ಮುಟ್ಟಿನ ಸಮಯದಲ್ಲಿ ಕೊರೊನಾ ಲಸಿಕೆ ಪಡೆಯಬಹುದೇ? ತಜ್ಞರ ಅಭಿಪ್ರಾಯವೇನು?

Updated: Saturday, April 24, 2021, 20:49 [IST]

ಕೊರೊನಾ ಲಸಿಕೆ ಬಂದಾಗಿನಿಂದಲೇ ಜನರಿಗೆ ಆ ಲಸಿಕೆ ಬಗ್ಗೆ ನಾನಾ ಸಂಶಯ. ಮೊದಲಿಗೆ ಕೊರೊನಾ ವಾರಿಯರ್ಸ್‌ಗೆ ಲಸಿಕೆ ನೀಡಲಾಗಿತ್ತು, ಅದಾಗ ಬಳಿಕ 60 ವರ್ಷ ಮೇಲ್ಪಟ್ಟವರಿಗೆ ನಂತರ 3ನೇ ಹಂತದಲ್ಲಿ 45 ವರ್ಷ ಮೇಲ್ಪಟ್ಟವರಿಗೆ ಕೊರೊನಾ ಲಸಿಕೆ ನೀಡಲಾಗುತ್ತಿದೆ.

ಮೊದಲಿಗೆ ಈ ಲಸಿಕೆ ಪಡೆದರೆ ಎಲ್ಲಿ ಅಡ್ಡಪರಿಣಾಮ ಉಂಟಾಗುವುದೋ ಎಂಬ ಭಯ ಜನರಿಗಿತ್ತು. ಇದೀಗ ಆ ಭಯ ದೂರವಾಗಿದೆ. ಏಪ್ರಿಲ್ 23ಕ್ಕೆ 115, 461, 202 ಜನರು ಮೊದಲ ಡೋಸ್ ಪಡೆದುಕೊಂಡಿದ್ದರೆ 20, 197, 122 ಜನರು ಎರಡನೇ ಡೋಸ್‌ ಪಡೆದುಕೊಂಡಿದ್ದಾರೆ. ಈ ಸಂಖ್ಯೆಯೇ ಜನರಿಗೆ ಕೊರೊನಾ ಲಸಿಕೆ ಮೇಲೆ ನಂಬಿಕೆ ಮೂಡಿಸಿದೆ ಎಂದು ಹೇಳಬಹುದು.

ಇದೀಗ ಭಾರತದ ಸರ್ಕಾರ 18 ವರ್ಷ ಮೇಲ್ಪಟ್ಟವರಿಗೆ ಕೊರೊನಾ ಲಸಿಕೆ ನೀಡಲು ಮುಂದಾಗಿದೆ. ಈ ಲಸಿಕೆ ಪಡೆಯಲು ಏಪ್ರಿಲ್ 28ರಿಂದ ನೋಂದಣಿ ಪ್ರಾರಂಭವಾಗಿದ್ದು, ಮೇ1ರಿಂದ ಲಸಿಕೆ ಪಡೆಯಬಹುದಾಗಿದೆ.

ಆದರೆ ಈ ಲಸಿಕೆ ಪಡೆಯುವುದರ ಬಗ್ಗೆ ಯುವ ಜನಾಂಗಕ್ಕೆ ಹಲವು ಸಂಶಯ ಮೂಡಿದೆ, ಅದರಲ್ಲೂ ಮಹಿಳೆಯರಿಗೆ ಸಂಶಯ ಮೂಡಲಾರಂಭಿಸುತ್ತದೆ. ಅದರಲ್ಲೂ ಮುಟ್ಟಿನ ಸಮಯದಲ್ಲಿ ಈ ಲಸಿಕೆ ಪಡೆಯಬಹುದೇ ಎಂದು ಕೇಳುತ್ತಿದ್ದಾರೆ, ಈ ಕುರಿತಂತೆ ಹಲವಾರು ಪೋಸ್ಟ್‌ಗಳು ಸೋಷಿಯಲ್ ಮೀಡಿಯಾದಲ್ಲೂ ಹರಿದಾಡುತ್ತಿವೆ. ಇದರ ಕುರಿತ ನಿಜಾಂಶವೇನು, ತಜ್ಞರು ಏನು ಹೇಳಿದ್ದಾರೆ ಎಂದು ಈ ಲೇಖನದಲ್ಲಿ ನೀಡಲಾಗಿದೆ ನೋಡಿ:

ಯುಎಸ್‌ನಲ್ಲಿ ಕೋವಿಡ್‌ ಲಸಿಕೆ ಪಡೆದ ಮಹಿಳೆಯರು ಏನು ಹೇಳುತ್ತಿದ್ದಾರೆ?

