ಹಬ್ಬದ ಸೀಸನ್‌ನಲ್ಲಿ ಎಚ್ಚರ! ಮಾರುಕಟ್ಟೆಯಲ್ಲಿ ನಕಲಿ 'ಅನಲಾಗ್ ಪನೀರ್' ಹಾವಳಿ: ಅಸಲಿ ಪನೀರ್ ಗುರುತಿಸುವುದು ಹೇಗೆ?

ರಾಜ್ಯಗಳಲ್ಲಿ ಒಂದೊಂದಾಗಿಯೇ ಬ್ಯಾನ್ ಆಗ್ತಿರೋ ‘ಅನಲಾಗ್ ಪನೀರ್’ (Analogue Paneer) ವಿರುದ್ಧ ಈಗ ದೇಶಾದ್ಯಂತ ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳಲು ಭಾರತೀಯ ಆಹಾರ ಸುರಕ್ಷತೆ ಮತ್ತು ಮಾನಕಗಳ ಪ್ರಾಧಿಕಾರ (FSSAI) ಮುಂದಾಗಿದೆ. ಈ ಬಗ್ಗೆ ಮಾತನಾಡಿದ FSSAI ಮುಖ್ಯಸ್ಥ ರಜಿತ್ ಪುನ್ಹಾನಿ, "ಎಲ್ಲಾ ರಾಜ್ಯಗಳಿಂದ ಅಭಿಪ್ರಾಯ ಸಂಗ್ರಹಿಸಿ, ಒಮ್ಮತದ ನಿರ್ಧಾರಕ್ಕೆ ಬಂದ ನಂತರ ಇಡೀ ದೇಶದಲ್ಲೇ ಅನಲಾಗ್ ಪನೀರ್ ಬ್ಯಾನ್ ಮಾಡುತ್ತೇವೆ" ಎಂದು ಸ್ಪಷ್ಟಪಡಿಸಿದ್ದಾರೆ. ಈಗಾಗಲೇ 8 ರಾಜ್ಯಗಳು ಇದರ ಮೇಲೆ ನಿಷೇಧ ಹೇರಿವೆ. ಹೀಗಾಗಿ ಹಬ್ಬದ ಸೀಸನ್‌ನಲ್ಲಿ ಗ್ರೋಸರಿ ಅಥವಾ ಸಿಹಿ ತಿಂಡಿ ಖರೀದಿಸುವಾಗ ಲೇಬಲ್ ಪರಿಶೀಲಿಸುವುದು ಅತ್ಯಗತ್ಯ.

ಅಷ್ಟಕ್ಕೂ ಏನಿದು ‘ಅನಲಾಗ್ ಪನೀರ್’? ಇದು ಹಾಲಿನಿಂದ ಮಾಡಿದ ನಿಜವಾದ ಪನೀರ್ ಅಲ್ಲ. ಬದಲಿಗೆ ಹಾಲಿನ ಕೊಬ್ಬು ಅಥವಾ ಪ್ರೋಟೀನ್ ಜಾಗದಲ್ಲಿ ಸಸ್ಯಜನ್ಯ ಎಣ್ಣೆ, ಪಿಷ್ಟ (ಸ್ಟಾರ್ಚ್) ಅಥವಾ ಸಸ್ಯಜನ್ಯ ಪ್ರೋಟೀನ್ ಬಳಸಿ ತಯಾರಿಸಲಾಗುವ ಪನೀರ್ ರೂಪದ ಉತ್ಪನ್ನ. ನೋಡಲು ಮತ್ತು ಅಡುಗೆ ಮಾಡಲು ಇದು ಥೇಟ್ ನಿಜವಾದ ಪನೀರ್‌ನಂತೆಯೇ ಇರುತ್ತದೆ. FSSAI ಈಗಾಗಲೇ ಇಂತಹ 'ಡೈರಿ ಅನಲಾಗ್‌'ಗಳಿಗೆ ನಿಯಮಗಳನ್ನು ರೂಪಿಸಿದ್ದು, ಅವುಗಳ ಹೆಸರಿಡುವಿಕೆಗೆ ಕಟ್ಟುನಿಟ್ಟಿನ ಚೌಕಟ್ಟು ವಿಧಿಸಿದೆ. ಸೆಪ್ಟೆಂಬರ್ 24 ರಂದು ರಾಜ್ಯಗಳ ಪ್ರತಿನಿಧಿಗಳ ಸಭೆ ನಡೆಯಲಿದ್ದು, ಮತ್ತಷ್ಟು ಬಿಗಿ ನಿಯಮ ತರಲು ಚಿಂತಿಸಲಾಗಿದೆ. ಅಧಿಕೃತ ಆದೇಶ ಬರುವವರೆಗೆ, ನೀವು ಖರೀದಿಸುವಾಗ ಲೇಬಲ್ ಚೆಕ್ ಮಾಡುವುದೊಂದೇ ಸುರಕ್ಷಿತ ಮಾರ್ಗ.

