ಅತಿಯಾಗಿ ನಿದ್ದೆ ಮಾಡುವವರಿಗೆ ಮುಂದೆ ಎದುರಾಗಲಿದೆ ಈ ಆರೋಗ್ಯ ಸಮಸ್ಯೆಗಳು

ಮಧುಮೇಹ:

ದೀರ್ಘಕಾಲ ನಿದ್ದೆ ಮಾಡುವುದರಿಂದ ವ್ಯಕ್ತಿಯ ದೈಹಿಕ ಚಟುವಟಿಕೆ ಕಡಿಮೆಯಾಗುತ್ತದೆ. ಇದರಿಂದ ಆತನ ಸಕ್ಕರೆ ಮಟ್ಟ ಹೆಚ್ಚಾಗುವ ಅಪಾಯ ಅಧಿಕವಾಗಿದೆ. PLOS ಜರ್ನಲ್ ನಲ್ಲಿ ಪ್ರಕಟವಾದ ಅಧ್ಯಯನದ ಪ್ರಕಾರ, 9 ಗಂಟೆಗಳಿಗಿಂತ ಹೆಚ್ಚು ಕಾಲ ನಿದ್ರಿಸುವುದು ವ್ಯಕ್ತಿಯ ದೇಹದಲ್ಲಿ ಮಧುಮೇಹದ ಅಪಾಯವನ್ನು ಹೆಚ್ಚಿಸುತ್ತದೆ ಎಂದು ಹೇಳಿದೆ. ಆದ್ದರಿಂದ ಇನ್ನು ಮೇಲೆ ಆದರೂ ನಿದ್ದೆ ಕಡಿಮೆ ಮಾಡಿ, ಸಾಧ್ಯವಾದಷ್ಟು ಚಟುವಟಿಕೆಗಳಲ್ಲಿ ಭಾಗವಹಿಸಿ.

ಹೃದ್ರೋಗಗಳು:

ಅಮೇರಿಕನ್ ಅಕಾಡೆಮಿ ಆಫ್ ಸ್ಲೀಪ್ ಮೆಡಿಸಿನ್‌ನಲ್ಲಿ ಪ್ರಕಟವಾದ ಅಧ್ಯಯನದ ಪ್ರಕಾರ, ಹೆಚ್ಚು ನಿದ್ರೆ ಮಾಡುವುದರಿಂದ ಹೃದಯದ ಕಾಯಿಲೆಗಳ ಅಪಾಯ ಹೆಚ್ಚಾಗುತ್ತದೆ. ಈ ಅಧ್ಯಯನದ ಪ್ರಕಾರ, 9 ರಿಂದ 11 ಗಂಟೆಗಳ ನಿದ್ದೆ ಮಾಡುವ ಮಹಿಳೆಯರು ಹೃದಯ ಕಾಯಿಲೆ ಪಡೆಯುವ ಸಾಧ್ಯತೆಗಳನ್ನು ಶೇಕಡಾ 38 ರಷ್ಟು ಹೊಂದಿದ್ದಾರೆ. ಆದ್ದರಿಂದ ಮಹಿಳೆಯರು ಈ ವಿಚಾರದಲ್ಲಿ ಜಾಗರೂಕರಾಗಿರಬೇಕು.

ಖಿನ್ನತೆಯ ಸಾಧ್ಯತೆಗಳು:

ಅತಿಯಾದ ನಿದ್ದೆ ಕೂಡ ಖಿನ್ನತೆಗೆ ಕಾರಣವಾಗಬಹುದು ಎಂದು ತಿಳಿದರೆ ನಿಮಗೆ ಆಶ್ಚರ್ಯವಾಗಬಹುದು ಅಲ್ವಾ?, ಹೌದು, PLOS ನಲ್ಲಿ ಪ್ರಕಟವಾದ ಇತ್ತೀಚಿನ ಅಧ್ಯಯನದ ಪ್ರಕಾರ, ಅತಿಯಾಗಿ ಮಲಗುವುದು ಖಿನ್ನತೆಗೆ ಕಾರಣವಾಗಬಹುದು. ಇದು ಮಾತ್ರವಲ್ಲ, ದೀರ್ಘಕಾಲದವರೆಗೆ ಮಲಗುವುದರಿಂದ, ವ್ಯಕ್ತಿಯಲ್ಲಿ ಆಲಸ್ಯ ಅಥವಾ ಜಡತ್ವ ಹೆಚ್ಚಾಗುತ್ತದೆ. ಇದರಿಂದ ಅವರ ಮನಸ್ಸು ದೈನಂದಿನ ಕೆಲಸದಲ್ಲಿ ತೊಡಗಿಕೊಳ್ಳುವುದಿಲ್ಲ. ಇದು, ಹೆಚ್ಚಿನ ಸಮಸ್ಯೆಗೆ ಕಾರಣವಾಗಬಹುದು.

ಬೆನ್ನು ನೋವು:

ಗಂಟೆಗಟ್ಟಲೆ ಕುರ್ಚಿಯಲ್ಲಿ ಕುಳಿತು ಕೆಲಸ ಮಾಡುವವರು, ಹೆಚ್ಚು ಹೊತ್ತು ಮಲಗಿದರೆ, ಅವರಿಗೆ ಬೆನ್ನು ನೋವು, ಕುತ್ತಿಗೆ, ಭುಜದ ನೋವಿನ ಸಮಸ್ಯೆಗಳು ಉಂಟಾಗಬಹುದು. ಏಕೆಂದರೆ ಒಂದೇ ಭಂಗಿಯಲ್ಲಿ ಕುಳಿತು ಕೆಲಸ ಮಾಡುವಾಗ ನೋವುಗಳು ಹುಟ್ಟಿಕೊಳ್ಳುತ್ತವೆ. ಆದ್ದರಿಂದ ಆಗಾಗ ಎದ್ದು ತಿರುಗಾಡುತ್ತಿರಬೇಕು ಅಥವಾ ವ್ಯಾಯಾಮ ಮಾಡುತ್ತಿರಬೇಕು.

ಸ್ಥೂಲಕಾಯ ಅಥವಾ ಬೊಜ್ಜು:

ದೀರ್ಘಕಾಲ ನಿದ್ರಿಸುವುದರಿಂದ, ದೈಹಿಕ ಚಟುವಟಿಕೆ ಕಡಿಮೆಯಾಗುತ್ತದೆ. ವ್ಯಕ್ತಿಯು ತನ್ನ ಹೆಚ್ಚಿನ ಸಮಯವನ್ನು ತಿನ್ನುವುದು, ಕುಳಿತುಕೊಳ್ಳುವುದು ಅಥವಾ ಮಲಗುವುದರಲ್ಲಿ ಕಳೆಯುತ್ತಾನೆ. ಇದು ಮತ್ತಷ್ಟು ತೂಕ ಹೆಚ್ಚಾಗಲು ಮತ್ತು ಬೊಜ್ಜುಗೆ ಕಾರಣವಾಗುತ್ತದೆ. ಇದಷ್ಟೇ ಅಲ್ಲ, ಈ ಕಾರಣದಿಂದಾಗಿ ಜೀರ್ಣಕ್ರಿಯೆ ಪ್ರಕ್ರಿಯೆಯು ನಿಧಾನವಾಗಲು ಪ್ರಾರಂಭವಾಗಿ, ಮಲಬದ್ಧತೆಯ ಸಮಸ್ಯೆಗೆ ವ್ಯಕ್ತಿಯನ್ನು ಗುರಿ ಮಾಡುತ್ತದೆ.