ಮಂಗಳೂರು ಸ್ಟೈಲ್ ರುಚಿ ರುಚಿಯಾದ ಸೌತೆಕಾಯಿ ಹುಳಿ ಮಾಡಿ! ಸುಲಭ ವಿಧಾನ ಇಲ್ಲಿದೆ

ಇದು ಮಂಗಳೂರು ಸ್ಟೈಲ್ ಸೌತೆಕಾಯಿ ಹುಳಿ. ಮನೆಯಲ್ಲೇ ಒಮ್ಮೆ ಟ್ರೈ ಮಾಡಿ ನೋಡಿ, ಸಖತ್ ಟೇಸ್ಟಿ. ಹೌದು, ಮಂಗಳೂರು ಶೈಲಿಯ ಸೌತೆಕಾಯಿ ಹುಳಿ (Mangaluru Style Cucumber Huli) ದಕ್ಷಿಣ ಭಾರತದ, ವಿಶೇಷವಾಗಿ ಕರಾವಳಿ ಕರ್ನಾಟಕದ ಅಡುಗೆ ಸಂಪ್ರದಾಯದಲ್ಲಿ ಮಹತ್ವದ ಸ್ಥಾನ ಪಡೆದಿದೆ. ಈ ಹುಳಿಯು ಸೌತೆಕಾಯಿಯನ್ನು ಪ್ರಮುಖವಾಗಿ ಬಳಸಿ ತಯಾರಿಸಲಾಗುವ ಒಂದು ವಿಶಿಷ್ಟ ಸಾಂಬಾರ್ ಆಗಿದ್ದು, ಅಲ್ಲಿನ ಸಾಂಪ್ರದಾಯಿಕ ಅಡುಗೆಯ ಭಾಗವಾಗಿದೆ. ನಾವಿಂದು ಈ ಲೇಖನದಲ್ಲಿ ದಕ್ಷಿಣ ಕನ್ನಡದ ಜನಪ್ರಿಯ ಸೌತೆಕಾಯಿ ಹುಳಿ ತಯಾರಿಸುವ ವಿಧಾನದ ಬಗ್ಗೆ ತಿಳಿಸಿದ್ದೇವೆ.

ಸೌತೆಕಾಯಿ ಹುಳಿ ಮಸಾಲೆಯುಕ್ತವಾಗಿದ್ದು, ಅನ್ನದ ಜೊತೆ ಸವಿಯಲು ಅತ್ಯುತ್ತಮ ಆಯ್ಕೆಯಾಗಿದೆ. ಪ್ರಾದೇಶಿಕ ಭಕ್ಷ್ಯಗಳಿಗೆ ಹೆಸರುವಾಸಿಯಾದ ಮಂಗಳೂರು ಅಡುಗೆಯ ಭಾಗವಾಗಿ, ಈ ಸೌತೆಕಾಯಿ ಹುಳಿ ತನ್ನ ವಿಶಿಷ್ಟ ರುಚಿ ಮತ್ತು ಆರೋಗ್ಯಕರ ಅಂಶಗಳಿಗಾಗಿ ಜನಪ್ರಿಯವಾಗಿದೆ. ಇದು ಸಾಮಾನ್ಯವಾಗಿ ಊಟದ ಒಂದು ಪ್ರಮುಖ ಭಾಗವಾಗಿ ಬಳಕೆಯಾಗುತ್ತದೆ. ಇದನ್ನು ತಯಾರಿಸಲು ಅಗತ್ಯವಿರುವ ಸಾಮಗ್ರಿಗಳು, ಒಗ್ಗರಣೆ ವಿಧಾನ ಮತ್ತು ಅಂತಿಮ ತಯಾರಿಯ ಸಂಪೂರ್ಣ ಪ್ರಕ್ರಿಯೆಯನ್ನು (Mangalore Style SoutheKayi Huli) ಈ ಲೇಖನದಲ್ಲಿ ವಿವರಿಸಲಾಗಿದೆ.

ಮಂಗಳೂರು ಸೌತೆಕಾಯಿ ಹುಳಿ ತಯಾರಿಸಲು ಬೇಕಾಗುವ ಸಾಮಗ್ರಿಗಳು

• ಮಂಗಳೂರು ಸೌತೆಕಾಯಿ (ಮಧ್ಯಮ ಗಾತ್ರ)
• ತೊಗರಿಬೇಳೆ
• ಟೊಮೆಟೊ
• ಅರಿಶಿನ
• ತೆಂಗಿನ ತುರಿ
• ಹುಣಸೆ ಹಣ್ಣು
• ಉಪ್ಪು - ರುಚಿಗೆ ತಕ್ಕಷ್ಟು
• ಕೆಂಪು ಮೆಣಸು
• ಉದ್ದಿನಬೇಳೆ
• ಕೊತ್ತಂಬರಿ
• ಜೀರಿಗೆ
• ಮೆಂತ್ಯ
• ಇಂಗು
• ಅಡುಗೆ ಎಣ್ಣೆ

ಒಗ್ಗರಣೆಗೆ ಅಗತ್ಯವಿರುವ ಸಾಮಗ್ರಿಗಳು

• ಅಡುಗೆ ಎಣ್ಣೆ
• ಸಾಸಿವೆ
• ಕರಿಬೇವಿನ ಎಲೆ
• ಒಣಮೆಣಸಿನ ಕಾಯಿ
• ಸ್ವಲ್ಪ ಇಂಗು
• ಕೆಂಪು ಮೆಣಸು

