ತೂಕ ಇಳಿಕೆಗೆ ತುಂಬಾ ಸಹಕಾರಿ ಈ ಸಬ್ಜಾ ಬೀಜ

ಸಬ್ಜಾದ ಗುಣಗಳು

ಕಡಿಮೆ ಕಾರ್ಬೋಹೈಡ್ರೇಟ್ಸ್ ಅಧಿಕ ಪ್ರೊಟೀನ್ ಈ ಬೀಜದಲ್ಲಿದೆ. ಈ ರೀತಿಯ ಕಾಂಬಿನೇಷನ್‌ನ ಸಸ್ಯಾಹಾರ ಅಪರೂಪ. ಆದ್ದರಿಂದ ಇದನ್ನು ಆಹಾರಕ್ರಮದಲ್ಲಿ ಸೇರಿಸುವುದು ಅತ್ಯುತ್ತಮವಾಗಿದೆ. ಕಾಮ ಕಸ್ತೂರಿ ಬೀಜ ಆರೋಗ್ಯಕ್ಕೆ ತುಂಬಾ ಒಳ್ಳೆಯದು. ಇದರಲ್ಲಿ ಒಮೆಗಾ 3 ಹಾಗೂ ಒಮೆಗಾ 6 ಕೊಬ್ಬಿನಂಶವಿರುವುದರಿಂದ ಆರೋಗ್ಯಕ್ಕೆ ತುಂಬಾ ಒಳ್ಳೆಯದು.

ತೂಕ ಇಳಿಕೆಗೆ ಹೇಗೆ ಸಹಕಾರಿ?

ಎರಡು ಚಮಚ ಸಬ್ಜಾವನ್ನು ರಾತ್ರಿ ನೀರಿನಲ್ಲಿ ನೆನೆಹಾಕಿ ಬೆಳಗ್ಗೆ ಖಾಲಿ ಹೊಟ್ಟೆಯಲ್ಲಿ ಕುಡಿಯಬೇಕು. ಎರಡು ಚಮಚ ಸಬ್ಜಾದಲ್ಲಿ 40ಕ್ಯಾಲೋರಿ ಇದ್ದು 11 ಗ್ರಾಂ ಪ್ರೊಟೀನ್, 5 ಗ್ರಾಂ ಕಾರ್ಬೋಹೈಡ್ರೇಟ್ಸ್, 2 ಗ್ರಾಂ ನಾರಿನಂಶವಿರುವುದರಿಂದ ತೂಕ ಇಳಿಕೆಗೆ ಸರಿಯಾದ ವಸ್ತು ಇದಾಗಿದೆ. ಇದನ್ನು ಪ್ರತಿದಿನ ಬೆಳಗ್ಗೆ ತೆಗೆದುಕೊಳ್ಳುವುದರಿಂದ ಮೈ ಬೊಜ್ಜು ಕರಗುವುದು.

ಇದನ್ನು ಸೇವಿಸುವುದರಿಂದ ತೂಕ ಇಳಿಕೆಯ ಜೊತೆಗೆ ಈ ಪ್ರಯೋಜನಗಳನ್ನೂ ಪಡೆಯಬಹುದು:

ರೋಗ ನಿರೋಧಕ ಶಕ್ತಿ ಹೆಚ್ಚುವುದು

ಇದರಲ್ಲಿ ಫ್ಲೇವೋನಾಯ್ಡ್ ಅಂಶವಿರುವುದರಿಂದ ರೋಗ ನಿರೋಧಕ ಶಕ್ತಿ ಹೆಚ್ಚುವುದು. ಗಂಟಲು ಬೇನೆ ಇರುವವರು ಕಾಮಕಸ್ತೂರಿ ಎಲೆಗಳ ರಸವನ್ನು ಹಿಂಡಿ ಅದನ್ನು ಬಟ್ಟೆಯಲ್ಲಿ ಸೋಸಿ ಜೇನು ತುಪ್ಪ ಬೆರೆಸಿ ತಿಂದರೆ ನೋವು ಕಡಿಮೆಯಾಗುವುದು. ಅಲ್ಲದೆ ಇದರ ಎಲೆಯ ಕಷಾಯ ಮಾಡಿ ಕುಡಿದರೆ ಶೀತ ಮತ್ತು ಜ್ವರ ಕೂಡ ಕಡಿಮೆಯಾಗುವುದು.

