ಮಗುವಿನ ತಲೆ ಚಪ್ಪಟೆಯಾಗದಂತೆ ತಡೆಯಲು ಸಲಹೆ

ಮನೆಯಲ್ಲಿ ಅಜ್ಜಿ ಇದ್ದರೆ ಮೊಮ್ಮಗಳಿಗೆ ಹೆರಿಯಾದಾಗ ಅಥವಾ ಮೊಮ್ಮಗನಿಗೆ ಮಗುವಾದಾಗ ಮಗುವನ್ನು ಸ್ನಾನ ಮಾಡಿಸುವುದು ಹೇಗೆ? ದೇಹವನ್ನು ಹೇಗೆ ತಿಕ್ಕಬೇಕು? ಮೂಗನ್ನು ಎಳೆಯುವುದು, ಹಣೆಯನ್ನು ತೀಡುವುದು, ಎದೆಗೆ ಮಸಾಜ್ ಮಾಡುವುದು ಹೀಗೆ ಮಗುವನ್ನು ಹೇಗೆ ಆರೈಕೆ ಮಾಡಬೇಕು ಅನ್ನುವುದನ್ನು ಹೇಳಿ ಕೊಡುತ್ತಾರೆ. ಅವರು ಹೇಳುವ ಸಲಹೆಗಳು ಮಗು ಸದೃಢವಾಗಿ, ರೂಪವಂತನಾಗಿ/ಳಾಗಿ ಬೆಳೆಯಲು ಸಹಾಯ ಮಾಡುತ್ತವೆ.

ಚಿಕ್ಕ ಮಕ್ಕಳು ತುಂಬಾ ಸೂಕ್ಷ್ಮ. ಅವರನ್ನು ತುಂಬಾ ಜೋಪಾನವಾಗಿ ಎತ್ತಿಕೊಳ್ಳಬೇಕು, ಮಲಗಿಸಬೇಕು. ನಾವು ಎತ್ತಿಸುವುದು , ಮಲಗುವುದು ಸರಿಯಿಲ್ಲದಿದ್ದರೆ ಮಗುವಿನ ಒಂದು ಕಡೆ ಸ್ವಲ್ಪ ಚಪ್ಪಟೆಯಾಗುತ್ತದೆ. ಅದನ್ನು ಹಾಗೇ ಬಿಟ್ಟರೆ ಮಗು ಬೆಳೆದು ದೊಡ್ಡದಾದ ಮೇಲೂ ತಲೆ ಚಪ್ಪಟೆಯಾಗಿ ಕಂಡು ಮಗುವಿನ ಸೌಂದರ್ಯಕ್ಕೆ ಕುಂದು ತರುವುದು. ಈ ಕೆಳಗಿನ ಸಲಹೆಗಳನ್ನು ಪಾಲಿಸಿದರೆ ಮಗುವಿನ ತಲೆ ಚಪ್ಪಟೆಯಾಗದಂತೆ ನೋಡಿಕೊಳ್ಳಬಹುದು.

ಮಲಗಿ ಹಾಲು ಕೊಡಬೇಡಿ: ಬಾಣಂತಿಯರು ಮಗುವಿಗೆ ಹಾಲು ಕೊಡುವಾಗ ಎದ್ದು ಕೂತು ಕೊಡಬೇಕು. ಮಲಗಿ ಕೊಟ್ಟರೆ ತಲೆ ಚಪ್ಪಟೆಯಾಗುತ್ತದೆ.

ಎತ್ತುವಾಗ ಜೋಪಾನ: ಮಗುವಿನ ಎತ್ತುವಾಗ ಮಗುವಿನ ತಲೆ ಸರಿಯಾಗಿ ಹಿಡಿಯಬೇಕು. ನಮ್ಮ ಅಂಗೈ ಒಳಗೆ ಮಗುವಿನ ತಲೆಯಿರಬೇಕು.

ದಿಂಬು: ಮಗುವಿನ ತಲೆ ಚಪ್ಪಟೆಯಾಗಿದ್ದರೆ ಅದಕ್ಕೆ ಸಾಸಿವೆಯಿಂದ ದಿಂಬು ಮಾಡಿ ಇಟ್ಟರೆ ತಲೆ ರೌಂಡಾಗುವುದು. ಮಗುವನ್ನು ಮಲಗಿಸುವಾಗ ಬಟ್ಟೆಯನ್ನು ಸುಳಿ ಸುತ್ತಿ ಚಿಕ್ಕ ದಿಂಬು ರೀತಿ ಮಾಡಿ ಮಲಗಿಸಿ. ಮಗು ಕುತ್ತಿಗೆಯನ್ನು ಒಂದೇ ಬದಿಯಲ್ಲಿಟ್ಟ ಮಲಗುವ ಅಭ್ಯಾಸ ರೂಡಿಸಿಕೊಂಡರೆ ತಲೆ ಚಪ್ಪಟೆಯಾಗುವುದು. ಮಗು ನಿದ್ರೆ ಮಾಡುವಾಗ ಅದರ ತಲೆಯನ್ನು ಸರಿಯಾಗಿ ಇಡಿ, ಒಂದು ಕಡೆ ವಾಲಿ ಮಲಗಲು ಬಿಡಬೇಡಿ.

ಒಂದೇ ಕಡೆ ನೋಡಲು ಬಿಡಬೇಡಿ: ಮಗು ಒಂದೇ ಕಡೆ ನೋಡುತ್ತಾ ಆಟ ಆಡುತ್ತಿದ್ದರೆ ಮಗುವಿನ ಗಮನವನ್ನು ಬೇರೆ ಕಡೆ ತಿರುಗಿಸಿ. ಒಂದು ಕಡೆ ನೋಡುತ್ತಾ ಮಲಗಿದರೆ ಕೂಡ ತಲೆ ಚಪ್ಪಟೆಯಾಗುವುದು.

ಮಸಾಜ್ : ಸ್ನಾನ ಮಾಡಿಸುವ ಮುನ್ನ ತಲೆಗೆ ಎಣ್ಣೆ ಹಾಕಿ ಮಸಾಜ್ ಮಾಡಿ. ಇದರಿಂದ ಕೂಡ ತಲೆಯನ್ನು ಉದ್ದ ಅಥವಾ ಚಪ್ಪಟೆಯಾಗದಂತೆ ತಡೆಯಬಹುದು.