ಬಿಸಿಲಿನಲ್ಲಿ ವ್ಯಾಯಾಮ: ಫಿಟ್ ಆಗಿರಲು ಈ ತಪ್ಪುಗಳನ್ನು ಮಾಡಬೇಡಿ!

ಭಾರತದ ಪ್ರಮುಖ ನಗರಗಳಲ್ಲಿ ಇಂದು ಬೆಳ್ಳಂಬೆಳಗ್ಗೆಯೇ ಬಿಸಿಲಿನ ಧಗಧಗ ಶುರುವಾಗಿದೆ. ಏಪ್ರಿಲ್ 9ರಂದು ದೇಶದ ಹಲವು ನಗರಗಳಲ್ಲಿ ತಾಪಮಾನ ಏರಿಕೆಯಾಗಲಿದೆ ಎಂದು ಹವಾಮಾನ ಇಲಾಖೆ (IMD) ಎಚ್ಚರಿಸಿದೆ. ಹೀಗಾಗಿ, ಫಿಟ್ನೆಸ್ ಪ್ರಿಯರು ತಮ್ಮ ವರ್ಕೌಟ್ ಸಮಯದಲ್ಲಿ ಬದಲಾವಣೆ ಮಾಡಿಕೊಳ್ಳುವುದು ಅನಿವಾರ್ಯ. ಬಿಸಿಲಿನ ತಾಪದಿಂದ ತಪ್ಪಿಸಿಕೊಳ್ಳಲು ಬೆಳಗ್ಗೆ 7 ಗಂಟೆಯೊಳಗೆ ವ್ಯಾಯಾಮ ಮುಗಿಸುವುದು ಉತ್ತಮ.

ವಿಪರೀತ ಶಾಖ ಮತ್ತು ಕಲುಷಿತ ಗಾಳಿ ನಿಮ್ಮ ಹೃದಯ ಹಾಗೂ ಶ್ವಾಸಕೋಶದ ಮೇಲೆ ಒತ್ತಡ ಹೇರಬಹುದು. ಆದ್ದರಿಂದ, ಮನೆಯ ಒಳಗೇ ವ್ಯಾಯಾಮ ಮಾಡಿ ಅಥವಾ ನೆರಳಿರುವ ಜಾಗವನ್ನು ಆಯ್ದುಕೊಳ್ಳಿ ಎಂದು ತಜ್ಞರು ಸಲಹೆ ನೀಡುತ್ತಾರೆ. ನಿಮ್ಮ ಭಾಗದಲ್ಲಿ ವಾಯು ಮಾಲಿನ್ಯ (AQI) ಹೆಚ್ಚಿದ್ದರೆ ಮಾಸ್ಕ್ ಧರಿಸುವುದು ಮರೆಯಬೇಡಿ. ಜೊತೆಗೆ, ದೇಹದಲ್ಲಿ ನೀರಿನಂಶ ಕಡಿಮೆಯಾಗದಂತೆ ನೋಡಿಕೊಂಡರೆ ಸುಸ್ತು ಆವರಿಸುವುದಿಲ್ಲ.

ಬೆಳಗ್ಗೆ 7 ಗಂಟೆಯೊಳಗೆ ಮಾಡಬಹುದಾದ ಹೀಟ್-ಸೇಫ್ ಯೋಗ ಮತ್ತು ಸ್ಟ್ರೆಚಿಂಗ್

ಬಿಸಿಲಿನ ಹೊಡೆತಕ್ಕೆ ಸಿಲುಕದೆ ಫಿಟ್ ಆಗಿರಲು ಮನೆಯಲ್ಲೇ ಕೇವಲ 10 ನಿಮಿಷ ವ್ಯಾಯಾಮ ಮಾಡಿ. ಮೊದಲು ನಾಲ್ಕು ಬಾರಿ ನಿಧಾನವಾಗಿ ಸೂರ್ಯ ನಮಸ್ಕಾರ ಮಾಡುವ ಮೂಲಕ ದೇಹವನ್ನು ಸಜ್ಜುಗೊಳಿಸಿ. ನಂತರ ಕುತ್ತಿಗೆ ಮತ್ತು ಭುಜದ ಸರಳ ವ್ಯಾಯಾಮಗಳ ಮೂಲಕ ಸ್ನಾಯುಗಳ ಬಿಗಿತವನ್ನು ಸಡಿಲಗೊಳಿಸಿ. ಇವುಗಳನ್ನು ಮನೆಯ ಸಣ್ಣ ಜಾಗದಲ್ಲೂ ಸುಲಭವಾಗಿ ಮಾಡಬಹುದು.

