ಗರ್ಭಿಣಿಯರಿಗೂ ಬೆನ್ನೇರಿ ಕಾಡುವ ಒತ್ತಡದ ಸಮಸ್ಯೆ....

ಒತ್ತಡದ ಕಾರಣಗಳನ್ನು ಕಂಡುಕೊಳ್ಳಿ

ನಿಮ್ಮ ಒತ್ತಡಕ್ಕೆ ಏನು ಕಾರಣವಾಗಿರಬಹುದು ಎಂದು ಕಂಡುಕೊಳ್ಳಲು ಪ್ರಯತ್ನಿಸಿ. ಸಾಮಾನ್ಯವಾಗಿ ನಾವೆಲ್ಲರೂ ನೇರವಾಗಿಯೇ ಯೋಚಿಸುತ್ತೇವೆ. ಇನ್ನೊಬ್ಬರ ದೃಷ್ಟಿಯಿಂದ ನೋಡಲು ಅಥವಾ ಭಿನ್ನ ದೃಷ್ಟಿಕೋನದಿಂದ ನೋಡಿ. ಆಗ ನಮ್ಮ ಚರ್ಯೆಯಲ್ಲಿ ಇರುವ ತೊಂದರೆ ಅಥವಾ ಕಾರಣಗಳು ಕಂಡುಬರುತ್ತವೆ. ಸದಾ ಧನಾತ್ಮಕವಾಗಿ ಯೋಚಿಸಿ. ಒತ್ತಡಕ್ಕೆ ಕಾರಣ ಗೊತ್ತಾಯಿತೋ, ಇದಕ್ಕೆ ಪರಿಹಾರವೂ ಸುಲಭ

ಸಾಕಷ್ಟು ವಿಶ್ರಾಂತಿ ತೆಗೆದುಕೊಳ್ಳಿ.

ಗರ್ಭಾವಸ್ಥೆಯಲ್ಲಿ ಸಾಕಷ್ಟು ವಿಶ್ರಾಂತಿ ಅಗತ್ಯ. ದಿನದ ಚಟುವಟಿಕೆಯಲ್ಲಿ ವಿಶ್ರಾಂತಿ ಇಲ್ಲದಿರುವುದು ಮತ್ತು ಅನವರತ ನಿದ್ದೆಯ ಕಾರಣ ಚಡಪಡಿಕೆ, ಮನದಲ್ಲಿ ಋಣಾತ್ಮಕ ಚಿಂತನೆ ಮೊದಲಾದವು ಮೂಡುತ್ತವೆ. ಇವು ಒತ್ತಡಕ್ಕೆ ಕಾರಣವಾಗುತ್ತವೆ. ಆದ್ದರಿಂದ ದಿನಕ್ಕೆ ಸಾಕಷ್ಟು ಕಾಲ ತಡೆಯಿಲ್ಲದ ನಿದ್ದೆ ಮಾಡಿ.

ಆರೋಗ್ಯಕರ ಆಹಾರ ಸೇವಿಸಿ

ಗರ್ಭಾವಸ್ಥೆಯಲ್ಲಿ ಸಂತುಲಿತ ಆಹಾರದ ಸೇವನೆ ಅತಿ ಮುಖ್ಯ.ಇದರಿಂದ ದೇಹಕ್ಕೆ ಅಗತ್ಯ ಪೋಷಕಾಂಶಗಳು ದೊರಕುವುದರ ಜೊತೆಗೇ ಮಾನಸಿಕ ದುಗುಡವೂ ಕಡಿಮೆಯಾಗುತ್ತದೆ. ಗರ್ಭದ ಮಗುವಿನ ಬೆಳವಣಿಗೆಯೂ ಸಮರ್ಪಕವಾಗಿ ಮುಂದುವರೆಯುತ್ತದೆ.

ಅರ್ಧ ಗಂಟೆಯ ವ್ಯಾಯಮ

ಗರ್ಭಾವಸ್ಥೆಯಲ್ಲಿ ದಿನಕ್ಕೆ ಅರ್ಧಘಂಟೆಯಾದರೂ ಸರಳ ವ್ಯಾಯಮಗಳನ್ನು ಮಾಡುವುದು ಅಗತ್ಯ. ನಿಯಮಿತವಾಗಿ, ದಿನಕ್ಕೆ ಒಂದು ಸೂಕ್ತ ವೇಳೆಯನ್ನು ನಿಗದಿಪಡಿಸಿ ಆ ವೇಳೆಯನ್ನು ವ್ಯಾಯಾಮಕ್ಕೆ ಮುಡಿಪಾಗಿಡಿ. ಇದರಿಂದ ದೇಹದ ಜೊತೆಗೇ ಮನಸ್ಸಿಗೂ ಮುದ ನೀಡಿದಂತಾಗುತ್ತದೆ. ನಿಯಮಿತ ವ್ಯಾಯಾಮದಿಂದ ದೇಹದಲ್ಲಿ ಒತ್ತಡ ಮತ್ತು ದುಗುಡಕ್ಕೆ ಕಾರಣವಾಗಿರುವ ಕಾರ್ಟಿಸೋಲ್ ಎಂಬ ರಸದೂತದ ಮಟ್ಟ ಕಡಿಮೆಯಾಗುವಂತೆ ಮಾಡಿ ಒತ್ತಡದಿಂದ ಮುಕ್ತರಾಗಬಹುದು.