ದೇಹವನ್ನು ತಂಪಾಗಿಡುತ್ತದೆ

ಬೇಸಿಗೆಯ ಶಾಖ ನಿಯಂತ್ರಿಸುವಲ್ಲಿ ಇದು ತುಂಬಾ ಸಹಕಾರಿಯಾಗಿದೆ. ಇದನ್ನು ಮಿಲ್ಕ್‌ಶೇಕ್‌, ಫಲೋಡಾ ಇವುಗಳಲ್ಲಿ ಹಾಕಿ ಕುಡಿದರೆ ಚೆನ್ನಾಗಿರುತ್ತದೆ ಹಾಗೂ ಆರೋಗ್ಯಕ್ಕೂ ಒಳ್ಳೆಯದು.

ರಕ್ತದೊತ್ತಡ ಹಾಗೂ ಸಕ್ಕರೆಯಂಶ ನಿಯಂತ್ರಣದಲ್ಲಿಡುತ್ತದೆ

ಇದು ರಕ್ತದೊತ್ತಡವನ್ನು ನಿಯಂತ್ರಿಸುತ್ತದೆ ಹಾಗೂ ಇದು ಚಯಾಪಚಯ ಕ್ರಿಯೆ ನಿಧಾನಗೊಳಿಸುವುದರಿಂದ ಇದು ಕಾರ್ಬೋಹೈಡ್ರೇಟ್ಸ್ ಗ್ಲೂಕೋಸ್‌ ಆಗಿ ಪರಿವರ್ತನೆಯಾಗುವುದನ್ನು ನಿಯಂತ್ರಿಸುತ್ತದೆ. ಇದರಿಂದ ಟೈಪ್‌ 2 ಮಧುಮೇಹಿಗಳು ಇದನ್ನು ಸೇವಿಸುವುದು ಒಳ್ಳೆಯದು.

ಪಿತ್ತ ಮತ್ತು ಎದೆಯುರಿ ಸಮಸ್ಯೆ ಕಡಿಮೆ ಮಾಡುವುದು

ಹೊಟ್ಟೆ ಉರಿ, ಎದೆ ಉರಿ ಸಮಸ್ಯೆ ಇದ್ದರೆ ಸಬ್ಜಾ ನೆನೆಸಿ ಕುಡಿಯುವುದರಿಂದ ಕಡಿಮೆಯಾಗುವುದು. ಇದನ್ನು ಕುಡಿಯುವುದರಿಮದ ಪಿತ್ತ ಸಮಸ್ಯೆ ಕಾಡುವುದಿಲ್ಲ.

ಮಲಬದ್ಧತೆ ಸಮಸ್ಯೆ ನಿವಾರಣೆ ಮಾಡುತ್ತದೆ

ಬಾಳೆಹಣ್ಣಿನ ಜ್ಯೂಸ್‌ ಅಥವಾ ಸ್ಮೂತಿ ಮಾಡಿ ಅದಕ್ಕೆ ಇದನ್ನು ಹಾಕಿ ಕುಡಿಯಿರಿ. ಇದರಿಂದ ಮಲಬದ್ಧತೆ ಸಮಸ್ಯೆ ಉಂಟಾಗುವುದಿಲ್ಲ. ಮಲಬದ್ಧತೆ ಆಗಾಗ ಕಾಡುತ್ತಿದ್ದರೆ ಇದನ್ನು ರಾತ್ರಿ ನೆನೆಹಾಕಿ ಪ್ರತಿದಿನ ಬೆಳಗ್ಗೆ ತೆಗೆದುಕೊಳ್ಳುವುದರಿಂದ ಮಲಬದ್ಧತೆ ಸಮಸ್ಯೆ ಇಲ್ಲವಾಗುವುದು.

ಕೂದಲು ಹಾಗೂ ಚರ್ಮದ ಆರೋಗ್ಯಕ್ಕೂ ಒಳ್ಳೆಯದು

ಸಬ್ಜಾ ಬೀಜಗಳನ್ನು ತೆಂಗಿನೆಣ್ಣೆಯಲ್ಲಿ ಪುಡಿ ಮಾಡಿ ಹಾಕಿ ಅದನ್ನು ಕಜ್ಜಿ ಇರುವ ಹಚ್ಚಿದರೆ ಗುಣಮುಖವಾಗುವುದು. ಇನ್ನು ಇದನ್ನು ಸೇವಿಸುವುದರಿಂದ ತ್ವಚೆಯ ಕೊಲೆಜಿನ್ ಉತ್ಪತ್ತಿಗೂ ಸಹಕಾರಿ. ಇದರಲ್ಲಿ ವಿಟಮಿನ್ ಕೆ ಮತ್ತು ಪ್ರೊಟೀನ್ ಇರುವುದರಿಂದ ಕೂದಲನ್ನು ಕೂಡ ಆಂತರಿಕವಾಗಿ ಆರೈಕೆ ಮಾಡುವುದು.