ಯುಎಸ್‌ನಲ್ಲಿ ಕೋವಿಡ್ ಲಸಿಕೆ ಪಡೆದ ಮಹಿಳೆಯರಲ್ಲಿ ಕೆಲವರು ತಮ್ಮ ಮುಟ್ಟಿನ ಚಕ್ರದಲ್ಲಿ ವ್ಯತ್ಯಾಸವಾಗಿದೆ ಎಂದಿದ್ದಾರೆ. ಕೆಲವರು ಮುಟ್ಟು ಆಗಲು ವಿಳಂಬವಾಯಿತು ಎಂದರೆ ಇನ್ನು ಕೆಲವರು ಮುಟ್ಟಿನ ಸಮಯದಲ್ಲಿ ಅಧಿಕ ರಕ್ತಸ್ರಾವ ಕಂಡು ಬಂದಿರುವುದಾಗಿ ಎಂದಿದ್ದಾರೆ. ಸಂಶೋಧಕರ ಪ್ರಕಾರ ಮನುಷ್ಯರ ಹಾರ್ಮೋನ್‌ಗೂ, ರೋಗ ನಿರೋಧಕ ವ್ಯವಸ್ಥೆಗೂ ಸಂಬಂಧವಿರುತ್ತದೆ. ಅಲ್ಲದೆ ಮಹಿಳೆಯರ ಮುಟ್ಟಿನ ಚಕ್ರದ ಮೇಲೆ ಒತ್ತಡ, ಹಾರ್ಮೋನ್ ಇವೆಲ್ಲಾ ಪ್ರಭಾವ ಬೀರುತ್ತದೆ. ಕೊರೊನಾ ಲಸಿಕೆ ಕೊರೊನಾವೈರಸ್‌ ವಿರುದ್ಧ ಹೋರಾಡಲು ರೋಗ ನಿರೋಧಕ ವ್ಯವಸ್ಥೆಯನ್ನು ಸಮರ್ಥ ಮಾಡಿಸುವ ಲಸಿಕೆಯಾಗಿದ್ದು ಕೆಲವರಲ್ಲಿ ಲಸಿಕೆ ಪಡೆದ ಬಳಿಕ ಮುಟ್ಟಿನ ಚಕ್ರದಲ್ಲಿ ವ್ಯತ್ಯಾಸ ಕಂಡು ಬಂದರೂ ಒಂದೆರಡು ತಿಂಗಳಿನಲ್ಲಿ ಮೊದಲಿನಂತೆಯೇ ನಿಮ್ಮ ಮುಟ್ಟಿನ ಚಕ್ರ ಇರುತ್ತದೆ ಎಂದು ಹೇಳಿದ್ದಾರೆ.

ಭಾರತೀಯ ತಜ್ಞರು ಏನು ಹೇಳುತ್ತಿದ್ದಾರೆ?

ಕೊರೊನಾ ಲಸಿಕೆ ಪಡೆಯಲು ಹದಿ ವಯಸ್ಸಿನ ಹೆಣ್ಣು ಮಕ್ಕಳು ಯಾವುದೇ ಭಯಪಡುವ ಅಗ್ಯತವಿಲ್ಲ, ಏಕೆಂದರೆ ಈ ಲಸಿಕೆ ಮುಟ್ಟಿನ ಸಮಯದಲ್ಲೂ ತೆಗೆದುಕೊಳ್ಳಬಹುದು, ಮುಟ್ಟಾದಾಗ ತೆಗೆದುಕೊಂಡರೆ ಅದು ಲಸಿಕೆಯ ಸಾಮಾರ್ಥ್ಯವೇನು ಕುಗ್ಗಿಸುವುದಿಲ್ಲ ಎಂದು ಡಾ. ಮುಂಜಾಲ್ ವಿ, ಕಾಪಾಡಿಯಾ ಹೇಳಿದ್ದಾರೆ.

ಅಧ್ಯಯನ ವರದಿ

ಇದರ ಕುರಿತು ನಡೆಸಿದ ಕೆಲವೊಂದು ಅಧ್ಯಯನಗಳು ವರದಿ ವೈರಸ್‌ ದೇಹದಲ್ಲಿ ಒತ್ತಡ ಹೆಚ್ಚಿಸುವುದರಿಂದ ಅನಿಯಮಿತ ಮುಟ್ಟು ಉಂಟಾಗಬಹುದು. ಆದರೆ ಲಸಿಕೆಯಿಂದ ಮುಟ್ಟಿನ ಚಕ್ರದ ಮೇಲೆ ಹೀಗೆ ಆಗುತ್ತದೆ ಎಂದು ಹೇಳಲು ಯಾವುದೇ ನಿಖರ ಅಧ್ಯಯನ ವರದಿಗಳಿವೆ.

ಲಸಿಕೆ ತೆಗೆದುಕೊಂಡ ಬಳಿಕ ಒಂದು ವೇಳೆ ಮುಟ್ಟಿನ ಚಕ್ರದಲ್ಲಿ ವ್ಯತ್ಯಾಸ ಅಥವಾ ಸ್ವಲ್ಪ ಅಧಿಕ ರಕ್ತಸ್ರಾವ ಕಂಡು ಬಂದರ ಏನೂ ಭಯ ಪಡಬೇಕಾಗಿಲ್ಲ, ಒಂದೆರಡು ತಿಂಗಳಿಗೆ ಸರಿ ಹೋಗುವುದು.

ಲಸಿಕೆ ಪಡೆಯುವುದು ಕೊರೊನಾ ತಡೆಗಟ್ಟುವಲ್ಲಿ ಸಹಕಾರಿ

ಕೊರೊನಾ ಎರಡನೇ ಅಲೆಗೆ ಈಗಾಗಲೇ ತತ್ತರಿಸಿದ್ದೇವೆ. 18 ವರ್ಷದ ಮೇಲ್ಪಟ್ಟವರಿಗೆ ಲಸಿಕೆ ದೊರೆಯುವುದರಿಂದ ಇದನ್ನು ತಪ್ಪದೆ ಪಡೆಯಿರಿ, ಇವು ಕೊರೊನಾ ಪ್ರಮಾಣವನ್ನು ತಗ್ಗಿಸುವಲ್ಲಿ ಸಹಕಾರಿಯಾಗಿದೆ.

ಇನ್ನು ನಿಮಗೆ ಏನಾದರೂ ಆರೋಗ್ಯ ಸಮಸ್ಯೆಯಿದ್ದರೆ ವೈದ್ಯರ ಸಲಹೆ ಪಡೆದು ನಂತರ ಲಸಿಕೆ ಪಡೆದುಕೊಳ್ಳಿ.