ಧ್ಯಾನ

ಮನಸ್ಸನ್ನು ನಿರಾಳವಾಗಿಸಲು ಧ್ಯಾನಕ್ಕಿಂತ ಪರಿಣಾಮಕಾರಿಯಾದ ವಿಧಾನ ಇನ್ನೊಂದಿಲ್ಲ. ಗರ್ಭಾವಸ್ಥೆಯಲ್ಲಿ ಇದರ ಮಹತ್ವ ಇನ್ನೂ ಹೆಚ್ಚು. ಇದರಿಂದ ಮನಸ್ಸನ್ನು ನಿರಾಳವಾಗಿಸಲು ಮತ್ತು ಒತ್ತಡಗಳಿಂದ ಮುಕ್ತಿ ಪಡೆಯಲು ಸಾಧ್ಯವಾಗುತ್ತದೆ. ಈ ದಿನಗಳಲ್ಲಿ ಅನುಸರಿಸಬಹುದಾದ ಕೆಲವು ಯೋಗಾಸನಗಳೂ ಒತ್ತಡ ನಿವಾರಿಸಲು ಮತ್ತು ಮಾನಸಿಕವಾಗಿ ಶಾಂತವಾಗಿರಲು ನೆರವಾಗುತ್ತದೆ. ಇದರ ಜೊತೆಗೇ ಮನಸ್ಸಿಗೆ ಮುದ ನೀಡುವ ಸಂಗೀತ ಕೇಳುವುದರಿಂದಲೂ ಒತ್ತಡಕ್ಕೆ ಕಾರಣವಾಗುವ ಚಿಂತನೆಗಳಿಂದ ದೂರವಿದ್ದು ನಿರಾಳತೆ ಅನುಭವಿಸಬಹುದು.

ಸಮೀಕ್ಷೆಯ ಪ್ರಕಾರ

ಒಂದು ಸಮೀಕ್ಷೆಯ ಪ್ರಕಾರ ಶೇ 60ರಷ್ಟು ಭಾರತೀಯ ಗರ್ಭಿಣಿಯರು ಅನುಭವಿಸುವ ಒತ್ತಡಕ್ಕೆ ಕಾರಣ ಹಿರಿಯರ ಗಂಡು ಮಗುವೇ ಬೇಕು ಎಂಬ ಹಂಬಲ. ಭಾರತೀಯ ಕಾನೂನಿನಲ್ಲಿ ಲಿಂಗಪತ್ತೆಗೆ ಅವಕಾಶವಿಲ್ಲದ ಕಾರಣ ಗರ್ಭಿಣಿಗೂ ಈ ಬಗ್ಗೆ ತಿಳಿಯದೇ ಇರುವುದು ಮತ್ತು ಹೆರಿಗೆಯ ದಿನದವರೆಗೂ ಈ ಬಗ್ಗೆ ಚಿಂತಿಸುತ್ತಾ, ದೇವರಲ್ಲಿ ಪ್ರಾರ್ಥಿಸುತ್ತಾ ಇರುವುದೇ ಒತ್ತಡಕ್ಕೆ ಪ್ರಮುಖ ಕಾರಣವಾಗಿದೆ. ಇದರಿಂದ ಹೊರಬರಲು ಗರ್ಭಿಣಿ ಒಂದು ಬಾರಿಯಾದರೂ ದಿಟ್ಟತನ ತೋರುವ ಅವಶ್ಯಕತೆ ಇದೆ.

ಸಮೀಕ್ಷೆಯ ಪ್ರಕಾರ

ಮಗುವಿನ ಲಿಂಗವನ್ನು ತಂದೆಯ ಅಂಶ ನಿರ್ಧರಿಸುತ್ತದೆಯೇ ಹೊರತು ತಾಯಿಯ ಅಂಶವಲ್ಲ ಎಂದು ಇಂದು ವಿಜ್ಞಾನ ಸ್ಪಷ್ಟವಾಗಿ ನಿರೂಪಿಸಿದೆ. ಈ ವಿಷಯವನ್ನು ದಿಟ್ಟತನದಿಂದ, ಇದು ಸಾಧ್ಯವಾಗದಿದ್ದರೆ ನಿಮ್ಮ ಕುಟುಂಬ ವೈದ್ಯರ ಸಹಾಯದಿಂದ, ಆಪ್ತರ ನೆರವಿನಿಂದ ಹಿರಿಯರಿಗೆ ಮನದಟ್ಟು ಮಾಡಿಸುವುದು ಅಗತ್ಯವಾಗಿದೆ. ಇದನ್ನು ಅರ್ಥಮಾಡಿಕೊಂಡ ಬಳಿಕ ಹಿರಿಯರ ನಡವಳಿಕೆ ಬದಲಾದರೆ ಗರ್ಭಿಣಿಯ ಒತ್ತಡ ಶೇಖಡಾ ತೊಂಭತ್ತೊಂಭತ್ತು ಭಾಗ ಕರಗಿ ಹೋಗುತ್ತದೆ.