ಎತ್ತರವನ್ನು ನೈಸರ್ಗಿಕವಾಗಿ ಹೆಚ್ಚಿಸುವ ಪ್ರೋಟೀನ್‌ಯುಕ್ತ ಆಹಾರಗಳು

ವಿಟಮಿನ್ ಡಿ

ಎತ್ತರ ಹೆಚ್ಚಿಸಬೇಕೆಂದರೆ ವಿಟಮಿನ್ ಡಿ ಹೆಚ್ಚಿರುವ ಆಹಾರಗಳನ್ನು ಹೆಚ್ಚಾಗಿ ಸೇವಿಸಬೇಕು. ವಿಶೇಷವಾಗಿ ಮೂಳೆಗಳ ಬೆಳವಣಿಗೆಗೆ ಕ್ಯಾಲ್ಸಿಯಂ ಅಗತ್ಯವಾಗಿದ್ದು ಹಾಲು ಮತ್ತು ಇತರ ಆಹಾರಗಳಲ್ಲಿರುವ ಕ್ಯಾಲ್ಸಿಯಂ ಅನ್ನು ದೇಹ ಹೀರಿಕೊಳ್ಳಲು ಸಾಧ್ಯವಾಗಿಸಲು ವಿಟಮಿನ್ ಡಿ ಬೇಕು. ಅಲ್ಲದೇ ವಿಟಮಿನ್ ಡಿ ರೋಗ ನಿರೋಧಕ ಶಕ್ತಿಯನ್ನೂ ಹೆಚ್ಚಿಸುತ್ತದೆ. ವಿಟಮಿನ್ ಡಿ ಹೆಚ್ಚಿರುವ ಆಹಾರಗಳೆಂದರೆ ಮೀನು, ಕಾಳುಗಳು, ಮೊಟ್ಟೆ, ಟೋಫು, ಸೋಯಾ ಅವರೆಯ ಹಾಲು, ಸೋಯಾ ಬೀನ್ಸ್, ಅಣಬೆ, ಸಾಸೇಜುಗಳು ಹಾಗೂ ಬಾದಾಮ್ಮಿ.

ಪ್ರೋಟೀನುಗಳು

ಎತ್ತರ ಹೆಚ್ಚಿಸಲು ಪ್ರೋಟೀನುಗಳು ಸಹಾ ಬೇಕೇ ಬೇಕು. ಪ್ರೋಟೀನು ಹೆಚ್ಚಿರುವ ಆಹಾರಗಳು ಆರೋಗ್ಯಕರ ಹಾಗೂ ಸವೆತಕ್ಕೆ ಒಳಗಾದ ಅಂಗಾಂಶವನ್ನು ಮತ್ತೆ ರಿಪೇರಿಗೊಳಿಸಿ ಹೊಸ ಅಂಗಾಂಶದ ಬೆಳವಣಿಗೆಗೆ ನೆರವಾಗುತ್ತದೆ. ಪರಿಣಾಮವಾಗಿ ಎತ್ತರ ಹೆಚ್ಚಲು ಸಾಧ್ಯವಾಗುತ್ತದೆ. ಪ್ರೋಟೀನುಗಳಲ್ಲಿರುವ ಅಮೈನೋ ಆಮ್ಲ ಈ ಎತ್ತರವನ್ನು ಹೆಚ್ಚಿಸಲು ನೆರವಾಗುತ್ತದೆ. ಪೋಟೀನು ಹೆಚ್ಚಿರುವ ಆಹಾರಗಳಾದ ಹಾಲು, ಚೀಸ್, ಹಸಿರು ಬೀನ್ಸ್, ಒಣಬೀಜಗಳು (ಕುಂಬಳ, ಕಲ್ಲಂಗಡಿ ಹಣ್ಣು, ಸ್ಕ್ವಾಶ್ ಇತ್ಯಾದಿ), ಮೀನು (ಟ್ಯೂನಾ, ಸಾಲ್ಮನ್), ಬಿಳಿ ಮಾಂಸ, ಶೇಂಗಾ ಬೀಜ, ಬೇಳೆಕಾಳುಗಳು, ಓಟ್ಸ್ ರವೆ, ಸೋಯಾ ಬೀನ್ಸ್, ಹಾಗೂ ಮೊಳಕೆ ಬಂದಿರುವ ಕಾಳುಗಳಲ್ಲಿ ಹೆಚ್ಚಿನ ಪ್ರೋಟೀನ್ ಇರುತ್ತದೆ. ನಿಮ್ಮ ನಿತ್ಯದ ಆಹಾರದಲ್ಲಿ ಇವು ಹೆಚ್ಚಾಗಿರುವಂತೆ ನೋಡಿಕೊಳ್ಳುವ ಮೂಲಕ ಎತ್ತರ ಹೆಚ್ಚುವಂತೆ ನೋಡಿಕೊಳ್ಳಬಹುದು.

