ದಿಢೀರ್ ಗೋಧಿ ಹಿಟ್ಟಿನ ಚಕ್ಕುಲಿ

* ತೇಜಸ್ವಿನಿ ಹೆಗಡೆ, ಬೆಂಗಳೂರು

ತಯಾರಿಸಲು ಬೇಕಾಗುವ ಸಾಮಗ್ರಿಗಳು

* ಗೋಧಿ ಹಿಟ್ಟು - 2 ಲೋಟ
* ಅಚ್ಚ ಖಾರದ ಪುಡಿ - ಖಾರಕ್ಕೆ ತಕ್ಕಷ್ಟು
* ಉಪ್ಪು - ರುಚಿಗೆ ತಕ್ಕಷ್ಟು
* ಬಿಳೇ ಎಳ್ಳು ಅಥವಾ ಕರೀ ಎಳ್ಳು - 1 ಚಮಚ
* ಇಂಗು - ಕಡಲೇಕಾಳು ಗಾತ್ರದಷ್ಟು
* ಕರಿಯಲು ಎಣ್ಣೆ - ಪ್ರಮಾಣಕ್ಕೆ ತಕ್ಕಂತೆ

ಮಾಡುವ ವಿಧಾನ

* ಮೊದಲಿಗೆ ಗೋಧಿ ಹಿಟ್ಟನ್ನು ಒಂದು ಒಣಗಿನ ತೋಪಿನಲ್ಲಿ ಹಾಕಿ, ಇಡ್ಲಿ ಬೇಯಿಸುವ ದಳ್ಳೆಯಲ್ಲಿ ಹಿಟ್ಟಿಗೆ ನೀರನ್ನು ಹಾಕದೇ ಹಾಗೇ ಸುಮಾರು 20 ನಿಮಿಷಗಳ ಕಾಲ ಬೇಯಿಸಬೇಕು.
* 20 ನಿಮಿಷಗಳಲ್ಲಿ ಹಿಟ್ಟು ಗಟ್ಟಿಯಾಗಿ ಬೆಂದಿರುತ್ತದೆ. ನಂತರ ಅದು ತಣಿದ ಮೇಲೆ ಹೊರ ತೆಗೆದು, ಸರಿಯಾಗಿ ಕೈಯಲ್ಲೇ ಹುಡಿಮಾಡಬೇಕು.
* ಚೆನ್ನಾಗಿ ಹುಡಿ ಹುಡಿಯಾದ ಹಿಟ್ಟಿಗೆ ಕೈಯಾಡಿಸಲು ಆಗುವಷ್ಟು ಬಿಸಿ ನೀರನ್ನು ಹಾಕಿ ಜೊತೆಗೆ ಇಂಗಿನ ನೀರು, ಖಾರದ ಪುಡಿ, ಉಪ್ಪು, ಎಳ್ಳು ಎಲ್ಲವನ್ನೂ ಸೇರಿಸಿ ಚಕ್ಕುಲಿ ಹಿಟ್ಟಿನ ಹದಕ್ಕೆ ಕಲಸಬೇಕು.
* ಬಾಣಲೆಯೊಳಗೆ ಎಣ್ಣೆಯನ್ನು ಹಾಕಿ ಅದು ಬಿಸಿಯಾಗಲು, ಕಲಸಿಟ್ಟ ಹಿಟ್ಟನ್ನು ಚೆನ್ನಾಗಿ ಒಮ್ಮೆ ನಾದಿ, ಚಕ್ಕುಲಿ ಮಟ್ಟಿನೊಳಗೆ ತುಂಬಿ, ಗರಿ ಗರಿಯಾಗಿ ಕರಿಯಬೇಕು.
* ಗರಿ ಗರಿ ಚಕ್ಕುಲಿಯನ್ನು ಒಣಗಿದ ಗಾಳಿಯಾಡದ ಡಬ್ಬದಲ್ಲಿ ತುಂಬಿಟ್ಟರೆ ಸುಮಾರು ಒಂದು ತಿಂಗಳವರೆಗೂ ರುಚಿ ಕೆಡದಂತೆ ಇರುವುದು.