ಗಂಡನ ಬಟ್ಟೆ ಧರಿಸಿದರೆ ಮಾನಸಿಕ ಒತ್ತಡ ಕಡಿಮೆಯಾಗುವುದು!

ಸಂಗಾತಿಯ ಪರಿಮಳದ ಬಟ್ಟೆ

ಒಂದು ವೇಳೆ ನೀವು ಒತ್ತಡ ಮತ್ತು ಏಕಾಂಗಿತನದಿಂದ ಆಗಾಗ ಬಳಲುತ್ತಿದ್ದರೆ ನಿಮ್ಮ ಸಂಗಾತಿಯ ಬಟ್ಟೆಯನ್ನು ಧರಿಸುವ ಪ್ರಯತ್ನವನ್ನು ಖಂಡಿತ ಮಾಡಬಹುದು. ಬ್ರಿಟಿಷ್ ಕೊಲಂಬಿಯಾ ವಿಶ್ವವಿದ್ಯಾಲಯದ ಅಧ್ಯಯನಕಾರರು ತಿಳಿಸುವ ಪ್ರಕಾರ ಸಂಗಾತಿಯ ಪರಿಮಳವನ್ನು ಹೊಂದಿರುವ ಯಾವುದೇ ವಸ್ತುವನ್ನು ಧರಿಸುವುದರಿಂದಾಗಿ ಒಂಟಿತನ ಮತ್ತು ಒತ್ತಡ, ಆತಂಕವನ್ನು ಕಡಿಮೆ ಮಾಡಿಕೊಳ್ಳಬಹುದಂತೆ.

ಅಧ್ಯಯನದ ಬಗ್ಗೆ ಇನ್ನಷ್ಟು ಮಾಹಿತಿ

ಅಧ್ಯಯನಕಾರರು ಒಂದಷ್ಟು ಮಹಿಳೆಯರನ್ನು ಆಯ್ಕೆ ಮಾಡಿಕೊಳ್ಳುತ್ತಾರೆ ಮತ್ತು ಅವರಿಗೆ ಮೂರು ವಿಭಿನ್ನ ರೀತಿಯ ಪರಿಮಳವನ್ನು ಗ್ರಹಿಸುವುದಕ್ಕೆ ಬಿಡುತ್ತಾರೆ- ಒಂದು ಅಪರಿಚಿತ ವ್ಯಕ್ತಿಯ ಪರಿಮಳ, ಮತ್ತೊಂದು ಅವರ ಸಂಗಾತಿಯ ಪರಿಮಳ ಹಾಗೂ ತಟಸ್ಥವಾಗಿರುವ ಇತರೆ ಪರಿಮಳ. ಸಂಗಾತಿಯ ಬಟ್ಟೆಯನ್ನು ಮಹಿಳೆಯರಿಗೆ ನೀಡುವ ಮುನ್ನ ಅದನ್ನು ಅವರ ಸಂಗಾತಿಯ ಬಳಿ 24 ತಾಸುಗಳ ಕಾಲ ಧರಿಸಿರುವಂತೆ ಸೂಚಿಸಲಾಗಿತ್ತು ಮತ್ತು ಅದರಲ್ಲಿ ಅವರ ಗಾಢ ಪರಿಮಳ ಇರುವಂತೆ ಮಾಡಲಾಗಿತ್ತು.

ಕಡಿಮೆ ಮಟ್ಟದ ಒತ್ತಡ ದಾಖಲಾಗಿದೆ

ಈ ರೀತಿಯ ಶರ್ಟಿನ ವಾಸನೆಯನ್ನು ನೋಡಿದ ನಂತರ ಆ ಮಹಿಳೆಯರನ್ನು ಅಣಕು ಕೆಲಸದ ಸಂದರ್ಶನ (ಮಾಕ್ ಜಾಬ್ ಇಂಟರ್ವ್ಯೂ)ಗೆ ಒಳಪಡಿಸಲಾಯಿತು ಮತ್ತು ಅವರ ಒತ್ತಡದ ಮಟ್ಟವನ್ನು ಲೆಕ್ಕ ಹಾಕುವ ಕೆಲಸವನ್ನು ಮಾಡಲಾಯಿತು.

ಸಂಶೋಧಕರು ಇವರ ಒತ್ತಡದ ಮಟ್ಟ ಮತ್ತು ಕಾರ್ಟಿಸೋಲ್ ಲೆವೆಲ್ ಅನ್ನು ದಾಖಲಿಸಿದಾಗ ಕುತೂಹಲಕಾರಿಯಾಗಿರುವ ಅಂಶ ಬೆಳಕಿಗೆ ಬಂತು. ಯಾವ ಮಹಿಳೆಯರಿಗೆ ತಮ್ಮ ಸಂಗಾತಿಯ ವಾಸನೆ ಇರುವ ಬಟ್ಟೆಯನ್ನು ನೀಡಲಾಗಿತ್ತೋ ಅವರ ಒತ್ತಡದ ಮಟ್ಟ ಬಹಳ ಕಡಿಮೆ ದಾಖಲಾಗಿರುವುದು ಈ ಅಧ್ಯಯನದಿಂದ ಸಾಬೀತಾಗಿದೆ. ಅದೇ ಯಾವ ಮಹಿಳೆಯರು ಇತರೆ ವಾಸನೆಯನ್ನು ಸೇವಿಸಿದ್ದರೋ ಅವರ ಒತ್ತಡದ ಮಟ್ಟ ಸಂಗಾತಿಯ ಬಟ್ಟೆಯ ವಾಸನೆಯನ್ನು ಗ್ರಹಿಸಿದ ಮಹಿಳೆಯರ ಒತ್ತಡದ ಮಟ್ಟಕ್ಕಿಂತ ಅಧಿಕವಾಗಿರುವುದು ಇದರಿಂದ ತಿಳಿದು ಬಂದಿದೆ. ಹಾಗಾಗಿ ನೀವೂ ಕೂಡ ಒತ್ತಡವನ್ನು ಕಡಿಮೆ ಮಾಡಿಕೊಳ್ಳುವುದಕ್ಕಾಗಿ ಈ ವಿಧಾನವನ್ನು ಬೇಕಿದ್ದರೆ ಟ್ರೈ ಮಾಡಿ ನೋಡಬಹುದು.