ಕೋರ್ ಸ್ನಾಯುಗಳ ಬಲವರ್ಧನೆಗಾಗಿ ಹಿಪ್ ಮತ್ತು ಗ್ಲೂಟ್ ಬ್ರಿಡ್ಜ್ ವ್ಯಾಯಾಮಗಳನ್ನು ಮಾಡಿ. ರಕ್ತ ಪರಿಚಲನೆ ಸುಧಾರಿಸಲು ಕಾಲುಗಳ ವ್ಯಾಯಾಮ (calf and ankle pumps) ಸಹಕಾರಿ. ಕೊನೆಯಲ್ಲಿ 5 ನಿಮಿಷಗಳ ಕಾಲ ಅನುಲೋಮ-ವಿಲೋಮ ಪ್ರಾಣಾಯಾಮ ಮಾಡಿ. ಇದು ನಿಮ್ಮ ದೇಹದ ಉಷ್ಣತೆಯನ್ನು ಸಮತೋಲನದಲ್ಲಿಡಲು ಮತ್ತು ಮನಸ್ಸನ್ನು ಶಾಂತವಾಗಿರಿಸಲು ನೆರವಾಗುತ್ತದೆ.

ಬಿಸಿಲಿನ ದಿನಗಳಲ್ಲಿ ಹೈಡ್ರೇಶನ್ ಬಗ್ಗೆ ಇರಲಿ ಗಮನ

ವ್ಯಾಯಾಮ ಆರಂಭಿಸುವ ಮುನ್ನ ಎಲೆಕ್ಟ್ರೋಲೈಟ್ ಬೆರೆಸಿದ 300 ರಿಂದ 500 ಮಿಲಿ ನೀರು ಕುಡಿಯಿರಿ. ಇದು ಬೆವರಿನ ಮೂಲಕ ಹೊರಹೋಗುವ ಖನಿಜಾಂಶಗಳನ್ನು ಮರುಪೂರಣ ಮಾಡುತ್ತದೆ. ವರ್ಕೌಟ್ ಮಾಡುವಾಗ ಮಧ್ಯೆ ಮಧ್ಯೆ ನೀರು ಕುಡಿಯುವುದರಿಂದ ಸುಸ್ತು ಕಡಿಮೆಯಾಗಿ ಎನರ್ಜಿ ಉಳಿಯುತ್ತದೆ. ಹೊರಗೆ ವಾಕಿಂಗ್ ಹೋಗುವ ಮುನ್ನ ಹವಾಮಾನ ವರದಿಯನ್ನು ಒಮ್ಮೆ ಗಮನಿಸಿ.

ಬದಲಾಗುತ್ತಿರುವ ಹವಾಮಾನಕ್ಕೆ ತಕ್ಕಂತೆ ನಮ್ಮ ಜೀವನಶೈಲಿಯನ್ನು ಬದಲಿಸಿಕೊಳ್ಳುವುದು ಆರೋಗ್ಯದ ದೃಷ್ಟಿಯಿಂದ ಬಹಳ ಮುಖ್ಯ. ಈ ಸರಳ ಕ್ರಮಗಳನ್ನು ಪಾಲಿಸುವ ಮೂಲಕ ನೀವು ಬಿಸಿಲಿನಲ್ಲೂ ಲವಲವಿಕೆಯಿಂದ ಇರಬಹುದು. ಅತಿಯಾದ ಕಸರತ್ತು ಮಾಡುವ ಬದಲು ನಿಮ್ಮ ದೇಹದ ಸಾಮರ್ಥ್ಯಕ್ಕೆ ತಕ್ಕಂತೆ ವ್ಯಾಯಾಮ ಮಾಡಿ. ಸುರಕ್ಷತೆಗೆ ಮೊದಲ ಆದ್ಯತೆ ನೀಡಿ, ಆರೋಗ್ಯಕರವಾಗಿರಿ.

Disclaimer: ಈ ಲೇಖನದಲ್ಲಿ ಒದಗಿಸಲಾದ ಮಾಹಿತಿಯು ಸಾಮಾನ್ಯ ಮಾಹಿತಿ ಮತ್ತು ಶೈಕ್ಷಣಿಕ ಉದ್ದೇಶಗಳಿಗಾಗಿ ಮಾತ್ರವಾಗಿದೆ. ವೃತ್ತಿಪರ ವೈದ್ಯಕೀಯ ಸಲಹೆ, ರೋಗನಿರ್ಣಯ ಅಥವಾ ಚಿಕಿತ್ಸೆಗೆ ಪರ್ಯಾಯವಾಗಿ ಇದನ್ನು ದೃಢೀಕರಿಸಿಲ್ಲ. ವೈದ್ಯಕೀಯ ಸ್ಥಿತಿಯ ಕುರಿತು ನೀವು ಹೊಂದಿರುವ ಯಾವುದೇ ಪ್ರಶ್ನೆಗಳಿಗೆ ಯಾವಾಗಲೂ ನಿಮ್ಮ ವೈದ್ಯರು ಅಥವಾ ಅರ್ಹ ಆರೋಗ್ಯ ಸಿಬ್ಬಂದಿಯ ಸಲಹೆಯನ್ನು ಪಡೆಯಿರಿ.