ಇನ್ಮುಂದೆ ಬಿಸ್ಕತ್ತು, ಕೂಲ್ ಡ್ರಿಂಕ್ಸ್ ಮೇಲೆ ಕೆಂಪು ಎಚ್ಚರಿಕೆ ಲೇಬಲ್: FSSAI ಹೊಸ ನಿಯಮವೇನು?

ಪ್ಯಾಕ್ ಮಾಡಿದ ಆಹಾರ ಪದಾರ್ಥಗಳಲ್ಲಿ ಸಕ್ಕರೆ, ಉಪ್ಪು ಅಥವಾ ಹಾನಿಕಾರಕ ಕೊಬ್ಬು (ಸ್ಯಾಚುರೇಟೆಡ್ ಫ್ಯಾಟ್) ಪ್ರಮಾಣ ಹೆಚ್ಚಿದ್ದರೆ, ಪ್ಯಾಕೆಟ್‌ನ ಮುಂಭಾಗದಲ್ಲೇ ಕೆಂಪು ಬಣ್ಣದ ಎಚ್ಚರಿಕೆ ಲೇಬಲ್ ಹಾಕುವುದು ಇನ್ಮುಂದೆ ಕಡ್ಡಾಯವಾಗುವ ಸಾಧ್ಯತೆಯಿದೆ. ಸುಪ್ರೀಂ ಕೋರ್ಟ್ ನೀಡಿದ್ದ ಆಗಸ್ಟ್ 13 ರ ಎರಡು ವಾರಗಳ ಗಡುವಿನ ಬೆನ್ನಲ್ಲೇ, 2026 ರ ಆಗಸ್ಟ್ 28-29 ರಂದು ಭಾರತೀಯ ಆಹಾರ ಸುರಕ್ಷತಾ ಮತ್ತು ಗುಣಮಟ್ಟ ಪ್ರಾಧಿಕಾರ (FSSAI) ಈ ಕುರಿತು ಪ್ರಸ್ತಾವನೆ ಸಲ್ಲಿಸಿದೆ. ಸದ್ಯಕ್ಕಿದು ಪ್ರಸ್ತಾವನೆಯ ಹಂತದಲ್ಲಿದ್ದು, ಶೀಘ್ರದಲ್ಲೇ ಬಿಸ್ಕತ್ತು, ಕೂಲ್ ಡ್ರಿಂಕ್ಸ್ ಮತ್ತು ನಮ್ಕೀನ್‌ ಪ್ಯಾಕೆಟ್‌ಗಳ ಮೇಲೆ ಈ ಬದಲಾವಣೆ ಕಾಣಿಸಿಕೊಳ್ಳಬಹುದು. "ನಾವು ಸಲಹೆ ನೀಡುತ್ತಿಲ್ಲ, ನಿರ್ದೇಶನ ನೀಡುತ್ತಿದ್ದೇವೆ" ಎಂದು ಸುಪ್ರೀಂ ಪೀಠ ಈ ಹಿಂದೆ ಎಚ್ಚರಿಸಿತ್ತು.

ಇನ್ನು ಮುಂದೆ ಆಹಾರ ಪ್ಯಾಕೆಟ್‌ಗಳ ಮುಂಭಾಗದಲ್ಲಿ ನ್ಯೂಟ್ರಿಷನ್ ಚಾರ್ಟ್‌ಗಿಂತಲೂ ದೊಡ್ಡದಾಗಿ, ಕೆಂಪು ಬಣ್ಣದ ಷಡ್ಕೋನ (Hexagon) ಆಕಾರದಲ್ಲಿ "HIGH SUGAR" (ಹೆಚ್ಚು ಸಕ್ಕರೆ), "HIGH SALT" (ಹೆಚ್ಚು ಉಪ್ಪು) ಅಥವಾ "HIGH FAT" (ಹೆಚ್ಚು ಕೊಬ್ಬು) ಎಂದು ಬರೆಯಲಾಗುತ್ತದೆ. ಇದನ್ನು ಹಂತ ಹಂತವಾಗಿ ಜಾರಿಗೆ ತರಲು ಯೋಜಿಸಲಾಗಿದೆ. ಮೊದಲ ಹಂತದಲ್ಲಿ ಕನಿಷ್ಠ ಎರಡು ಹಾನಿಕಾರಕ ಅಂಶಗಳು ಹೆಚ್ಚಿರುವ ಉತ್ಪನ್ನಗಳಿಗೆ, ಆ ಬಳಿಕ ಒಂದೇ ಅಂಶ ಹೆಚ್ಚಿರುವ ಉತ್ಪನ್ನಗಳಿಗೆ ಈ ಲೇಬಲ್ ಕಡ್ಡಾಯವಾಗಲಿದೆ. ಆದರೆ ತುಪ್ಪ, ಎಣ್ಣೆ, ಉಪ್ಪು, ಸಕ್ಕರೆ, ಬೆಲ್ಲ ಮತ್ತು ಜೇನುತುಪ್ಪದಂತಹ ಮೂಲ ಆಹಾರ ಸಾಮಗ್ರಿಗಳಿಗೆ ಇದರಿಂದ ವಿನಾಯಿತಿ ನೀಡುವ ಪ್ರಸ್ತಾವನೆಯಿದೆ.

