ಸಂಜೆಯ ಸ್ನೇಹಿತರಿಗಾಗಿ ಆರೇಂಜ್ ಮಾಕ್‌ಟೇಲ್

By Prasad

Published: Monday, January 9, 2012, 18:29 [IST]

ಆರೋಗ್ಯದ ಮೇಲೆ ನಿಂಬೆ ಹಣ್ಣು ಮಾಡುವ ಪ್ರಭಾವ ಎಷ್ಟೇ ಇರಲಿ, ಆದರೆ ಮನೆಗೆ ಬಂತ ಅತಿಥಿಗಳನ್ನು ಸತ್ಕರಿಸುವ ವಿಷಯಕ್ಕೆ ಬಂದಾಗ ನಿಂಬೆ ಹಣ್ಣಿನ ಶರಬತ್ ಅಥವಾ ಜ್ಯೂಸ್ ತಂದಾಗ ಒಂದು ಹುಬ್ಬೇರಿಸಿ, ಅಕ್ಕಪಕ್ಕದವರ ಮುಖ ನೋಡಿ ಮುಸಿಮುಸಿ ನಗುವವರೇ ಜಾಸ್ತಿ.

ಅತಿಥಿಗಳಿಗೆ ನೀಡುವ ಪಾನೀಯವೂ ಡಿಫರೆಂಟ್ ಆದಾಗ ಸಹಜವಾಗಿ ಇಷ್ಟಪಡುತ್ತಾರೆ. ಹಾಗೆಯೆ, ಎಂಥ ಪಾನೀಯ ತಯಾರಿಸಬೇಕು ಎಂಬ ವಿಚಾರ ಬಂದಾಗ ತಲೆಕೆಡಿಸಿಕೊಳ್ಳಲು ಪ್ರಾರಂಭಿಸುತ್ತಾರೆ. ಅದಕ್ಕೆ ತಲೆಕೆಡಿಸಿಕೊಳ್ಳುವ ಕಾರಣವಿಲ್ಲ. ಸ್ವಲ್ಪ ತಲೆ ಓಡಿಸಿದರೆ ನೋಡಲು ಮಸ್ತಾಗಿರುವ ಮತ್ತು ರುಚಿಯಲ್ಲಿ ಸಖತ್ತಾಗಿರುವ ಐದೇಐದು ನಿಮಿಷದಲ್ಲಿ ತಯಾರಿಸಬಹುದು.

ಅದೇ ಆರೇಂಜ್ ಮಾಕ್‌ಟೇಲ್. ಹೆಸರೇ ಸೂಪರಾಗಿದೆ. ರುಚಿ ಕೂಡ ಅಷ್ಟೇ ಬೊಂಬಾಟಾಗಿರುತ್ತದೆ. ಇದನ್ನು ತಯಾರಿಸಲು ಬೇಕಾಗುವ ಸಾಮಗ್ರಿಗಳು ಕೂಡ ಬೆರಳೆಣಿಕೆಯಷ್ಟು. ಸ್ನೇಹಿತರೊಂದಿಗೆ ಗೆಟ್ ಟುಗೆದರ್ ಮಾಡಿದಾಗ, ಪಾರ್ಟಿ ಇಟ್ಟುಕೊಂಡಾಗ ಈ ಹೊಸರುಚಿಯನ್ನು ತಯಾರಿಸಿ ನೋಡಿ.

ಬೇಕಾಗುವ ಸಾಮಗ್ರಿಗಳು : ಫಾಂಟಾ - ಅರ್ಧ ಲೀಟರ್, ನಿಂಬೆ ರಸ - ಕಾಲು ಚಮಚ, ವೆನಿಲ್ಲಾ ಐಸ್ ಕ್ರೀಂ ಎರಡು ಚಮಚ, ಕಿತ್ತಳೆ ಹಣ್ಣು 1.

ತಯಾರಿಸುವ ವಿಧಾನ

ಎಲ್ಲ ಪದಾರ್ಥಗಳನ್ನು ಮಿಕ್ಸಿಯಲ್ಲಿ ಹಾಕಿ 1 ನಿಮಿಷ ಗಿರ್ರಂಗಿಟ್ಟ ಅನ್ನಿಸಿಬಿಡಿ. ಮಾಕ್‌ಟೇಲನ್ನು ಗಾಜಿನ ಲೋಟಗಳಿಗೆ ಬಗ್ಗಿಸಿ ಬೇಕಿದ್ದರೆ ಐಸ್ ಕ್ಯೂಬ್ ತೇಲಿಸಿಬಿಡಿ. ಆರೇಂಜ್ ಹಣ್ಣನ್ನು ಕತ್ತರಿಸಿ ಜ್ಯೂಸಲ್ಲಿ ಹಾಕಿರಿ. ಅಷ್ಟೇ ಆರೇಂಜ್ ಮಾಕ್‌ಟೇಲ್ ತಯಾರ್.