ತರಾವರಿ ತರಕಾರಿ ಸಾಗು ಬೆಳಗ್ಗೆಗೇ ಚೆಂದ

Breakfast

oi-Sumalatha

By Sumalatha

Published: Monday, October 24, 2011, 22:19 [IST]

ವಿಧವಿಧ ತರಕಾರಿಗಳನ್ನು ಬಳಸಿ, ಮಸಾಲೆ ಬೆರೆಸಿ ಮಾಡುವ ಈ ವೆಜಿಟೆಬಲ್ ಸಾಗು ಎಲ್ಲರಿಗೂ ಇಷ್ಟವಾಗುವಂಥಅಡುಗೆ. ಈರುಳ್ಳಿ ಇಷ್ಟಪಡದವರಿಗೆ ಈ ಸಾಗು ಇನ್ನೂ ಅಚ್ಚುಮೆಚ್ಚಾಗುತ್ತೆ. ರುಚಿಯೊಂದಿಗೆ ಪೋಷಕಾಂಶವನ್ನೂ ಒದಗಿಸುವ ಈ ವೆಜಿಟೆಬಲ್ ಸಾಗು ಸುಲಭವಾಗಿ ಮಾಡೋದು ಹೇಗೆ ಎಂದು ತಿಳಿದುಕೊಳ್ಳಿ.

ತರಕಾರಿ ಸಾಗುವಿಗೆ ಏನೇನು ಬೇಕು?
ತರಕಾರಿಗಳು: 1 ದೊಡ್ಡ ಆಲೂಗಡ್ಡೆ, 2 ಕ್ಯಾರೆಟ್, 1/4 ಕೆ.ಜಿ ಬೀನ್ಸ್, 1 ಕಪ್ ಹಸಿ ಬಟಾಣಿ, ಒಂದು ಕಟ್ಟು ಪಾಲಾಕ್ ಸೊಪ್ಪು
ಮಸಾಲೆಗೆ: 3-4 ಹಸಿರು ಮೆಣಸಿನಕಾಯಿ, 2 ಚಮಚ ಹುರಿಗಡಲೆ, 1/2 ಕಪ್ ತೆಂಗಿನ ತುರಿ, 1 ಲವಂಗ, 1 ಚೆಕ್ಕೆ, ಉಪ್ಪು, 1 ಟೊಮೆಟೊ ಅಥವಾ ಹುಣಸೇರಸ, ಕೊತ್ತಂಬರಿ ಮತ್ತು ಪುದೀನಾ
ಅಲಂಕಾರಕ್ಕೆ: ಸಾಸಿವೆ, ಎಣ್ಣೆ, ನಿಂಬೆರಸ

ತರಕಾರಿ ಸಾಗು ಮಾಡುವ ವಿಧಾನ:
1. ಮಸಾಲೆಗೆಂದು ಮೇಲೆ ತಿಳಿಸಿರುವ ಎಲ್ಲ ಸಾಮಗ್ರಿಗಳನ್ನು ಪೇಸ್ಟ್ ನಂತೆ ರುಬ್ಬಿಕೊಳ್ಳಬೇಕು.
2. ಕತ್ತರಿಸಿದ ತರಕಾರಿಗಳನ್ನು ಕುಕ್ಕರಿನಲ್ಲಿ ಬೇಯಿಸಿಕೊಳ್ಳಬೇಕು.
3. ಬೇಯಿಸಿದ ತರಕಾರಿಗೆ ರುಬ್ಬಿದ ಮಸಾಲೆ ಬೆರೆಸಿ ಕುದಿಯುವವರೆಗು ತಿರುಗಿಸುತ್ತಿರಬೇಕು.
4. ಬಾಣಲೆಯಲ್ಲಿ ಎಣ್ಣೆ ಕಾಯಿಸಿ ಅದಕ್ಕೆ ಸಾಸಿವೆ ಹಾಕಿ ತರಕಾರಿ ಮಿಶ್ರಣಕ್ಕೆ ಬೆರೆಸಬೇಕು. ಕೊನೆಗೆ ಇದರ ಮೇಲೆ ಕೆಲವು ಹನಿ ನಿಂಬೆರಸ ಹಾಕಬೇಕು.

ಈಗ ಟೇಸ್ಟಿ ತರಕಾರಿ ಸಾಗು ಬೇಗನೆ ಸಿದ್ಧಗೊಂಡಿರುತ್ತೆ. ಪೂರಿ, ಚಪಾತಿ, ಇಡ್ಲಿ, ದೋಸೆ ಯಾವುದಕ್ಕಾದರೂ ಸರಿ, ಇದು ಸಖತ್ ಕಾಂಬಿನೇಶನ್. ಬಿಸಿ ಅನ್ನದ ಜೊತೆಗೂ ಇದನ್ನು ಬೆರೆಸಿ ತಿಂದರೆ ರುಚಿಯಾಗಿರುತ್ತೆ.