ಪಿಂಗಾಣಿ ಡಬ್ಬಿಯಲ್ಲಿ ಯಾವ ಉಪ್ಪಿನ ಕಾಯಿದೆ?

Chutney

oi-Sumalatha

By Sumalatha

Published: Thursday, December 15, 2011, 13:01 [IST]

ಉಪ್ಪಿನ ಕಾಯಿಲ್ಲದೆ ಊಟ ರುಚಿಸುವುದೇ ಇಲ್ಲ, ನೆಂಜಿಕೊಳ್ಳಲು ಏನೂ ಇಲ್ಲದ ಹೊತ್ತಿನಲ್ಲಿ ಪಿಂಗಾಣಿ ಡಬ್ಬಿಯಲ್ಲಿಟ್ಟ ಉಪ್ಪಿನ ಕಾಯಿ ನೆನಪಿಗೆ ಬಂದರೆ ಆಯಿತು, ಅಲ್ಲಿಗೆ ಆ ಹೊತ್ತಿನ ಊಟ ರುಚಿಕರ. ಹಾಸ್ಟೆಲ್ಲಲ್ಲಿರುವವರಿಗಂತೂ ಅಮ್ಮ ಕಳಿಸಿಕೊಟ್ಟ ಉಪ್ಪಿನ ಕಾಯಿಯೇ ತಕ್ಷಣದ ಹಸಿವು ನೀಗಿಸುವ ಬುತ್ತಿ. ಹಾಗೆಂದೂ ಯಾವಾಗಲೂ ಒಂದೇ ಬಗೆಯ ಉಪ್ಪಿನ ಕಾಯಿ ತಿಂದರೆ ರುಚಿಗೆ ಬೆಲೆಯೆಲ್ಲಿ?

ರುಚಿ ನೀಡುವ ಉಪ್ಪಿನ ಕಾಯಿಯಲ್ಲೂ ವಿಧ ವಿಧ ಬಗೆಯಿದೆ. ಕೇವಲ ಮಾವಿನ ಕಾಯಿ, ಕಿರಳಿ ಕಾಯಿ, ನೆಲ್ಲಿಕಾಯಿ ಉಪ್ಪಿನ ಕಾಯಿ ಮಾತ್ರವಲ್ಲ, ದಿನ ನಿತ್ಯ ಬಳಸುವ ಹಸಿರು ಮೆಣಸಿನ ಕಾಯಿಯಿಂದಲೂ ಬಾಯಿ ಚಪ್ಪರಿಸುವಂತೆ ಮಾಡುವ ಉಪ್ಪಿನ ಕಾಯನ್ನು ತಯಾರಿಸಬಹುದು. ಈ ಚಳಿಗಾಲದಲ್ಲಿ ಬಿಸಿ ಅನ್ನದ ಜೊತೆ ಈ ಉಪ್ಪಿನ ಕಾಯಿದ್ದರೆ ಊಟ ಪರಿಪೂರ್ಣ. ಮೆಣಸಿನ ಕಾಯಿಯ ಉಪ್ಪಿನ ಕಾಯನ್ನು ತಯಾರಿಸೋದು ಹೇಗೆ ಎಂದು ತಿಳಿದುಕೊಳ್ಳಿ.

ಮೆಣಸಿನ ಕಾಯಿಯ ಉಪ್ಪಿನ ಕಾಯಿ ತಯಾರಿಸಲು 1 ಕಪ್ ಬೀಜ ತೆಗೆದು ಉದ್ದುದ್ದ ಕತ್ತರಿಸಿದ ಹಸಿರು ಮೆಣಸಿನ ಕಾಯಿ, ಎರಡು ಚಮದ ನಿಂಬೆ ರಸ, ಒಂದು ಚಮಚ ಅರಿಶಿಣ ಪುಡಿ, ಎರಡು ಚಮಚ ಸಾಸಿವೆ ಪುಡಿ ಮತ್ತು ಉಪ್ಪು

ಇನ್ನು ಮೆಣಸಿನ ಕಾಯಿಯ ಉಪ್ಪಿನ ಕಾಯನ್ನು ತಯಾರಿಸಲು ಹೆಚ್ಚು ಶ್ರಮವನ್ನೂ ತೆಗೆದುಕೊಳ್ಳಬೇಕಿಲ್ಲ. ಮೇಲೆ ತಿಳಿಸಿರುವ ಎಲ್ಲ ಪದಾರ್ಥಗಳನ್ನು ಬಟ್ಟಲಿನಲ್ಲಿ ಬೆರೆಸಿ ಬಿಸಿಲಿನಲ್ಲಿ 2-3 ಗಂಟೆ ಒಣಗಿಸಬೇಕು. ಉಪ್ಪಿನ ಕಾಯಿಯ ಡಬ್ಬಿಯನ್ನು ಶುದ್ಧಗೊಳಿಸಿ ಬಿಸಿಲಿನಲ್ಲಿ ಒಣಗಿಸಿ ಈ ಮಿಶ್ರಣವನ್ನು ಜಾರ್ ಗೆ ಹಾಕಿ ಗಾಳಿಯಾಡದಂತೆ ಬಿಗಿಯಾಗಿ ಮುಚ್ಚಿದರೆ ಮೆಣಸಿನ ಕಾಯಿ ಉಪ್ಪಿನ ಕಾಯಿ ತಿನ್ನಲು ತಯಾರಾಗಿರುತ್ತೆ.