ಫ್ರಂಟ್ ಲೇಬಲ್ ಎಚ್ಚರಿಕೆ: ಈಗೇನು ಬದಲಾಗುತ್ತೆ, ಮುಂದೆ ಏನೆಲ್ಲಾ ಆಗಲಿದೆ?

ಪ್ರಸ್ತುತ ಮಾರುಕಟ್ಟೆಯಲ್ಲಿ ಸಿಗುವ ಆಹಾರ ಪದಾರ್ಥಗಳಲ್ಲಿ ತಕ್ಷಣಕ್ಕೇನೂ ಬದಲಾವಣೆಯಾಗುವುದಿಲ್ಲ. ಎಷ್ಟು ಪ್ರಮಾಣದ ಮಿತಿ ಇರಬೇಕು ಮತ್ತು ಯಾವಾಗ ಜಾರಿಗೆ ಬರಬೇಕು ಎಂಬುದು ಇನ್ನು ತೀರ್ಮಾನವಾಗಬೇಕಿದೆ. ಸುಪ್ರೀಂ ಕೋರ್ಟ್ ಸೆಪ್ಟೆಂಬರ್ 10 ರ ಸುಮಾರಿಗೆ ಈ ಪ್ರಕ್ರಿಯೆಯನ್ನು ಪರಿಶೀಲಿಸುವ ಸಾಧ್ಯತೆಯಿದೆ. ಅಲ್ಲಿಯವರೆಗೆ, ಗ್ರಾಹಕರು ಕೇವಲ 'ಸರ್ವಿಂಗ್ ಸೈಜ್' ನೋಡುವ ಬದಲು 'ಪ್ರತಿ 100 ಗ್ರಾಂ'ಗೆ ಎಷ್ಟಿದೆ ಎಂಬುದನ್ನು ಪರಿಶೀಲಿಸಿ ಖರೀದಿಸುವುದು ಒಳ್ಳೆಯದು. ದಿನವೊಂದಕ್ಕೆ ಗರಿಷ್ಠ 25 ಗ್ರಾಂ ಸಕ್ಕರೆ, 10 ಗ್ರಾಂ ಸ್ಯಾಚುರೇಟೆಡ್ ಫ್ಯಾಟ್ ಮತ್ತು 5 ಗ್ರಾಂ ಉಪ್ಪು ಸೇವನೆ ಸುರಕ್ಷಿತ ಎಂಬ ಹಳೆಯ ಮಾನದಂಡವನ್ನು ಸದ್ಯಕ್ಕೆ ನೆನಪಿನಲ್ಲಿಡಬಹುದು.

