ಪಗ್ ನಾಯಿಯ ಆರೋಗ್ಯದ ಕಡೆಗೂ ಗಮನ ಕೊಡಿ

ಪಗ್ ಆರೋಗ್ಯ ಕಾಪಾಡಲು ಸುಲಭ ಸಲಹೆ:

1. ಕ್ರಿಮಿನಿರೋಧಕ ಸ್ಪ್ರೇ: ಕ್ರಿಮಿ ಕೀಟಗಳು ನಾಯಿಯ ಕೂದಲಿಗೆ ಸೇರಿಕೊಂಡು ಆರೋಗ್ಯ ತೊಂದರೆ ಉಂಟು ಮಾಡುತ್ತದೆ. ಇಂತಹ ಸಮಯದಲ್ಲಿ ಪಶು ವೈದ್ಯರನ್ನು ಸಂಪರ್ಕಿಸಿ ಕ್ರಿಮಿ ನಿರೋಧಕ ಕ್ರೀಂ ಹಾಗೂ ಸೊಳ್ಳೆ ನಿರೋಧಕ ಮತ್ತು ಕ್ರಿಮಿ ನಿರೋಧಕ ಸ್ಪ್ರೇಗಳನ್ನು ನಾಯಿಗೆ ಬಳಸಬಹುದು. ನಾಯಿಯನ್ನು ಆಗಾಗ್ಗೆ ಸ್ನಾನ ಮಾಡಿಸುವುದೂ ಕೂಡ ಕ್ರಿಮಿಯನ್ನು ದೂರವಿಡಲು ಸಹಾಯಕ.

2. ಹೆಚ್ಚು ತೂಕವಿರದಿರಲಿ: ಪಗ್ ದುಂಡಗಿದ್ದರೇನೆ ಚೆಂದ. ಆದರೆ ಅತಿ ದಪ್ಪಗಾದರೆ ಆರೋಗ್ಯಕ್ಕೆ ಮಾರಕವಾಗಬಹುದು. ಬೊಜ್ಜಿನ ಸಮಸ್ಯೆ ಹೆಚ್ಚಿಸಿ ಅತಿಯಾದ ತೂಕ ನಾಯಿಗೆ ಕಾಲು ನೋವನ್ನೂ ಕೊಡಬಹುದು. ಅದರಲ್ಲೂ ಪಗ್ ಗೆ ಬೊಜ್ಜು ಹೆಚ್ಚಾದರೆ ಕಣ್ಣು ಮತ್ತು ಕಿಡ್ನಿಗೆ ತೊಂದರೆ ಉಂಟಾಗುತ್ತದೆ.

3. ಲಘು ವ್ಯಾಯಾಮ ಸಾಕು: ನಾಯಿಯನ್ನು ಆರೋಗ್ಯ ತೊಂದರೆಯಿಂದ ದೂರವಿರಿಸಲು ಲಘು ವ್ಯಾಯಾಮ ಸಾಕು. ಪಗ್ ಗೆ ದಿನವೂ ನಡಿಗೆ ಇರಲಿ. ತುಂಬಾ ಬಿಸಿಲಿದ್ದಾಗ ನಾಯಿಯನ್ನು ಹೊರಗೆ ತಿರುಗಿಸುವುದು ಬೇಡ. ಹಾಗೆಯೇ ಪಗ್ ಗೆ ತುಂಬಾ ವ್ಯಾಯಾಮವನ್ನೂ ಮಾಡಿಸಬಾರದು. 10-15 ನಿಮಿಷ ನಡಿಗೆ ಇದ್ದರೆ ಪಗ್ ಆರೋಗ್ಯ ತುಂಬಾ ಚೆನ್ನಾಗಿರುತ್ತದೆ.

4. ತುಂಬಾ ಉಷ್ಣತೆ ಹೊಂದಿರುವ ನಾಯಿ: ನಾಯಿಯ ದೇಹದ ಉಷ್ಣತೆಯನ್ನು ಆಗಾಗ್ಗೆ ಪರೀಕ್ಷಸುತ್ತಿರಬೇಕು. ಪಗ್ ನಾಯಿಗಳಿಗೆ ಬೇಗನೆ ಉಷ್ಣವಾಗುತ್ತದೆ. ತುಂಬಾ ಬಿಸಿಲಿದ್ದಾಗ ಅದಕ್ಕೆ ತಂಪು ವಾತಾವರಣವನ್ನು ಒದಗಿಸಬೇಕು. ಅದರ ದೇಹ ಬಿಸಿಯಾಗಿದ್ದು ಕಂಡುಬಂದರೆ ಅದರ ಹೊಟ್ಟೆ ಮೇಲೆ 5 ನಿಮಿಷ ಐಸ್ ಇಡಬಹುದು.

5. ಕಿವಿ ಮತ್ತು ಚರ್ಮದ ಸೋಂಕು: ಪಗ್ ನಾಯಿಗೆ ಕಿವಿಯ ಸಮಸ್ಯೆ ಸಾಮಾನ್ಯವಾಗಿರುತ್ತೆ. ಪಗ್ ಕಿವಿ ತುಂಬಾ ಚಿಕ್ಕದಿದ್ದು, ಸುಕ್ಕುಗಳಿಂದ ಕೂಡಿರುವುದರಿಂದ ಅದರೊಳಗೆ ಬ್ಯಾಕ್ಟೀರಿಯಾ ಮತ್ತು ಇನ್ನಿತರ ಕ್ರಿಮಿಗಳು ಬೇಗನೆ ಸೇರಿಕೊಳ್ಳುತ್ತವೆ. ಆದ್ದರಿಂದ ಪಗ್ ಕಿವಿ ಮತ್ತು ಮುಖವನ್ನು ಆಗಾಗ್ಗೆ ಶುದ್ಧ ಮಾಡುತ್ತಿರಬೇಕು. ಮೆತ್ತಗಿನ ಟಿಶ್ಯೂ ಅಥವಾ ಹತ್ತಿಯ ಉಂಡೆಯನ್ನು ಕ್ಲೀನ್ ಮಾಡಲು ಬಳಸಬಹುದು. ಪಗ್ ಗೆ ಗಾಯವಾದ ತಕ್ಷಣವೇ ಚಿಕಿತ್ಸೆ ನೀಡಬೇಕು.