ಮಹಿಳೆಯರು ಪುರುಷರಿಗಿಂತ ಹೆಚ್ಚು ನಿದ್ದೆ ಮಾಡಬೇಕು ಏಕೆ?

1. ಮಹಿಳೆಯರ ಹಾರ್ಮೋನಿನಲ್ಲಿ ಬದಲಾವಣೆ ಆಗುತ್ತದೆ

ಪ್ರೌಢಾವಸ್ಥೆಯ ಸಂದರ್ಭದಲ್ಲಿ ಅಥವಾ ಹಾರ್ಮೋನುಗಳ ನಿಯಮಿತ ಮಾಸಿಕ ವ್ಯತ್ಯಾಸಗಳು ಮಹಿಳೆಯರ ಆರೋಗ್ಯದ ಮೇಲೆ ಗಂಭೀರ ಪರಿಣಾಮ ಬೀರುತ್ತವೆ. ಇದರಲ್ಲಿ ಗರ್ಭಾವಸ್ಥೆ ಮತ್ತು ಋತುಬಂಧವನ್ನು ಕೂಡ ಒಳಗೊಂಡಿದೆ. ಋತುಮತಿಯಾದ ಸಂದರ್ಭದಲ್ಲಿ ದೈಹಿಕ ಅಸ್ವಸ್ಥತೆ ಮತ್ತು ನೋವಿನಿಂದಾಗಿ ಮಹಿಳೆಯರ ಮೆದುಳಿಗೆ ಹೆಚ್ಚು ನಿದ್ರೆಯ ಅಗತ್ಯವಿರುತ್ತದೆ. ಇದನ್ನು ಬಿಟ್ಟರೆ ಮಹಿಳೆಯರು ಆತಂಕ ಮತ್ತು ಖಿನ್ನತೆಯಂತಹ ಸಮಸ್ಯೆಗಳಿಗೆ ಹೆಚ್ಚಾಗಿ ಒಳಗಾಗುತ್ತಾರೆ. ಹೀಗಾಗಿ ಅವರಿಗೆ ಸರಿಯಾದ ನಿದ್ರೆ ಅವಶ್ಯಕತೆ ಇರುತ್ತದೆ.

2. ದಿನಪೂರ್ತಿ ಮಹಿಳೆಯರು ಕೆಲಸದಲ್ಲೇ ತೊಡಗಿರುತ್ತಾರೆ

ಮದುವೆಯಾಗಿ ಮಕ್ಕಳಿರೋ ಮಹಿಳೆಯರಿಗೆ ಬಿಡುವಿನ ವೇಳೆ ಅನ್ನೋದೆ ಇರೋದಿಲ್ಲ. ಹೆಚ್ಚಿನ ಮಹಿಳೆಯರು ಕೆಲಸಕ್ಕೆ ಹೋಗಿ ನಂತರ ಮನೆಕೆಲಸ, ಮಕ್ಕಳನ್ನು ನೋಡಿಕೊಳ್ಳೋದನ್ನ ಮಾಡುತ್ತಾರೆ. ಇನ್ನೂ ಕೆಲ ಮಹಿಳೆಯರು ಕೆಲಸಕ್ಕೆ ಹೋಗದಿದ್ದರೂ ಮನೆ ಕೆಲಸ ಮಕ್ಕಳ ಕೆಲಸವೇ ಸಾಕು ಎನ್ನುವಷ್ಟು ಇರುತ್ತದೆ. ಇನ್ನೂ ರಾತ್ರಿಯಿಡೀ ಮಕ್ಕಳು ಎದ್ದಿದ್ದರೆ ಆ ತಾಯಿಗೆ ಸರಿಯಾಗಿ ನಿದ್ದೆಯೂ ಇರುವುದಿಲ್ಲ. ಇಡೀ ದಿನ ಶ್ರಮ ಪಡಬೇಕು, ಆಕೆಗೆ ವಿಶ್ರಾಂತಿ ಅನ್ನೋದೇ ಸಿಗೋದಿಲ್ಲ. ಇದು ಆಕೆಯ ಆರೋಗ್ಯದ ಮೇಲೆ ಅತೀವ ಪರಿಣಾಮ ಬೀರುತ್ತದೆ.

