ಬೆಸ್ಟ್ ಡಯಟ್ ಫುಡ್ ದಾಲಿಯಾ ಸವಿಯಿರಿ

Breakfast

oi-Sumalatha

By Sumalatha

Published: Monday, October 31, 2011, 10:36 [IST]

ಗೋಧಿ ನುಚ್ಚು ಅಥವಾ ದಾಲಿಯಾದಿಂದ ಮಾಡುವ ಖಾದ್ಯ ತಿನ್ನಲು ಬಲು ರುಚಿ. ಕಡಿಮೆ ಕ್ಯಾಲೊರಿ ಹೊಂದಿರುವ ಈ ತಿಂಡಿ ಡಯಟ್ ಗೂ ಸೈ. ಬೆಳಗ್ಗಿನ ತಿಂಡಿಗಂತೂ ತುಂಬಾ ಇಷ್ಟ ಪಟ್ಟು ತಿನ್ನಬಹುದು. ಈ ದಾಲಿಯಾ ಮಾಡೋದು ಹೇಗೆ ಎಂದು ಇಲ್ಲಿ ತಿಳಿದುಕೊಳ್ಳಿ.

ಬೇಕಾಗುವ ಸಾಮಾನು: 1 ಕಪ್ ಗೋಧಿ ನುಚ್ಚು (ದಾಲಿಯಾ), 1 ಈರುಳ್ಳಿ, 1 ಟೊಮೆಟೊ, 2 ಕ್ಯಾರೆಟ್, 1 ಬೀಟ್ ರೂಟ್, 1/2 ಕಟ್ಟು ಪಾಲಾಕ್, 1/2 ಕಪ್ ಬಟಾಣಿ, 6-8 ಬೀನ್ಸ್, 1 ಚಮಚ ಜೀರಿಗೆ, 1 ಚಮಚ ಮೆಣಸಿನ ಪುಡಿ, 2 ಹಸಿರು ಮೆಣಸಿನಕಾಯಿ, 1 ಪಲಾವ್ ಎಲೆ, ಎಣ್ಣೆ, ಉಪ್ಪು, ಕೊತ್ತಂಬರಿ.

ದಾಲಿಯಾ ಮಾಡುವ ವಿಧಾನ:
* ಬಾಣಲೆಯನ್ನು ಒಂದು ನಿಮಿಷ ಬಿಸಿ ಮಾಡಿ ಅದರಲ್ಲಿ ನುಚ್ಚನ್ನು ಹಾಕಿ 5 ನಿಮಿಷ ಹುರಿದುಕೊಳ್ಳಬೇಕು.

* ಕುಕ್ಕರಿನಲ್ಲಿ ಎಣ್ಣೆ ಹಾಕಿ ಕಾಯಿಸಿ, ಪಲಾವ್ ಎಲೆ, ಜೀರಿಗೆಯನ್ನು ಹುರಿದು ಅದಕ್ಕೆ ಕತ್ತರಿಸಿದ ಈರುಳ್ಳಿ ಹಾಕಿಕೊಳ್ಳಬೇಕು.

* ಈರುಳ್ಳಿ ಕೆಂಪಗಾಗುವ ತನಕ ಹುರಿದು ಟೊಮೆಟೊ ಬೆರೆಸಬೇಕು. 1 ನಿಮಿಷದ ನಂತರ ಮೆಣಸಿನಕಾಯಿ ಹಾಕಿ ಸ್ವಲ್ಪ ಉಪ್ಪು ಬೆರೆಸಬೇಕು ಆಗ ಬೇಗನೆ ಬೇಯುತ್ತದೆ.

* ಪಾಲಾಕ್ ಒಂದನ್ನು ಬಿಟ್ಟು, ಕತ್ತರಿಸಿಟ್ಟುಕೊಂಡಿದ್ದ ಎಲ್ಲ ತರಕಾರಿಗಳನ್ನು ಬೆರೆಸಿ ಚೆನ್ನಾಗಿ ತಿರುಗಿಸಿ ಕಡಿಮೆ ಉರಿಯಲ್ಲಿ 3-4 ನಿಮಿಷ ಬೇಯಿಸಬೇಕು.

* ನಂತರ ಪಾಲಾಕ್ ಮತ್ತು ಮೆಣಸಿನ ಪುಡಿಯನ್ನು ಹಾಕಿ ಚೆನ್ನಾಗಿ ಮಿಶ್ರಣ ಮಾಡಿ ಹುರಿದ ನುಚ್ಚನ್ನು ಬೆರೆಸಬೇಕು.

* ಎರಡು ಕಪ್ ನೀರು ಹಾಕಿ ಕುಕ್ಕರ್ ಮುಚ್ಚಿ ಕಡಿಮೆ ಉರಿಯಲ್ಲಿ ನಾಲ್ಕು ವಿಸಲ್ ಕೂಗುವ ತನಕ ಬೇಯಿಸಬೇಕು. ಮುಚ್ಚುಳ ತೆಗೆದ ನಂತರ ಚೆನ್ನಾಗಿ ತಿರುಗಿಸಿದರೆ ದಾಲಿಯಾ ಸವಿಯಲು ಸಿದ್ಧ.

ಈ ದಾಲಿಯಾಗೆ ಅಣಬೆ, ಹೂಕೋಸು ಹಾಕಿ ಮಾಡಿದರೆ ಇನ್ನೂ ಚೆನ್ನಾಗಿರುತ್ತದೆ. ಇದರ ಮೇಲೆ ಕೊತ್ತಂಬರಿ ಸೊಪ್ಪನ್ನು ಉದುರಿಸಿದರೆ ರುಚಿಯಾದ ದಾಲಿಯಾ ರೆಡಿಯಾಗಿರುತ್ತೆ.