ತಾಳ್ಮೆ ಇದ್ರೆ ಹತ್ತು ವರ್ಷ, ಇಲ್ದಿದ್ರೆ ಇಪ್ಪತ್ತು ವರ್ಷ

Short Story

oi-Prasad

By Prasad

Updated: Thursday, March 14, 2013, 12:40 [IST]

ಒಬ್ಬ ವಿದ್ಯಾರ್ಥಿ ಸಮರ ಕಲೆ ಕಲಿಯಲೆಂದು ಗುರುಗಳ ಬಳಿ ಸೇರಿಕೊಂಡಿದ್ದ. ಆತನಲ್ಲಿ ಸಮರ ಕಲೆ ಕಲಿಯಲು ಶ್ರದ್ಧೆ, ಉತ್ಸಾಹ, ಆಸಕ್ತಿ ಎಲ್ಲ ಇತ್ತು, ತಾಳ್ಮೆಯೊಂದನ್ನು ಹೊರತುಪಡಿಸಿ. ಆದಷ್ಟು ಬೇಗನೆ ಎಲ್ಲ ಕಲೆಯನ್ನು ಕಲಿತುಬಿಡಬೇಕೆಂಬ ತುಡಿತದಿಂದ ತನ್ನ ಗುರುಗಳ ಬಳಿ ಒಂದು ದಿನ ಬಂದ.

ವಿದ್ಯಾರ್ಥಿಯು ತನ್ನ ಗುರುಗಳ ಬಳಿಗೆ ತೆರಳಿ "ಸಮರ ವ್ಯವಸ್ಥೆಗೆ ನನ್ನನ್ನು ನಾನು ಸಂಪೂರ್ಣವಾಗಿ ಅರ್ಪಿಸಿಕೊಂಡಿದ್ದೇನೆ. ಇದರಲ್ಲಿ ನಾನು ಗುರುವಾಗಲು ಎಷ್ಟು ವರ್ಷಗಳು ಬೇಕಾಗುತ್ತದೆ" ಎಂದು ಶ್ರದ್ಧೆಯಿಂದ ಕೇಳಿದನು.

ಆ ವಿದ್ಯಾರ್ಥಿಯನ್ನು ಅಪಾದಮಸ್ತಕವಾಗಿ ನೋಡಿದ ಗುರುಗಳು ಸಹಜವಾಗಿಯೇ "ಹತ್ತು ವರ್ಷಗಳು" ಎಂದು ಉತ್ತರಿಸಿದರು. ಈ ಉತ್ತರ ವಿದ್ಯಾರ್ಥಿಗೆ ರುಚಿಸಲಿಲ್ಲ.

ತಾಳ್ಮೆ ಇಲ್ಲದೇ ಆ ವಿದ್ಯಾರ್ಥಿ ಮತ್ತೆ ಗುರುಗಳಿಗೆ, "ಗುರುಗಳೇ ನಾನು ಅದಕ್ಕಿಂತ ಬೇಗನೇ ಈ ವಿದ್ಯೆಯಲ್ಲಿ ಗುರುವಾಗಬೇಕು. ಇದಕ್ಕಾಗಿ ನಾನು ಕಠಿಣ ಶ್ರಮ ವಹಿಸಿ ಅಭ್ಯಾಸ ಮಾಡ್ತೀನಿ. ಪ್ರತಿ ಪ್ರತಿ ದಿನವೂ ದಿನ ಹತ್ತು ಗಂಟೆಗಳಿಗಿಂತ ಹೆಚ್ಚು ಸಮಯ ನಾನು ಅಭ್ಯಾಸ ಮಾಡುತ್ತೇನೆ. ಹೀಗೆ ಮಾಡಿದಾಗ ನಾನು ಗುರುವಾಗಲು ಎಷ್ಟು ಸಮಯ ತೆಗೆದುಕೊಳ್ಳುತ್ತೇನೆ?" ಎಂದು ಮತ್ತೆ ಕೇಳಿದನು.

ಆಗ ಗುರುಗಳು ಒಂದು ಕ್ಷಣ ಯೋಚಿಸಿ "ಇಪ್ಪತ್ತು ವರ್ಷಗಳು" ಎಂದು ಹೇಳಿದರು.

(ಈ ಕಥೆಯ ಮತ್ತೊಂದು ಆವೃತ್ತಿಯಲ್ಲಿ ವಿದ್ಯಾರ್ಥಿಯು "ಜ್ಞಾನೋದಯ"ವನ್ನು ಪಡೆಯಲು ಉತ್ಸುಕನಾಗಿದ್ದೇನೆ ಎಂದು ಹೇಳುತ್ತಾನೆ.)