ವಿಟಮಿನ್ ಎ

ನಮ್ಮ ದೇಹದ ಎಲ್ಲಾ ಅಂಗಗಳು ಸರಿಯಾಗಿ ಕೆಲಸ ಮಾಡಬೇಕಾದರೆ ವಿಟಮಿನ್ ಎ ಉತ್ತಮ ಪ್ರಮಾಣದಲ್ಲಿರುವ ಆಹಾರಗಳನ್ನು ಸೇವಿಸಬೇಕು. ವಿಟಮಿನ್ ಎ ದೇಹದಲ್ಲಿ ಕ್ಯಾಲ್ಸಿಯಂ ನಷ್ಟವಾಗದಂತೆ ತಡೆಯುವ ಮೂಲಕ ಮೂಳೆಗಳನ್ನು ದೃಢ ಹಾಗೂ ಆರೋಗ್ಯಕರವಾಗಿರಿಸಲು ನೆರವಾಗುತ್ತದೆ. ವಿಟಮಿನ್ ಎ ಕಣ್ಣಿನ ದೃಷ್ಟಿಗೂ ಉತ್ತಮ ಹಾಗೂ ಚರ್ಮದ ಕಾಂತಿಯನ್ನು ಹೆಚ್ಚಿಸಲೂ ನೆರವಾಗುತ್ತದೆ. ವಿಟಮಿನ್ ಎ ಹೆಚ್ಚಿನ ಪ್ರಮಾಣದಲ್ಲಿರುವ ಪಾಲಕ್ ಸೊಪ್ಪು, ಬೀಟ್ರೂಟ್, ಕ್ಯಾರೆಟ್, ಕೋಳಿ ಮಾಂಸ, ಖರಬೂಜದ ಹಣ್ಣು, ಪಪ್ಪಾಯಿ, ಪೀಚ್ ಹಣ್ಣುಗಳು, ಹಾಲು, ಟೊಮೇಟೊ, ಬಟಾಣಿ ಕಾಳು ಹಾಗೂ ಆಪ್ರಿಕಾಟ್ ಹಣ್ಣುಗಳನ್ನು ನಿಯಮಿತವಾಗಿ ಸೇವಿಸುತ್ತಿರಬೇಕು. ಟೊಮಾಟೋ, ಬೀಟ್ರೂಟ್, ಕ್ಯಾರೆಟ್ ಮೊದಲಾದ ತರಕಾರಿಗಳನ್ನು ಸಾಧ್ಯವಾದಷ್ಟು ಹಸಿಯಾಗಿಯೇ ಸೇವಿಸಬೇಕು ಅಥವಾ ರಸವನ್ನು ಹಿಂಡಿ ತಾಜಾ ಇದ್ದಂತೆಯೇ ಕುಡಿಯಬೇಕು.

ಕ್ಯಾಲ್ಸಿಯಂ

ಎತ್ತರ ಹೆಚ್ಚಿಸುವಲ್ಲಿ ಮೂಳೆಗಳ ಪಾತ್ರ ಪ್ರಮುಖವಾಗಿದ್ದು ಮೂಳೆಗಳು ದೃಢವಾಗಿರುವುದು ಅತ್ಯಂತ ಅಗತ್ಯವಾಗಿದೆ. ಕ್ಯಾಲ್ಸಿಯಂ ಹೆಚ್ಚಿರುವ ಆಹಾರಗಳ ಸೇವನೆಯಿಂದ ಮೂಳೆಗಳ ಬೆಳವಣಿಗೆ ಹಾಗೂ ದೃಢತೆ ಹೆಚ್ಚುತ್ತದೆ. ಡೈರಿ ಉತ್ಪನ್ನಗಳಾದ ಹಾಲು, ಚೀಸ್, ಮೊಸರು ಹಾಗೂ ಮೊಟ್ಟೆಗಳನ್ನು ನಿತ್ಯವೂ ಸೇವಿಸುವ ಮೂಲಕ ಎತ್ತರ ಹೆಚ್ಚಲು ನೆರವಾಗುತ್ತದೆ. ಇವು ಹೊಟ್ಟೆಯನ್ನು ತುಂಬಿಸುವ ಹಾಗೂ ಆರೋಗ್ಯಕರ ಆಹಾರಗಳಾಗಿವೆ.

ಖನಿಜಗಳು

ಮೂಳೆಗಳ ರಚನೆಯನ್ನು ಖನಿಜಗಳು ಬಲಪಡಿಸುತ್ತವೆ. ಅಲ್ಲದೇ ಮೂಳೆಗಳ ಗಾತ್ರವನ್ನೂ ಹೆಚ್ಚಿಸಲು ನೆರವಾಗುತ್ತವೆ ಅಷ್ಟೇ ಅಲ್ಲ, ದೇಹದಲ್ಲಿ ರಕ್ತಪರಿಚಲನೆ ಉತ್ತಮಗೊಳಿಸಲೂ ನೆರವಾಗುತ್ತದೆ. ಮೂಳೆಯನ್ನು ನೈಸರ್ಗಿಕವಾಗಿ ಬಲಪಡಿಸಲು ಮತ್ತು ಎತ್ತರವನ್ನು ಹೆಚ್ಚಿಸಲು ಖನಿಜಗಳು ಹೆಚ್ಚಿರುವ ಆಹಾರಗಳಾದ ಬೀನ್ಸ್, ದ್ವಿದಳಧಾನ್ಯಗಳು, ಬ್ರೋಕೋಲಿ, ಪಾಲಕ್ ಸೊಪ್ಪು, ಎಲೆಕೋಸು, ಕುಂಬಳಕಾಯಿ, ಕ್ಯಾರೆಟ್, ಅವರೆ ಜಾತಿಯ ಕಾಳುಗಳು, ಬಾಳೆಹಣ್ಣು, ದ್ರಾಕ್ಷಿ, ಪೀಚ್ ಹಣ್ಣುಗಳನ್ನು ನಿತ್ಯವೂ ಸಾಧ್ಯವಾದಷ್ಟು ಸೇವಿಸಬೇಕು.