸಿ ಅದರಲ್ಲಿ ಜೀರಿಗೆಯನ್ನು ಹುರಿಯಬೇಕು. ಜೀರಿಗೆ ಬಣ್ಣ ಬದಲಿಸುತ್ತಿದ್ದಂತೆ ಕತ್ತರಿಸಿದ ಈರುಳ್ಳಿಯನ್ನು ಹಾಕಿ ಕೆಲ ನಿಮಿಷ ಹುರಿಯಬೇಕು. ನಂತರ ಕೆಂಪು ಮೆಣಸಿನ ಪುಡಿ, ಅರಿಶಿಣ, ಶುಂಠಿ, ಬೆಳ್ಳುಳ್ಳಿ ಮತ್ತು ಹಸಿರು ಮೆಣಸಿನ ಕಾಯಿ ಪೇಸ್ಟ್ ಹಾಕಿ ಕೆಲವು ನಿಮಿಷ ಹುರಿದುಕೊಳ್ಳಬೇಕು.
* ಈಗ ಕತ್ತರಿಸಿದ ಟೊಮೆಟೊ ಹಾಕಿ ನೀರಿನಂಶ ಹೋಗುವವರೆಗೂ ಹುರಿದು ಬೇಯಿಸಿದ ಬೇಳೆಯನ್ನು ಇದಕ್ಕೆ ಬೆರೆಸಬೇಕು. ಹುರಿದಿಟ್ಟುಕೊಂಡಿದ್ದ ಈರುಳ್ಳಿ, ಗರಂ ಮಸಾಲಾ ಪುಡಿ, ಚೆಕ್ಕೆ, ಲವಂಗ, ಮೆಣಸಿನ ಪುಡಿ, ಆಲೂಗಡ್ಡೆ, ಉಪ್ಪನ್ನು ಹಾಕಿ ಚೆನ್ನಾಗಿ ತಿರುಗಿಸಬೇಕು.
* ಒಂದು ದೊಡ್ಡ ಪಾತ್ರೆಯಲ್ಲಿ ಸ್ವಲ್ಪ ಹುರಿದಿಟ್ಟುಕೊಂಡಿದ್ದ ಮಿಶ್ರಣ ಹಾಕಿ ಅದರ ಮೇಲೆ ಅರ್ಧ ಬೇಯಿಸಿದ ಅನ್ನ ಸ್ವಲ್ಪ ಹಾಕಿ ಕತ್ತರಿಸಿದ ಕೊತ್ತಂಬರಿ ಪುದೀನಾ ಸೊಪ್ಪನ್ನು ಉದುರಿಸಬೇಕು. ಮೇಲೆ ಸ್ವಲ್ಪ ಬೆಣ್ಣೆ ಹಾಕಿ ಗರಂ ಮಸಾಲಾ ಪುಡಿಯನ್ನು ಉದುರಿಸಬೇಕು. ಇದೇ ರೀತಿ ಎರಡೂ ಮಿಶ್ರಣಗಳನ್ನು ಬೆರೆಸುತ್ತಾ ಕೊನೆಯಲ್ಲಿ ಮುಚ್ಚುಳ ಮುಚ್ಚಿ ಸಣ್ಣ ಉರಿಯಲ್ಲಿ ದಮ್ ಆಗುವವರೆಗೂ ಬಿಡಬೇಕು. ಈಗ ಬಿಸಿ ಬಿಸಿ ಬೇಳೆ ಬಿರಿಯಾನಿ ತಿನ್ನಲು ತಯಾರಾಗಿದೆ.