ಅನಲಾಗ್ ಪನೀರ್ ಗುರುತಿಸುವುದು ಹೇಗೆ? ಲೇಬಲ್‌ನಲ್ಲಿ ಈ ವಿಷಯಗಳನ್ನು ತಪ್ಪದೇ ಗಮನಿಸಿ

ಉತ್ಪನ್ನದ ಮೇಲೆ ಹಾಲಿನ ಹನಿಯ 'ಡೈರಿ ಲೋಗೋ' (Milk-drop logo) ಇದೆಯೇ ಎಂದು ಪರಿಶೀಲಿಸಿ. ಅನಲಾಗ್ ಪನೀರ್‌ಗಳಿಗೆ ಈ ಲೋಗೋ ಬಳಸಲು ಅವಕಾಶವಿಲ್ಲ. ಉತ್ಪನ್ನದ ಹೆಸರಿನ ಬಳಿ "Analogue" ಅಥವಾ "Non-dairy" ಎಂದು ನಮೂದಿಸಿರಬೇಕು, ಜೊತೆಗೆ "Contains vegetable fat" (ಸಸ್ಯಜನ್ಯ ಕೊಬ್ಬು ಹೊಂದಿದೆ) ಎಂದು ಸ್ಪಷ್ಟವಾಗಿ ಬರೆದಿರಬೇಕು. ಪ್ಯಾಕೆಟ್ ಮೇಲಿರುವ FSSAI ಲೈಸೆನ್ಸ್ ನಂಬರ್ ಚೆಕ್ ಮಾಡಿ. ಬಿಡಿಯಾಗಿ ಸಿಗುವ, ಲೇಬಲ್ ಇಲ್ಲದ ಪನೀರ್ ಖರೀದಿಸುವುದನ್ನು ಆದಷ್ಟು ತಪ್ಪಿಸಿ. ಹೋಟೆಲ್ ಹಾಗೂ ಸ್ವೀಟ್ ಶಾಪ್‌ಗಳ ಮೆನು ಅಥವಾ ಬಿಲ್‌ಗಳಲ್ಲಿ ಅನಲಾಗ್ ಪನೀರ್ ಬಳಕೆಯ ಬಗ್ಗೆ ಸ್ಪಷ್ಟವಾಗಿ ಪ್ರಕಟಿಸಬೇಕು ಎಂದು ಅಧಿಕಾರಿಗಳು ಸೂಚಿಸಿದ್ದಾರೆ. ಸೋಶಿಯಲ್ ಮೀಡಿಯಾದಲ್ಲಿ ಹರಿದಾಡುವ ಅಸುರಕ್ಷಿತ 'ಹೋಮ್ ಟೆಸ್ಟ್'ಗಳನ್ನು ನಂಬಬೇಡಿ.

