ಮಂಡಕ್ಕಿ ಒಗ್ಗರಣೆ ಹಾಗೂ ಮೆಣಸಿನಕಾಯಿ ಬಜ್ಜಿ...

ಮಂಡಕ್ಕಿ ಒಗ್ಗರಣೆ ಜೊತೆ ಮೆಣಸಿನಕಾಯಿ ಬಜ್ಜಿಯನ್ನು ತಿಂದು ನೋಡಿ, ಒಳ್ಳೆಯ ಕಾಂಬಿನೇಷನ್‌ ಅಂತ ನೀವೇ ಹೇಳುತ್ತೀರಿ...

ಮಂಡಕ್ಕಿ ತಿಂಡಿಗೆ ಬೇಕಾಗುವ ಸಾಮಗ್ರಿಗಳು :
2ಲೀಟರ್‌ ಮಂಡಕ್ಕಿ(ಪುರಿ)
2ಈರುಳ್ಳಿ
4ಹಸಿಮೆಣಸಿನಕಾಯಿ
ಹುಣಸಿಹಣ್ಣಿನ ರಸ(ಸ್ವಲ್ಪ)

ಒಗ್ಗರಣೆಗೆ :
ಅಡುಗೆ ಎಣ್ಣೆ
ಸಾಸಿವೆ
ಕರಿಬೇವು
ಅರಿಶಿನಪುಡಿ
ರುಚಿಗೆ ತಕ್ಕಷ್ಟು ಉಪ್ಪು
ಕೋತಂಬರಿ ಸೊಪ್ಪು
ಕಾಯಿತುರಿ

ಮಾಡುವ ವಿಧಾನ :
ಮಂಡಕ್ಕಿಯನ್ನು ನೀರಿನಲ್ಲಿ ಮೆತ್ತಗೆ ಆಗುವವರೆಗೆ ನೆನೆಸಿ, ನೀರನ್ನು ಹಿಂಡಿ ತೆಗೆದುಕೊಳ್ಳಿ. ಈರುಳ್ಳಿ, ಹಸಿಮೆಣಸಿನಕಾಯಿ, ಕೋತಂಬರಿ ಸೊಪ್ಪು ಹೆಚ್ಚಿಟ್ಟುಕೊಳ್ಳಿ.

ಪಾತ್ರೆಯಲ್ಲಿ ಎಣ್ಣೆ ಹಾಕಿ, ಕಾದಬಳಿಕ ಸಾಸಿವೆ, ಕಡಲೆಬೇಳೆ, ಕರಿಬೇವು, ಹೆಚ್ಚಿದ ಹಸಿಮೆಣಸಿನಕಾಯಿ, ಈರುಳ್ಳಿ ಹಾಕಿ ಫ್ರೆೃ ಮಾಡಿ. ಆಮೇಲೆ ಹುಣಸೆಹಣ್ಣಿನ ರಸ, ಅರಿಶಿನಪುಡಿ, ಉಪ್ಪು ಎಲ್ಲ ಹಾಕಿ ಮಿಕ್ಸ್‌ ಮಾಡಿ. ಆನಂತರ ನೆನೆಸಿಟ್ಟುಕೊಂಡ ಮಂಡಕ್ಕಿ ಹಾಕಿ ಚೆನ್ನಾಗಿ ಕಲಸಿ. ಕೊನೆಗೆ ಕಾಯಿತುರಿ ಹಾಗೂ ಕೋತಂಬರಿ ಸೊಪ್ಪು ಹಾಕಿ. ಈಗ ಮಂಡಕ್ಕಿ ತಿಂಡಿ ರೆಡಿ. ಇದರ ಜೊತೆ ಮೆಣಸಿನಕಾಯಿ ಬಜ್ಜಿ ಇದ್ದರೆ ಇನ್ನೂ ಚೆನ್ನಾಗಿರುತ್ತೆ.

ಬಜ್ಜಿಗೆ ಬೇಕಾಗುವ ಸಾಮಗ್ರಿಗಳು :
ಬಜ್ಜಿ ಮೆಣಸಿನಕಾಯಿ
ಕಡಲೆಹಿಟ್ಟು
ಖಾರದಪುಡಿ
ಸೋಡಾಪುಡಿ
ರುಚಿಗೆ ತಕ್ಕಷ್ಟು ಉಪ್ಪು
ಅಡುಗೆ ಎಣ್ಣೆ(ಕರಿಯಲು)
ಹಿಟ್ಟು ಕಲಸಿಕೊಳ್ಳಲು ನೀರು

ಮಾಡುವ ವಿಧಾನ :
ಕಡಲೆಹಿಟ್ಟಿಗೆ ಖಾರದಪುಡಿ, ಉಪ್ಪು, ಸೋಡಾಪುಡಿ, ನೀರು ಹಾಕಿ ಸ್ವಲ್ಪ ಗಟ್ಟಿಯಾಗಿ ಕಲಸಿಕೊಳ್ಳಿ. ಮೆಣಸಿನಕಾಯಿಯನ್ನು ಮಧ್ಯದಲ್ಲಿ ಸ್ವಲ್ಪ ಸೀಳಿಕೊಳ್ಳಿ. ಬಾಣಲೆಗೆ ಎಣ್ಣೆ ಹಾಕಿ, ಕಾದಬಳಿಕ ಮೆಣಸಿನಕಾಯಿಯನ್ನು ಹಿಟ್ಟಿನಲ್ಲಿ ಅದ್ದಿ ಬಾಣಲೆಗೆ ಹಾಕಿ. ಬಜ್ಜಿ ಬಂಗಾರ ಬಣ್ಣಕ್ಕೆ ತಿರುಗಿದ ಮೇಲೆ ಹೊರಕ್ಕೆ ತೆಗೆಯಿರಿ. ಈಗ ಬಜ್ಜಿಯನ್ನು ಮಂಡಕ್ಕಿ ಒಗ್ಗರಣೆ ಜೊತೆ ತಿಂದು ನೋಡಿ, ಒಳ್ಳೆಯ ಕಾಂಬಿನೇಷನ್‌ ಅಂತ ನೀವೇ ಹೇಳುತ್ತೀರಿ.