ದ್ರೌಪದಿ ಪಂಚ ಪಾಂಡವರನ್ನು ಪತಿಯಾಗಿ ಏಕೆ ಪಡೆದಳು?

ಈಶ್ವರನ ವರ

ಹಿಂದಿನ ಜನ್ಮದಲ್ಲಿ ದ್ರೌಪದಿಯು ಒಬ್ಬ ತಪಸ್ವಿಯ ಮಗಳಾಗಿದ್ದಳು. ಆಕೆಯು ಮದುವೆಯಾಗದೆ ಇದ್ದ ಕಾರಣದಿಂದ, ಅಸಂತೋಷದಿಂದ ಕೂಡಿದ್ದಳು. ಇದರಿಂದ ನಿರಾಶೆಗೊಂಡ ಆಕೆಯು ಈಶ್ವರನನ್ನು ಮೆಚ್ಚಿಸುವ ಸಲುವಾಗಿ ತಪಸ್ಸನ್ನು ಕೈಗೊಂಡಳು. ಸುಮಾರು ವರ್ಷದ ತಪಸ್ಸಿನ ನಂತರ ಆಕೆಯು ಪರಮೇಶ್ವರನನ್ನು ಮೆಚ್ಚಿಸಲು ಯಶಸ್ವಿಯಾದಳು. ಆಕೆಯ ಮುಂದೆ ಪ್ರತ್ಯಕ್ಷನಾದ ಶಿವನು ವರವೇನು ಬೇಕೆಂದು ಕೇಳಿದನು. ಆಗ ಆಕೆಯು ಐದು ಗುಣಗಳಿರುವ ಗಂಡ ತನಗೆ ಬೇಕೆಂದು ಕೇಳಿದಳು.

ಗುಣಗಳು

ದ್ರೌಪದಿಯು ತನ್ನ ಗಂಡನಾಗುವವನಲ್ಲಿ ಐದು ಗುಣಗಳು ಇರಬೇಕೆಂದು ಕೇಳಿದಳು. ಒಂದು ಆತ ಆದರ್ಶ ಪುರುಷನಾಗಿರಬೇಕು, ಎರಡು ಒಬ್ಬ ಶೂರನಾಗಿರಬೇಕು. ಮೂರು ನೋಡಲು ಸುಂದರನಾಗಿರಬೇಕು, ಜ್ಞಾನಿಯಾಗಿರಬೇಕು ಮತ್ತು ಐದು ಅವನು ಪ್ರೀತಿ ಮತ್ತು ವಾತ್ಸಲ್ಯವನ್ನು ಹೊಂದಿರಬೇಕು.

ಒಬ್ಬನೆ ಒಬ್ಬನಲ್ಲ

ಇದನ್ನು ಕೇಳಿ ಈಶ್ವರನು ಕೆಲ ಕಾಲ ಆಲೋಚಿಸಿದನು ಮತ್ತು ಈ ಐದು ಗುಣಗಳು ಒಬ್ಬ ಗಂಡಸಲ್ಲಿ ದೊರೆಯುವುದಿಲ್ಲ ಎಂದು ಹೇಳಿದನು. ಆದ್ದರಿಂದ ದ್ರೌಪದಿಗೆ ಮುಂದಿನ ಜನ್ಮದಲ್ಲಿ ಐದು ಜನ ಗಂಡಂದಿರನ್ನು ಪ್ರತ್ಯೇಕವಾಗಿ, ಆಕೆ ಕೇಳಿದ ಐದು ಗುಣಗಳೊಂದಿಗೆ ನೀಡುವುದಾಗಿ ಹೇಳಿದನು. ಹೀಗಾಗಿ ದ್ರುಪದ ಮಹಾರಾಜನ ಮಗಳಾಗಿ ದ್ರೌಪದಿ ಜನಿಸಿದಾಗ, ಆಕೆಯ ಹಿಂದಿನ ಜನ್ಮದ ಕೋರಿಕೆಯಂತೆ ಆಕೆ ಐದು ಜನ ಅಣ್ಣ-ತಮ್ಮಂದಿರನ್ನು ಮದುವೆಯಾದಳು.

