ಕಿವಿಯಲ್ಲಿ ಕೂದಲು ಬೆಳೆಯುವುದಕ್ಕೂ, ಆರೋಗ್ಯಕ್ಕೂ ಏನು ಸಂಬಂಧ? ಇದಕ್ಕೆ ಕಾರಣವೇನು?

ಕಿವಿಯ ಮೇಲೆ ಕೂದಲು ಬೆಳೆಯೋದು ಯಾಕೆ?

ನಮ್ಮ ಅಂಗೈ, ಪಾದದಡಿ ಹಾಗೂ ತುಟಿ ಬಿಟ್ಟು ದೇಹದ ಎಲ್ಲಾ ಭಾಗಗಳಲ್ಲಿಯೂ ಕೂದಲುಗಳು ಬೆಳೆಯುತ್ತವೆ. ಈ ಕೂದಲುಗಳ ನಮ್ಮ ದೇಹವನ್ನು ಸೂರ್ಯನ ಹಾನಿಕಾರಕ ಕಿರಣಗಳಿಂದ ರಕ್ಷಣೆ ನಿಡುವುದರ ಜೊತೆಗೆ ನಮ್ಮ ದೇಹವನ್ನು ಬೆಚ್ಚಗಿಡುವುದಕ್ಕೆ ಸಹಾಯ ಮಾಡುತ್ತವೆ. ಅದೇ ರೀತಿ ನಮ್ಮ ಕಿವಿಯಲ್ಲಿ ಬೆಳೆಯುವ ಕೂದಲುಗಳ ಸಹ. ಇದು ಮಹಿಳೆಯರಿಗಿಂತ ಹೆಚ್ಚಾಗಿ ಪುರುಷರಲ್ಲಿ, ಅದೂ ವಯಸ್ಸಾಗುತ್ತಾ ಹೋದಂತೆ ಸಾಮಾನ್ಯವಾಗಿ ಬೆಳೆಯೋದು. ಇದಕ್ಕೆ ಕಾರಣ, ಪುರುಷರಲ್ಲಿ ಕಂಡುಬರುವ ಹೆಚ್ಚಿನ ಪ್ರಮಾಣದ ಟೆಸ್ಟೋಸ್ಟೆರಾನ್ ಎಂಬ ಹಾರ್ಮೋನ್.

ಪುರುಷ ಹಾರ್ಮೋನ್ ಎಂದೇ ಕರೆಯಲ್ಪಡುವ ಟೆಸ್ಟೋಸ್ಟೆರಾನ್ ಹಾರ್ಮೋನ್ ಮಹಿಳೆ ಹಾಗೂ ಪುರುಷರಿಬ್ಬರಲ್ಲೂ ಬಿಡುಗಡೆಯಾಗುತ್ತದೆ. ಆದರೆ ಮಹಿಳೆಯರಿಗಿಂತ ಪುರುಷರ ಆರೋಗ್ಯದ ಮೇಲೇಯೇ ಹೆಚ್ಚು ಪ್ರಭಾವ ಬೀರುವುದು. ಯಾಕಂದ್ರೆ ಇದು ಪುರುಷರಲ್ಲಿ ಸಂತಾನೋತ್ಪತ್ತಿಗೆ ಅಗತ್ಯವಾದ ಸ್ಪರ್ಮ್ ಉತ್ಪಾದನೆಯ ಜೊತೆಗೆ ಲೈಂಗಿಕತೆಯ ಮೇಲೆ ಪರಿಣಾಮ ಬೀರುತ್ತದೆ. ಆದ್ದರಿಂದ ಇದೇ ಹಾರ್ಮೋನ್ ಬದಲಾವಣೆಯಿಂದ ಪುರುಷರ ಕಿವಿ ಮೇಲೆ ಕಪ್ಪು ಮತ್ತು ಬಿಳಿ ಬಣ್ಣದ ಕೂದಲುಗಳು ಬೆಳವಣಿಗೆಯಾಗುತ್ತವೆ.

ಕಿವಿಯಲ್ಲಿ ಬೆಳೆಯುವ ಕೂದಲುಗಳ ವಿಧಗಳು:

ನಮ್ಮ ಕಿವಿಯಲ್ಲಿ ಬೆಳೆಯು ಕೂದಲಲ್ಲೂ ಎರಡು ವಿಧ ಇದೆ. ಒಂದು ವೆಲ್ಲಸ್, ಇನ್ನೊಂದು ಟ್ರಾಗಿ.

ವೆಲ್ಲಸ್ ಕೂದಲು:

ಇದು ಹುಟ್ಟಿದಾಗಿನಿಂದ ಕಿವಿ ಜೊತೆಗೆ ಮೂಗಿನ ಒಳಗೂ ಕಂಡುಬರುವ ರೋಮಗಳು. ದೇಹದಲ್ಲಿ ಇತರ ಭಾಗದಲ್ಲಿ ಬೆಳೆಯುವ ಕೂದಲಿಗಿಂತ ಇದು ತುಂಬಾ ತೆಳುವಾಗಿದ್ದು, ಬೇಬಿ ಹೇರ್ ಅಂತ ಕೂಡಾ ಇದನ್ನು ಕರೆಯುತ್ತಾರೆ. ಇದರ ಪ್ರಮುಖ ಕಾರ್ಯವೆಂದರೆ, ನಮ್ಮ ದೇಹವನ್ನು ಶೀತ ವಾತಾವರಣದಿಂದ ಕಾಪಾಡುವುದಾಗಿದೆ. ಇದು ಸಾಮಾನ್ಯವಾಗಿ ಪ್ರತಿಯೊಬ್ಬರಲ್ಲೂ ಇದ್ದೇ ಇರುತ್ತದೆ.

