ಮಸಾಲೆ ಕಚೋರಿಯ ರೆಸಿಪಿ

ಕಚೋರಿಯನ್ನು ಸಿಹಿ ಕಚೋರಿ ಮತ್ತು ಮಸಾಲೆ ಕಚೋರಿ ಎಂದು ಎರಡು ರೀತಿಯಲ್ಲಿ ತಯಾರಿಸಬಹುದು. ಸಿಹಿ ಕಚೋರಿ ಸಂಜೆ ಸ್ನ್ಯಾಕ್ಸ್ ಗೆ ತಿನ್ನಲು ರುಚಿಕರವಾದರೆ, ಮಸಾಲೆ ಕಚೋರಿ ಬ್ರೇಕ್ ಫಾಸ್ಟ್ ಅಥವಾ ಡಿನ್ನರ್ ಗೆ ಬೆಸ್ಟ್.

ಈ ಹಿಂದೆ ಸಿಹಿ ಕಚೋರಿಯ ರೆಸಿಪಿ ನೀಡಿದ್ದೆವು, ಇಲ್ಲಿ ನಾವು ಮಸಾಲೆ ಕಚೋರಿಯ ರೆಸಿಪಿ ನೀಡಿದ್ದೇವೆ ನೋಡಿ:

ಬೇಕಾಗುವ ಸಾಮಾಗ್ರಿಗಳು
ತೆಂಗಿನ ತುರಿ 1 ಕಪ್
ಹಸಿ ಮೆಣಸಿನಕಾಯಿ 3
ಸಕ್ಕರೆ ಅರ್ಧ ಚಮಚ
ಅಜ್ವೈನ್ ಅರ್ಧ ಚಮಚ(ಬಡೇ ಸೋಂಪು)
ಕೊತ್ತಂಬರಿ ಪುಡಿ 1 ಚಮಚ
ಗರಂ ಮಸಾಲ 1 ಚಮಚ
ಮೈದಾ 3 ಕಪ್
ನೀರು 1 ಕಪ್
ತುಪ್ಪ 1 ಚಮಚ
ಎಣ್ಣೆ 1 ಕಪ್
ರುಚಿಗೆ ತಕ್ಕ ಉಪ್ಪು

ತಯಾರಿಸುವ ವಿಧಾನ:

* ತೆಂಗಿನಕಾಯಿ ಜೊತೆ ಹಸಿ ಮೆಣಸಿನಕಾಯಿ ಹಾಕಿ ಗಟ್ಟಿಯಾಗಿ ರುಬ್ಬಿ ಒಂದು ಬದಿಯಲ್ಲಿಡಿ.

* ಈಗ ಒಂದು ಚಮಚ ಎಣ್ಣೆ ಬಿಸಿ ಮಾಡಿ ಅದರಲ್ಲಿ ಬಡೇ ಸೋಂಪು ಹಾಕಿ, ನಂತರ ರುಬ್ಬಿದ ತೆಂಗಿನಕಾಯಿ ಹಾಕಿ 2 ನಿಮಿಷ ಹುರಿಯಿರಿ.

* ಈಗ ಜೀರಿಗೆ, ಗರಂ ಮಸಾಲ, ಕೊತ್ತಂಬರಿ ಪುಡಿ, ಸಕ್ಕರೆ ಹಾಕಿ ಕಡಿಮೆ ಉರಿಯಲ್ಲಿ 4-5 ನಿಮಿಷ ಹುರಿಯಿರಿ.

* ನಂತರ ಉರಿಯಿಂದ ಇಳಿಸಿ ತಣ್ಣಗಾಗಲು ಇಡಿ.

* ಈಗ ಮೈದಾವನ್ನು ನೀರು ಹಾಕಿ ಗಟ್ಟಿಯಾಗಿ ಕಲೆಸಿ, ಹೀಗೆ ಕಲೆಸುವಾಗ ತುಪ್ಪವನ್ನು ಸೇರಿಸಿ ಕಲೆಸಿ. ಈಗ ಮಸ್ಲೀನ್ ಬಟ್ಟೆಯನ್ನು ಒದ್ದಿ ಮಾಡಿ, ಹಿಟ್ಟನ್ನು ಮುಚ್ಚಿ ಅರ್ಧ ಗಂಟೆ ಇಡಿ.

* ಈಗ ಮೈದಾದಿಂದ ಉಂಡೆಗಳನ್ನು ಮಾಡಿ, ಬೆರಳಿನಿಂದ ಉಂಡೆಯನ್ನು ಗುಂಡಿ ರೀತಿಯಲ್ಲಿ ಮಾಡಿ ಅದರಲ್ಲಿ ಸ್ವಲ್ಪ ಮಸಾಲೆ ತುಂಬಿ, ನಂತರ ಪೂರಿಗೆ ತಟ್ಟುವ ರೀತಿಯಲ್ಲಿ ತಟ್ಟಿ.

* ಇದೇ ಸಮಯದಲ್ಲಿ ಬಾಣಲೆಯಲ್ಲಿ ಎಣ್ಣೆಯನ್ನು ಹಾಕಿ ಬಿಸಿ ಮಾಡಬೇಕು, ಈಗ ಕಾದ ಎಣ್ಣೆಗೆ ತಟ್ಟಿದ ಮೈದಾ ಹಿಟ್ಟನ್ನು ಹಾಕಿ, ಅದು ಕಂದು ಬಣ್ಣ ಬರುವಾಗ ತೆಗೆದರೆ ಮಸಾಲೆ ಕೋಕನೆಟ್ ಕಚೋರಿ ರೆಡಿ.