ಕೊರೆಯುವ ಚಳಿಗೆ ಬೆಚ್ಚನೆಯ ಕರಕಲಿ

Breakfast

oi-Staff

By Super

Updated: Thursday, March 14, 2013, 12:59 [IST]

ಉತ್ತರಕನ್ನಡದ ಕಡೆ ಈ ಪದಾರ್ಥಕ್ಕೆ ಕರಕ್ಲಿ ಎನ್ನುತ್ತಾರೆ. ಇದೊಂದು ತರಹದ ಕೆಸುವಿನ(Taro leaf) ಗೊಜ್ಜು. ಮನೆಯಲ್ಲಿ ತರಕಾರಿಗಳಿಲ್ಲದಾಗ, ನೆಂಟರು ಧಿಡೀರನೆ ಬಂದಾಗ, ಚಳಿಗಾಲ ಹಾಗೂ ಮಳೆಗಾಲದ ಸಮಯದಲ್ಲಿ ಈ ಗೊಜ್ಜು ತುಂಬಾ ಉಪಯುಕ್ತ. ಮಾಡುಲು ಸುಲಭ. ಬಲು ಸ್ವಾದಿಷ್ಟ. ಉಷ್ಣ ಪ್ರಕೃತಿಯವರಿಗೆ ಕೆಸುವು ಸಲ್ಲ. ಆದರೆ ವಾತಾವರಣ ತುಂಬಾ ತಂಪಾಗಿದ್ದಲ್ಲಿ, ಶೀತ ಪ್ರದೇಶಗಳಲ್ಲಿ, ಕೆಸುವಿನ ಪದಾರ್ಥ ದೇಹದ ಉಷ್ಣತೆಯನ್ನು ತಕ್ಕಮಟ್ಟಿಗೆ ಹೆಚ್ಚಿಸುವಲ್ಲಿ ಪರಿಣಾಮಕಾರಿ ಎನ್ನಬಹುದು.

*ತೇಜಸ್ವಿನಿ ಹೆಗಡೆ, ಬೆಂಗಳೂರು

ಕೆಸುವಿನ ಬಗ್ಗೆ ಹೆಚ್ಚಿನ ಮಾಹಿತಿಯಾಸಕ್ತರು ಹಾಗೂ ಕೆಸುವಿನಿಂದ ತಯಾರಿಸಲ್ಪಡುವ ಇನ್ನಿತರ ಪದಾರ್ಥಗಳ ತಯಾರಿಕೆಯನ್ನು ತಿಳಿಯಲಿಚ್ಛಿಸುವವರು ಈ ಕೆಳಗಿನ ಲಿಂಕ್‌ಗಳಿಗೆ ಭೇಟಿಕೊಡಬಹುದು.

ಕೆಸುವಿನ ಕರಕಲಿಯನ್ನು ತಯಾರಿಸಲು ಬೇಕಾಗುವ ಸಾಮಾಗ್ರಿಗಳು

* ಕೆಸುವಿನೆಲೆ - 3 (ದೊಡ್ಡ ಎಲೆ)
* ಹುಣಸೇಹಣ್ಣು - ಸಣ್ಣ ಲಿಂಬೇಹಣ್ಣಿನ ಗಾತ್ರದಷ್ಟು
* ಉಪ್ಪು - ರುಚಿಗೆ ತಕ್ಕಷ್ಟು
* ಹಸಿಮೆಣಸು - ಖಾರಕ್ಕೆ ತಕ್ಕಷ್ಟು
* ಬೆಳ್ಳುಳ್ಳಿ ಎಸಳು - 6-7
* ಸಾಸಿವೆ -1/4 ಚಮಚ
* ಓಂಕಾಳು - 1/4 ಚಮಚ

ಮಾಡುವ ವಿಧಾನ

* ಕೆಸುವಿನ ಸೊಪ್ಪನ್ನು ಚೆನ್ನಾಗಿ ತೊಳೆದು, ಸಣ್ಣದಾಗಿ ಹೆಚ್ಚಬೇಕು.
* ಹೆಚ್ಚಿಟ್ಟ ಕೆಸುವಿನೆಲೆ ಚೂರುಗಳಿಗೆ ಮೆಣಸು, ಉಪ್ಪು, ಹುಳಿ, ಓಂಕಾಳು ಎಲ್ಲಾ ಸೇರಿಸಿ ತಕ್ಕಷ್ಟು ನೀರನ್ನು ಹಾಕಿ ಕುಕ್ಕರಿನಲ್ಲಿಟ್ಟು ಎರಡು ವ್ಹಿಸಿಲ್ ತರಸಬೇಕು.
* ಕುಕ್ಕರಿನೊಳಗಿನ ಮಿಶ್ರಣ ತಣಿದ ಮೇಲೆ ಮಿಕ್ಸಿಯಲ್ಲಿ ಹಾಕಿ ರಸವಾಗುವಷ್ಟು ರುಬ್ಬಬೇಕು.
* ನಂತರ ಒಗ್ಗರಣೆಗೆ ಬೆಳ್ಳುಳ್ಳಿ ಎಸಳುಗಳನ್ನು ಜಜ್ಜಿ ಹಾಕಿ ಅವು ಕಂದುಬಣ್ಣಕ್ಕೆ ತಿರುಗುವಾಗ ಸಾಸಿವೆಯನ್ನು ಹಾಕಿ ರುಬ್ಬಿದ ಮಿಶ್ರಣಕ್ಕೆ ಒಗ್ಗರಿಸಬೇಕು.

ಕೆಸುವಿನೆಲೆಯ ಕರಕ್ಲಿ ಈಗ ಬಿಸಿಯಾದ ಅನ್ನಕ್ಕೆ ಕಲಸಿ ತಿನ್ನಲು ತಯಾರು. ಈ ಪದಾರ್ಥವನ್ನು ಕೇವಲ ಅನ್ನಕ್ಕೆ ಮಾತ್ರವಲ್ಲದೇ ಚಪಾತಿ ಹಾಗೂ ದೋಸೆಗೂ ಹಾಕಿಕೊಳ್ಳಬಹುದು.