3. ನಿದ್ರಾಹೀನತೆಯಿಂದ ತೂಕ ಹೆಚ್ಚಾಗುವ ಸಾಧ್ಯತೆ ಇದೆ

ಮಹಿಳೆಯರು ಸ್ಥೂಲಕಾಯತೆಯಂತಹ ಸಮಸ್ಯೆಯಿಂದ ಬಳಲುತ್ತಿರುತ್ತಾರೆ. ಪುರುಷರು ತೂಕ ಹೆಚ್ಚಿಸಿಕೊಂಡರು ಕೂಡ ಅದನ್ನು ಸುಲಭವಾಗಿ ಕಡಿಮೆ ಮಾಡಬಹುದು. ಆದರೆ ಮಹಿಳೆಯರಿಗೆ ಹಾಗಾಗೋದಿಲ್ಲ ಅತಿಯಾದ ತೂಕವನ್ನು ಕಳೆದುಕೊಳ್ಳುವ ಕಷ್ಟ. ಸ್ಥೂಲಕಾಯದ ಸಮಸ್ಯೆ ಹೊಂದಿರುವ ಮಹಿಳೆಯರು ನಿದ್ರಾಹೀನತೆಗೆ ಒಳಗಾಗುವ ಸಾಧ್ಯತೆ ಹೆಚ್ಚು, ಆದ್ದರಿಂದ ನಿದ್ರಾಹೀನತೆ ಮತ್ತು ಅಧಿಕ ತೂಕದ ನಡುವೆ ನೇರವಾದ ಸಂಬಂಧವಿದೆ. ನಿದ್ರೆಯ ಅಭಾವದಿಂದಾಗಿ ಒತ್ತಡದ ಹಾರ್ಮೋನ್ ಆದ ಕಾರ್ಟಿಸೋಲ್ ಹೆಚ್ಚಿನ ಪ್ರಮಾಣದಲ್ಲಿ ಬಿಡುಗಡೆಯಾಗುತ್ತದೆ. ಹೆಚ್ಚಿನ ಕಾರ್ಟಿಸೋಲ್‌ ಬಿಡುಗಡೆಯು ಹಸಿವು ಹೆಚ್ಚಾಗಲು ಹಾಗೂ ಸ್ಥೂಲಕಾಯತೆಗೆ ಕಾರಣವಾಗುತ್ತದೆ.

4. ತನ್ನವರಿಗಾಗಿ ತುಡಿಯುವ ಜೀವ ಮಹಿಳೆಯರದ್ದಾಗಿರುತ್ತದೆ

ಮಹಿಳೆಯರು ತನ್ನ ಗಂಡ-ಮಕ್ಕಳು ಅಂತ ಚಿಂತಿಸುತ್ತಿರುತ್ತಾರೆ. ಊಟ, ನಿದ್ದೆ ಬಿಟ್ಟು ಗಂಡ, ಮಕ್ಕಳ ಸೇವೆಯನ್ನೇ ಮಾಡುತ್ತಿರುತ್ತಾರೆ. ಹೀಗಾಗಿ ಮಹಿಳೆಯರಿಗೆ ವಿಶ್ರಾಂತಿಯ ತುಂಬಾನೇ ಅವಕಾಶ ಕಡಿಮೆ. ಇದೇ ದಿನಚರಿಗೆ ಒಗ್ಗಿಕೊಂಡ ಮಹಿಳೆಯರಿಗೆ ಅವಕಾಶ ಸಿಕ್ಕರು ನಿದ್ರಿಸಲು ಕಷ್ಟವಾಗುತ್ತದೆ.

ಈ ಎಲ್ಲಾ ಕಾರಣಗಳಿಂದಾಗಿ ಮಹಿಳೆಯರಿಗೆ ನಿದ್ರೆಯ ಅವಶ್ಯಕತೆ ತುಂಬಾನೇ ಇದೆ. ಸಾಕಷ್ಟು ನಿದ್ದೆ ಮಾಡಿದರಷ್ಟೇ ಆರೋಗ್ಯವಾಗಿರಲು ಸಾಧ್ಯ.