ಬಹುಪತಿತ್ವದ ಆಚರಣೆ

ಪುರಾಣದ ಹೊರತಾಗಿ ನಾವು ಹಿಂದಿನ ಕಾಲದಲ್ಲಿ ಆಚರಣೆಯಲ್ಲಿದ್ದ, ಬಹುಪತಿತ್ವ ಮತ್ತು ಬಹುಪತ್ನಿತ್ವದ ಆಚರಣೆಗಳನ್ನು ಮರೆಯುವಂತಿಲ್ಲ. ಬಹುಪತಿತ್ವಕ್ಕೆ ವಾಯುವ್ಯ ಭಾರತದಲ್ಲಿ ಹೆಣ್ಣು ಮಕ್ಕಳ ಕೊರತೆಯೇ ಕಾರಣ ಎಂದು ಸಹ ತಿಳಿದು ಬಂದಿದೆ. ಇಂದಿಗು ರಾಜಸ್ತಾನ, ಉತ್ತರ ಪ್ರದೇಶ, ಹರಿಯಾಣದಲ್ಲಿ ಗಂಡು ಮಕ್ಕಳಿಗೆ ಹೋಲಿಸಿದರೆ ಹೆಣ್ಣು ಮಕ್ಕಳ ಸಂಖ್ಯೆ ತುಂಬಾ ಕಡಿಮೆಯೇ ಇದೆ. ಪ್ರಾಚೀನ ಹಸ್ತಿನಾಪುರವು ಈ ಸ್ಥಳಗಳಿಗೆ ಸಮೀಪದಲ್ಲಿಯೇ ನೆಲೆಗೊಂಡಿತ್ತು. ಹೀಗಾಗಿ ಪಾಂಡವರಿಗೆ ಅನುರೂಪಳಾದ ಹೆಂಡತಿ ದೊರೆಯಲಿಲ್ಲದ ಕಾರಣದಿಂದಾಗಿ ದ್ರೌಪದಿಯು ಐದು ಜನ ಅಣ್ಣ-ತಮ್ಮಂದಿರನ್ನು ಮದುವೆಯಾದಳು ಎಂದು ಹೇಳಬಹುದು.

ತಾಯಿಯ ಕಾರ್ಯ ತಂತ್ರ

ಸ್ವಯಂವರದಲ್ಲಿ ದ್ರೌಪದಿಯನ್ನು ಜಯಿಸಿ ತಂದ ಮೇಲೆ, ಅರ್ಜುನನು ಉದ್ದೇಶ ಪೂರ್ವಕವಾಗಿ ತನ್ನ ತಾಯಿಯನ್ನು ಕುರಿತು " ಮಾತೆ ನೋಡು, ನಾವು ಏನನ್ನು ತಂದಿದ್ದೇವೆ" ಎಂದು ಹೇಳಿದನು. ಇದನ್ನು ಕೇಳಿದ ಕುಂತಿಯು ಆಲೋಚಿಸದೆ ಮತ್ತು ಅತ್ತ ಸಹ ತಿರುಗಿ ನೋಡದೆ, ಏನನ್ನು ತಂದಿರುವಿರೋ, ಅದನ್ನು ಎಲ್ಲರು ಸಮಾನವಾಗಿ ಐದು ಜನ ಹಂಚಿಕೊಳ್ಳಿ ಎಂದು ಹೇಳಿದಳು. ಹೀಗೆ ತಾಯಿಯ ಮಾತಿನಂತೆ ಅವರೆಲ್ಲರು ದ್ರೌಪದಿಯನ್ನು ಹೆಂಡತಿಯನ್ನಾಗಿ ಸ್ವೀಕರಿಸಿದರು. ಇದನ್ನು ಮತ್ತೊಂದು ಮಗ್ಗುಲಿನಿಂದ ನೋಡಿದರೆ ಕುಂತಿಯು ತನ್ನ ಐದು ಮಕ್ಕಳನ್ನು ಒಗ್ಗಟ್ಟಾಗಿ ಇಡಲು, ಯುದ್ಧದ ಸಂದರ್ಭದಲ್ಲಿ ಅವರು ಬೇರೆಯಾಗದಂತೆ ಕಾಪಾಡಲು ಈ ಕಾರ್ಯವನ್ನು ಮಾಡಿದಳು ಎಂದು ತೋರುತ್ತದೆ. ಏಕೆಂದರೆ ದ್ರೌಪದಿಯ ಅಪರಿಮಿತ ಸೌಂದರ್ಯವು ಮಕ್ಕಳನ್ನು ಬೇರೆ ಮಾಡಬಹುದು ಎಂಬ ಗುಮಾನಿ ಆಕೆಗಿತ್ತು. ಏಕೆಂದರೆ ಎಲ್ಲರೂ ಆಕೆಯ ಸೌಂದರ್ಯಕ್ಕೆ ಮಾರು ಹೋಗಿದ್ದರು. ಹೀಗಾಗಿ ಕುಂತಿಯು ಬುದ್ಧಿಪೂರ್ವಕವಾಗಿ ದ್ರೌಪದಿಯನ್ನು ಐದು ಜನರ ಹೆಂಡತಿಯನ್ನಾಗಿ ಮಾಡಿದಳು. ಹೀಗೆ ಅವರು ದ್ರೌಪದಿಗಾಗಿ ತಮ್ಮ ತಮ್ಮಲ್ಲೆ ಬಡಿದಾಡಿಕೊಳ್ಳದಂತೆ ಸಹ ಮಾಡಿದಳು.