ಫುಡ್ ಲೇಬಲ್ ಓದೋದು ಹೇಗೆ? ಗ್ರಾಹಕರಿಗೆ ಸಿಂಪಲ್ ಟಿಪ್ಸ್

ವಿವಿಧ ಪ್ಯಾಕೆಟ್‌ಗಳನ್ನು ಹೋಲಿಕೆ ಮಾಡಲು ಮೊದಲು 'ಪ್ರತಿ 100 ಗ್ರಾಂ' ಪ್ರಮಾಣವನ್ನು ಗಮನಿಸಿ. ಕಂಪನಿಗಳು ದೊಡ್ಡ ನಂಬರ್‌ಗಳನ್ನು ಮುಚ್ಚಿಡಲು 'ಸರ್ವಿಂಗ್ ಸೈಜ್' ಸಣ್ಣದಾಗಿ ನಮೂದಿಸಿರುತ್ತವೆ, ಹುಷಾರ್! ಪದಾರ್ಥಗಳ ಪಟ್ಟಿಯಲ್ಲಿ (Ingredients) ಮೊದಲು ನೀಡಲಾದ ವಸ್ತುವೇ ಆ ಉತ್ಪನ್ನದಲ್ಲಿ ಹೆಚ್ಚಿರುತ್ತದೆ. "No added sugar" (ಹೆಚ್ಚುವರಿ ಸಕ್ಕರೆ ಸೇರಿಸಿಲ್ಲ) ಎಂದಿದ್ದರೂ ಅದರಲ್ಲಿ ಒಟ್ಟು ಸಕ್ಕರೆ ಪ್ರಮಾಣ ಹೆಚ್ಚಿರಬಹುದು. ಮಕ್ಕಳು ಹಾಗೂ ಮಧುಮೇಹಿಗಳಿಗೆ ಸಕ್ಕರೆ ರಹಿತ ಮತ್ತು ಸಂಸ್ಕರಿಸದ ಆಹಾರ ನೀಡುವುದು ಸೂಕ್ತ. ಜಟಿಲ ಸಂಖ್ಯೆಗಳ ಪಟ್ಟಿಗಿಂತ ಇಂತಹ ಕೆಂಪು ಲೇಬಲ್ ಎಚ್ಚರಿಕೆಗಳು ಗ್ರಾಹಕರಿಗೆ ಬೇಗ ಅರ್ಥವಾಗುತ್ತವೆ ಎಂಬುದು ಕೋರ್ಟ್ ಅಭಿಪ್ರಾಯ.

ಗ್ರಾಹಕರ ಗಮನಕ್ಕೆ: ದೂರು ನೀಡುವುದು ಹೇಗೆ? ಹಂತ-ಹಂತದ ಮಾಹಿತಿ

ಆಹಾರ ಪ್ಯಾಕೆಟ್‌ನಲ್ಲಿ ನೀಡಲಾದ ಮಾಹಿತಿ ತಪ್ಪಾಗಿದ್ದರೆ ಅಥವಾ ದಾರಿತಪ್ಪಿಸುವಂತಿದ್ದರೆ, ಪ್ಯಾಕೆಟ್‌ನ ಮುಂಭಾಗ ಮತ್ತು ನ್ಯೂಟ್ರಿಷನ್ ಚಾರ್ಟ್‌ನ ಫೋಟೋ ತೆಗೆದಿಟ್ಟುಕೊಳ್ಳಿ. FSSAI ನ 'Food Safety Connect' ಆ್ಯಪ್ ಅಥವಾ 'FoSCoS' ವೆಬ್‌ಪೋರ್ಟಲ್ ಮೂಲಕ ದೂರು ನೀಡಬಹುದು. ಜೊತೆಗೆ, ಟೋಲ್ ಫ್ರೀ ಸಂಖ್ಯೆ 1800‑11‑2100 ಗೆ ಕರೆ ಮಾಡಬಹುದು ಅಥವಾ 9868686868 ಗೆ ವಾಟ್ಸಾಪ್ ಮೆಸೇಜ್ ಕಳುಹಿಸಬಹುದು. ನಿಮ್ಮ ದೂರಿಗೆ ಸೂಕ್ತ ಸ್ಪಂದನೆ ಸಿಗದಿದ್ದರೆ, ರಾಜ್ಯ ಆಹಾರ ಸುರಕ್ಷತಾ ಆಯುಕ್ತರಿಗೆ (State Food Safety Commissioner) ದೂರು ನೀಡಬಹುದು.

Disclaimer: ಈ ಲೇಖನದಲ್ಲಿ ಒದಗಿಸಲಾದ ಮಾಹಿತಿಯು ಸಾಮಾನ್ಯ ಮಾಹಿತಿ ಮತ್ತು ಶೈಕ್ಷಣಿಕ ಉದ್ದೇಶಗಳಿಗಾಗಿ ಮಾತ್ರವಾಗಿದೆ. ವೃತ್ತಿಪರ ವೈದ್ಯಕೀಯ ಸಲಹೆ, ರೋಗನಿರ್ಣಯ ಅಥವಾ ಚಿಕಿತ್ಸೆಗೆ ಪರ್ಯಾಯವಾಗಿ ಇದನ್ನು ದೃಢೀಕರಿಸಿಲ್ಲ. ವೈದ್ಯಕೀಯ ಸ್ಥಿತಿಯ ಕುರಿತು ನೀವು ಹೊಂದಿರುವ ಯಾವುದೇ ಪ್ರಶ್ನೆಗಳಿಗೆ ಯಾವಾಗಲೂ ನಿಮ್ಮ ವೈದ್ಯರು ಅಥವಾ ಅರ್ಹ ಆರೋಗ್ಯ ಸಿಬ್ಬಂದಿಯ ಸಲಹೆಯನ್ನು ಪಡೆಯಿರಿ.