ಪುಡಿ ಮಾಡಲು ಬೇಕಾಗುವ ಸಾಮಗ್ರಿಗಳು

• ಧನಿಯ
• ಬ್ಯಾಡಗಿ ಮೆಣಸಿನಕಾಯಿ
• ಗುಂಟೂರು ಮೆಣಸಿನಕಾಯಿ
• ಕಡ್ಲೆಬೇಳೆ
• ಕರಿಬೇವು
• ಸಾಸಿವೆ
• ಮೆಂತ್ಯ
• ಇಂಗು

ಮಂಗಳೂರು ಸೌತೆಕಾಯಿ ಹುಳಿ ತಯಾರಿಸುವ ವಿಧಾನ

ಮೊದಲಿಗೆ, ಸೌತೆಕಾಯಿಯನ್ನು ಚೆನ್ನಾಗಿ ತೊಳೆಯಿರಿ. ಸಿಪ್ಪೆಯನ್ನು ತೆಗೆದು ಸಣ್ಣ ತುಂಡುಗಳಾಗಿ ಕತ್ತರಿಸಬೇಕು. ಕತ್ತರಿಸಿದ ನಂತರ ಮತ್ತೊಮ್ಮೆ ತೊಳೆಯುವುದು ಮುಖ್ಯ. ಏಕೆಂದರೆ, ಸೌತೆಕಾಯಿಯ ಮಧ್ಯಭಾಗ ಕೆಲವೊಮ್ಮೆ ಕಹಿಯಾಗಿರಬಹುದು. ಇದು ಹುಳಿಯ ರುಚಿಯನ್ನು ಹಾಳು ಮಾಡುವುದನ್ನು ತಡೆಯುತ್ತದೆ.

ಇದಾದ ಬಳಿಕ, ತೊಗರಿಬೇಳೆಯನ್ನು ಪ್ರೆಶರ್ ಕುಕ್ಕರ್‌ಗೆ ಹಾಕಿ ಚೆನ್ನಾಗಿ ತೊಳೆಯಿರಿ. ಅದಕ್ಕೆ ಸ್ವಲ್ಪ ಅರಿಶಿನ ಪುಡಿ, ಸ್ವಲ್ಪ ಅಡುಗೆ ಎಣ್ಣೆ ಮತ್ತು ಒಂದು ಕಪ್ ನೀರನ್ನು ಹಾಕಿ. ಬೇಳೆ ಅರ್ಧ ಬೇಯಲು ಎರಡು ವಿಜಲ್ (ಸೀಟಿ) ಬರುವವರೆಗೆ ಬೇಯಿಸಿ. ಅರಿಶಿನ ಪುಡಿ ಮತ್ತು ಎಣ್ಣೆಯನ್ನು ಸೇರಿಸುವುದರಿಂದ ಬೇಳೆ ಸರಿಯಾಗಿ ಬೇಯಲು ಸಹಾಯವಾಗುತ್ತದೆ. ಈಗ ಅರ್ಧ ಬೆಂದ ಬೇಳೆಗೆ ಕತ್ತರಿಸಿದ ಸೌತೆಕಾಯಿ, ಒಂದು ಚಮಚ ಉಪ್ಪು ಮತ್ತು 1.5 ಕಪ್ ನೀರನ್ನು ಹಾಕಿ. ಮತ್ತೊಮ್ಮೆ ಎರಡು ವಿಜಲ್ ಬರುವವರೆಗೆ ಬೇಯಿಸಿ. ಈ ಹಂತದಲ್ಲಿ ತರಕಾರಿ ಸಂಪೂರ್ಣವಾಗಿ ಬೆಂದಿರುತ್ತದೆ.

ಇದಾದ ಬಳಿಕ, ಮಸಾಲೆ ಹುರಿಯಲು ಒಂದು ಬಾಣಲೆಗೆ ಒಂದು ಚಮಚ ಎಣ್ಣೆ ಹಾಕಿ. ಇದಕ್ಕೆ ಕೆಂಪು ಮೆಣಸಿನಕಾಯಿ, ಉದ್ದಿನ ಬೇಳೆ, ಕೊತ್ತಂಬರಿ ಬೀಜ, ಜೀರಿಗೆ, ಮೆಂತ್ಯ ಮತ್ತು ಇಂಗು ಹಾಕಿ ಮಧ್ಯಮ ಉರಿಯಲ್ಲಿ ಹುರಿಯಿರಿ. ಹುರಿದ ಮಸಾಲೆಗಳು ಮತ್ತು ತೆಂಗಿನ ತುರಿಯನ್ನು ಸೇರಿಸಿ ನುಣ್ಣಗೆ ರುಬ್ಬಿಕೊಳ್ಳಿ. ಈ ರುಬ್ಬಿದ ಪೇಸ್ಟ್ ಅನ್ನು ಕುಕ್ಕರ್‌ನಲ್ಲಿರುವ ಬೆಂದ ತರಕಾರಿ ಮತ್ತು ಬೇಳೆಗೆ ಸೇರಿಸಿ. ಇದಕ್ಕೆ ಒಂದು ಸ್ಪೂನ್ ಉಪ್ಪು ಮತ್ತು ಒಂದು ಸ್ಪೂನ್ ಬೆಲ್ಲ ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ. ಇಷ್ಟು ಮಾಡಿದರೆ ನಿಮ್ಮ ರುಚಿಗೆ ತಕ್ಕಂತೆ ಮಂಗಳೂರು ಶೈಲಿಯ ಸೌತೆಕಾಯಿ ಹುಳಿ ಸವಿಯಲು ಸಿದ್ಧ.