ಎಂದಾದರೂ ಸವಿದಿದ್ದೀರಾ ಈರುಳ್ಳಿ ಪರೋಟ ರುಚಿ?

Breakfast

oi-Sumalatha

By Sumalatha

Published: Saturday, November 19, 2011, 15:15 [IST]

ಸಾಮಾನ್ಯ ಚಪಾತಿ, ಪರೋಟಾಗಿಂತ ಈ ಈರುಳ್ಳಿ ಪರೋಟಾ ಮಾಡಿದರೆ ಸಖತ್ ರುಚಿಯಾಗಿರುತ್ತೆ. ಖಾರ ಬೆರೆಸಿ ಮಾಡುವ ಈ ಪರೋಟದ ರುಚಿಯ ಘಮ್ಮತ್ತು ತಿನ್ನೋರಿಗಷ್ಟೆ ಗೊತ್ತು. ಈ ಚಳಿಗಾಲಕ್ಕೊಂತು ಇದು ಬೆಸ್ಟ್ ಖಾದ್ಯ. ಸವಿಯಾದ ಈರುಳ್ಳಿ ಪರೋಟ ಮಾಡುವುದು ಹೇಗೆ ಎಂದು ಇಲ್ಲಿ ನೋಡಿ.

ಈರುಳ್ಳಿ ಪರೋಟಕ್ಕೆ ಬೇಕಾಗುವ ಸಾಮಗ್ರಿ:
* 1 ಕಪ್ ಗೋಧಿ ಹಿಟ್ಟು
* 1/2 ಕಪ್ ಚಿಕ್ಕದಾಗಿ ಕತ್ತರಿಸಿದ ಅಥವಾ ತುರಿದ ಈರುಳ್ಳಿ
* 2-3 ಕತ್ತರಿಸಿದ ಹಸಿರು ಮೆಣಸಿನಕಾಯಿ (ಪೇಸ್ಟ್ ಇದ್ದರೂ ಸರಿ)
* ಉಪ್ಪು, 1/2 ಚಮಚ ಜೀರಿಗೆ ಪುಡಿ, ನೀರು, ಎಣ್ಣೆ
* ಸ್ವಲ್ಪ ಮಾವಿನ ಪುಡಿ (ಬೇಕಿದ್ದರೆ)

ಈರುಳ್ಳಿ ಪರೋಟ ತಯಾರಿಸುವ ವಿಧಾನ:
* ಮೊದಲು ದೊಡ್ಡ ಬಟ್ಟಲಿನಲ್ಲಿ ಮೇಲೆ ತಿಳಿಸಿದಂತೆ ಗೋಧಿ ಹಿಟ್ಟು, ಈರುಳ್ಳಿ, ಮೆಣಸಿನಕಾಯಿ, ರುಚಿಗೆ ತಕ್ಕಷ್ಟು ಉಪ್ಪು, ಜೀರಿಗೆ ಪುಡಿ, ಮಾವಿನ ಪುಡಿ ಇವೆಲ್ಲವನ್ನೂ ನೀರು ಮತ್ತು ಸ್ವಲ್ಪ ಎಣ್ಣೆಯೊಂದಿಗೆ ಚಪಾತಿ ಹಿಟ್ಟಿನಂತೆ ಹದವಾಗಿ ಕಲೆಸಿಕೊಳ್ಳಬೇಕು. ಇದನ್ನು 30 ನಿಮಿಷ ಹಾಗೇ ಬಿಡಬೇಕು.

* ಸಣ್ಣ ಸಣ್ಣ ಉಂಡೆಗಳಾಗಿ ಮಾಡಿಕೊಂಡು ಚಪಾತಿ ಹಿಟ್ಟಿನಂತೆಯೇ ಒತ್ತಿಕೊಳ್ಳಬೇಕು.

* ತವೆಯನ್ನು ಕಾಯಿಸಿ ಅದರ ಮೇಲೆ ಈರುಳ್ಳಿ ಪರೋಟಾ ಹಾಕಿ ಎರಡೂ ಕಡೆ ಬೇಯಿಸಿದರೆ ಈರುಳ್ಳಿ ಪರೋಟ ತಿನ್ನಲು ಸಿದ್ಧವಾಗಿರುತ್ತೆ.

ಈರುಳ್ಳಿ ಪರೋಟಾವನ್ನು ಬೆಳಗ್ಗೆಯ ತಿಂಡಿಗೂ ಮಾಡಬಹುದು, ಸಂಜೆ ಟೀ ಜೊತೆಗೂ ಸವಿಯಬಹುದು. ಜೊತೆಗೆ ಬೆಳ್ಳುಳ್ಳಿ ಅಥವಾ ಕೊತ್ತಂಬರಿ ಚಟ್ನಿಯಿದ್ದರೆ ಇನ್ನೂ ರುಚಿ.