ಅನಲಾಗ್ ಪನೀರ್ ಬದಲಿಗೆ ನಿಮ್ಮ ಅಡುಗೆಮನೆಗೆ ಸೂಕ್ತವಾದ ಉತ್ತಮ ಪ್ರೋಟೀನ್ ಆಯ್ಕೆಗಳು

ನಿಮಗೆ ಲೇಬಲ್ ಗೊಂದಲವಿಲ್ಲದ, ನಂಬಿಕಸ್ಥ ಪ್ರೋಟೀನ್ ಬೇಕಿದ್ದರೆ ನೈಸರ್ಗಿಕ ಹಾಲಿನ ಪನೀರ್, ಫರ್ಮ್ ಟೋಫು (Firm Tofu) ಅಥವಾ ಕಾಟೇಜ್ ಚೀಸ್ ಉತ್ತಮ ಪರ್ಯಾಯ. ಪನೀರ್‌ನಲ್ಲಿ ಪ್ರೋಟೀನ್ ಪ್ರಮಾಣ ಹೆಚ್ಚಿರುತ್ತದೆಯಾದರೂ, ಸ್ಯಾಚುರೇಟೆಡ್ ಕೊಬ್ಬು ಕೂಡ ಹೆಚ್ಚಿರುತ್ತದೆ. ಟೋಫು ಕಮ್ಮಿ ಕೊಬ್ಬಿನಾಂಶ ಹೊಂದಿದ್ದು, ಲ್ಯಾಕ್ಟೋಸ್ ಮುಕ್ತವಾಗಿದೆ (Lactose-free). ಇನ್ನು ಕಾಟೇಜ್ ಚೀಸ್ ಕಡಿಮೆ ಕೊಬ್ಬು ಮತ್ತು ಹೆಚ್ಚಿನ ಪ್ರೋಟೀನ್ ನೀಡಲಿದ್ದು, ತೂಕ ಇಳಿಸಿಕೊಳ್ಳಲು ಹಾಗೂ ಸಕ್ಕರೆ ಕಾಯಿಲೆ ಇರುವವರಿಗೆ ಒಳ್ಳೆಯದು (ಸೋಡಿಯಂ ಪ್ರಮಾಣ ಗಮನದಲ್ಲಿರಲಿ). 100 ಗ್ರಾಂಗೆ ಸಿಗುವ ಪೋಷಕಾಂಶಗಳ ವಿವರ ಹೀಗಿದೆ:

ನಕಲಿ ಅಥವಾ ಅನಲಾಗ್ ಪನೀರ್ ಕಂಡುಬಂದರೆ ದೂರು ನೀಡುವುದು ಹೇಗೆ?

ನಿಮಗೆ ಪನೀರ್ ಬಗ್ಗೆ ಅನುಮಾನ ಬಂದರೆ, ಅದರ ಬಿಲ್, ಲೇಬಲ್‌ನ ಫೋಟೋ ಹಾಗೂ ಅಂಗಡಿಯ ವಿವರಗಳನ್ನು ಭದ್ರವಾಗಿಟ್ಟುಕೊಳ್ಳಿ. FSSAI ನ 'Food Safety Connect' ಆ್ಯಪ್ ಅಥವಾ ವೆಬ್ ಪೋರ್ಟಲ್‌ನಲ್ಲಿ ದೂರು ದಾಖಲಿಸಬಹುದು. ನಿಯಮ ಉಲ್ಲಂಘನೆಯ ವಿವರ ಮತ್ತು ಫೋಟೋಗಳನ್ನು ಅಲ್ಲಿ ಅಪ್‌ಲೋಡ್ ಮಾಡಿ. ಅಷ್ಟೇ ಅಲ್ಲ, FSSAI ನ ಸಹಾಯವಾಣಿ ಸಂಖ್ಯೆ 1800‑11‑2100 ಗೆ ಕರೆ ಮಾಡಿಯೂ ದೂರು ನೀಡಬಹುದು. ಹಬ್ಬಗಳ ಸಾಲು ಸಾಲು ದಿನಗಳು ಹತ್ತಿರವಾಗುತ್ತಿರುವುದರಿಂದ, ನಿಮ್ಮ ಸಕಾಲಿಕ ದೂರು ಅಧಿಕಾರಿಗಳು ತಕ್ಷಣ ತನಿಖೆ ನಡೆಸಲು ನೆರವಾಗುತ್ತದೆ.

Disclaimer: ಈ ಲೇಖನದಲ್ಲಿ ಒದಗಿಸಲಾದ ಮಾಹಿತಿಯು ಸಾಮಾನ್ಯ ಮಾಹಿತಿ ಮತ್ತು ಶೈಕ್ಷಣಿಕ ಉದ್ದೇಶಗಳಿಗಾಗಿ ಮಾತ್ರವಾಗಿದೆ. ವೃತ್ತಿಪರ ವೈದ್ಯಕೀಯ ಸಲಹೆ, ರೋಗನಿರ್ಣಯ ಅಥವಾ ಚಿಕಿತ್ಸೆಗೆ ಪರ್ಯಾಯವಾಗಿ ಇದನ್ನು ದೃಢೀಕರಿಸಿಲ್ಲ. ವೈದ್ಯಕೀಯ ಸ್ಥಿತಿಯ ಕುರಿತು ನೀವು ಹೊಂದಿರುವ ಯಾವುದೇ ಪ್ರಶ್ನೆಗಳಿಗೆ ಯಾವಾಗಲೂ ನಿಮ್ಮ ವೈದ್ಯರು ಅಥವಾ ಅರ್ಹ ಆರೋಗ್ಯ ಸಿಬ್ಬಂದಿಯ ಸಲಹೆಯನ್ನು ಪಡೆಯಿರಿ.