ಟ್ರಾಗಿ ಕೂದಲು:

ಇದು ಕಿವಿಯ ಒಳಗೆ ಅಥವಾ ಕಿವಿಯ ಮೇಲೆ ದಪ್ಪನಾದ ಕಪ್ಪು-ಬಿಳಿ ಕೂದಲಾಗಿದೆ. ಕಿವಿಯೊಳಗೆ ಕಸ, ಬ್ಯಾಕ್ಟಿರಿಯಾ ಹೋಗದಂತೆ ತಡೆಗೋಡೆಯಾಗಿ ನಿಂತು, ಕಿವಿಯೊಳಗಿನ ಭಾಗಗಳಿಗೆ ಯಾವುದೇ ಹಾನಿಯಾಗದಂತೆ ರಕ್ಷಣೆ ಕೊಡುತ್ತದೆ.

ಕಿವಿಯಲ್ಲಿ ಕೂದಲು ಹುಟ್ಟುವುದರಿಂದ ಆಗುವ ಪರಿಣಾಮಗಳೇನು?:

ಕಿವಿಯಲ್ಲಿ ಈ ರೀತಿ ಕೂದಲು ಏನಾದರೂ ಸಮಸ್ಯೆ ಆಗುವುದೇ ಎಂಬ ಚಿಂತೆ ಬರುವುದು ಸಾಮಾನ್ಯ. ಆದರೆ ಹಾಗೇನು ಇಲ್ಲ, ಚಿಂತೆ ಮಾಡುವಂತಹ ಅಗತ್ಯವೇನು ಇಲ್ಲ. ಇದು ಮನುಷ್ಯನ ದೇಹದಲ್ಲಿ ನಡೆಯುವ ಸಾಮಾನ್ಯ ಪ್ರಕ್ರಿಯೆ. ಇದರಿಂದ ಸಮಸ್ಯೆಗಳ ಬದಲಾಗಿ ಒಳ್ಳೆಯದೇ ಆಗುವುದು. ಏಕೆಂದರೆ ಕಿವಿಯೊಳಗೆ ಕೂದಲಿರುವುದರಿಂದ ಕಿವಿಗೆ ಯಾವುದೇ ರೀತಿಯ ಹಾನಿ ಆಗುವುದಿಲ್ಲ.

ಆದರೆ, ಒಂದು ವೇಳೆ ಈ ಕೂದಲು ಜಾಸ್ತಿ ಇದ್ದರೆ ಮಾತ್ರ, ಸ್ನಾನ ಮಾಡುವಾಗ ಅಥವಾ ಇನ್ಯಾವುದೇ ಸಂದರ್ಭದಲ್ಲಿ ನೀರು ಕಿವಿಯೊಳಗೆ ಸೇರಿ, ಶೇಖರಣೆ ಆಗೋ ಸಂಭವವಿದೆ. ಅದು ಬಿಟ್ಟು ಬೇರೇನೂ ಸಮಸ್ಯೆ ಅಂತೂ ಆಗಲಾರದು.

ಈ ಕಿವಿಯಲ್ಲಿರುವ ಕೂದಲನ್ನು ತೆಗೆಯಬಹುದೇ?:

ಕಿವಿಗಳ ಮೇಲೆ ಕೂದಲು ಬರುವುದನ್ನ ಇಷ್ಟಪಡದವರು ಶೇವಿಂಗ್, ಪ್ಲಕಿಂಗ್, ವ್ಯಾಕ್ಸಿಂಗ್, ಹೇರ್ ರಿಮೂವರ್ ಕ್ರೀಮ್ ಅಥವಾ ಲೇಸರ್ ಟ್ರೀಟ್ಮೆಂಟ್ ಬಳಸಿ ಈ ಕೂದಲನ್ನು ತೆಗೆಯಬಹುದು. ಇದರಿಂದ ಯಾವುದೇ ಸಮಸ್ಯೆಗಳಾಗುವುದಿಲ್ಲ.

ನಿಮಗಿದು ತಿಳಿದಿರಲಿ:

ವಿಶ್ವದ ಅತಿ ಉದ್ದದ ಕಿವಿಯ ಕೂದಲನ್ನು ನಮ್ಮದೇ ದೇಶದ ವಿಕ್ಟರ್ ಆಂಥೋನಿ ಹೊಂದಿದ್ದು, ಗಿನ್ನೀಸ್ ವಲ್ಡ್ ರೆಕಾರ್ಡ್ ಗೆ ಸೇರಿಕೊಂಡಿದ್ದಾರೆ. ಇವರ ಕಿವಿಯ ಕೂದಲು ಬರೋಬ್ಬರಿ 7 ಇಂಚುಗಳಷ್ಟು ಉದ್ದವಿದೆ.