ಚಿಕ್ಕದೊಂದು ಕಲಹ, ಪ್ರೀತಿಯ ಅಳಿವಿಗೆ ಮೂಲ!

ನಿಮ್ಮ ಸಂಗಾತಿಯ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸದೇ ಇರುವುದು

ಪ್ರತಿ ವ್ಯಕ್ತಿಯೂ ತನ್ನ ಪ್ರಿಯಕರ ಅಥವಾ ಪ್ರಿಯತಮೆ ತನ್ನ ಬಗ್ಗೆ ಕೊಂಚವಾದರೂ ಮೆಚ್ಚುಗೆಯನ್ನು ವ್ಯಕ್ತಪಡಿಸಬೇಕೆಂದು ಅಪೇಕ್ಷಿಸುತ್ತಾರೆ. ಪರಸ್ಪರ ಮೆಚ್ಚುಗೆ ಮತ್ತು 'ನಿನ್ನಿಂದಾಗಿ ಇದು ಸಾಧ್ಯವಾಯಿತು','ಈ ಕೆಲಸಕ್ಕೆ ನೀನೇ ಪ್ರೇರಣೆ' ಎಂಬ ಧನಾತ್ಮಕ ಮಾತುಗಳನ್ನು ಆಡುವ ಮೂಲಕ ಸಂಗಾತಿ ಅಪಾರವಾದ ಧನ್ಯತಾಭಾವವನ್ನು ಪಡೆಯುತ್ತಾರೆ. ಉದಾಹರಣೆಗೆ ಇಂದಿನ ಅಡುಗೆ ಬಹಳ ರುಚಿಯಾಗಿದೆ ಎಂದಾಗ ಅಡುಗೆ ಮಾಡಿದವಳ ಮನ ಪ್ರಫುಲ್ಲವಾಗುತ್ತದೆ. ಮುಂದಿನ ಸ್ಲೈಡ್ ಕ್ಲಿಕ್ ಮಾಡಿ

ನಿಮ್ಮ ಸಂಗಾತಿಯ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸದೇ ಇರುವುದು

ಒಂದು ವೇಳೆ ನಿಮಗೆ ಅರಿವಿಲ್ಲದೇ ಮೆಚ್ಚುಗೆ ವ್ಯಕ್ತಪಡಿಸದೇ ಇದ್ದರೆ ಸಂಗಾತಿಯ ನಿರೀಕ್ಷೆಗಳೆಲ್ಲಾ ಹುಸಿಯಾಗುತ್ತವೆ ಹಾಗೂ ಪರಿಣಾಮವಾಗಿ ನಿಮ್ಮ ಬಗ್ಗೆ ಇದ್ದ ಪ್ರೀತಿಯ ಭಾವನೆಯೂ ಕುಸಿಯುತ್ತದೆ. ಈ ಮನ ನಿಮ್ಮ ಇತರ ಉತ್ತಮ ಕೆಲಸಗಳನ್ನೂ ಗುರುತಿಸುವಲ್ಲಿ ಸೋಲುತ್ತದೆ. ಪ್ರೀತಿಯ ವೈಫಲ್ಯಕ್ಕೆ ಇದು ಒಂದು ಪ್ರಮುಖ ಕಾರಣವಾಗಿದೆ. ಒಂದು ವೇಳೆ ಸಂಗಾತಿಯ ಕೆಲಸ ನಿಮ್ಮ ನಿರೀಕ್ಷೆಗೆ ತಕ್ಕಂತೆ ಇರದಿದ್ದರೆ ಇದನ್ನು ತಿರಸ್ಕಾರದ ಮಾತುಗಳಲ್ಲಿ ಎಂದೂ ಹೇಳಬಾರದು, ಬದಲಿಗೆ ಮೆಚ್ಚುಗೆಯ ಮಾತುಗಳನ್ನೇ ಆಡಿ, ಇನ್ನೂ ಉತ್ತಮವಾಗುವ ಸಾಧ್ಯತೆ ಇದೆ ಎಂದು ಸೂಚ್ಯವಾಗಿ ತಿಳಿಸುವ ಪರಿಯನ್ನು ಎಲ್ಲರೂ ಹೃನ್ಮನಸ್ಸಿನಿಂದ ಒಪ್ಪಿಕೊಳ್ಳುತ್ತಾರೆ.

ನಿಮ್ಮ ತಾಳ್ಮೆಯನ್ನು ಮಿತಿಮೀರಿ ಪರೀಕ್ಷಿಸಿದಾಗ

ಪ್ರತಿಯೊಬ್ಬರಿಗೂ ತಮ್ಮದೇ ಆದ ಮಿತಿಯಲ್ಲಿ ತಾಳ್ಮೆ ಇರುತ್ತದೆ. ಪ್ರತಿಯೊಬ್ಬರ ತಾಳ್ಮೆಯಲ್ಲಿ ಏರುಪೇರು ಇರುತ್ತದೆ. ಕೆಲವರು ಕೊಂಚಕಾಲಕ್ಕೇ ತಮ್ಮ ತಾಳ್ಮೆ ಕಳೆದುಕೊಂಡರೆ ಕೆಲವರಿಗೆ ಅಪಾರವಾದ ತಾಳ್ಮೆ ಇರುತ್ತದೆ. ಒಂದು ವೇಳೆ ಸಂಗಾತಿಗಳಲ್ಲಿ ಈ ಮಟ್ಟಗಳಲ್ಲಿ ಏರುಪೇರು ಆಗಿದ್ದರೆ ಇದನ್ನು ಸಂಭಾಳಿಸಿಕೊಂಡು ಹೋಗುವುದೇ ಜಾಣತನವಾಗಿದೆ. ಆದರೆ ಎಂದಿಗೂ ನಿಮ್ಮ ಸಂಗಾತಿಯ ತಾಳ್ಮೆಯನ್ನು ಪರೀಕ್ಷಿಸಕೂಡದು. ಅದರಲ್ಲೂ ತಾಳ್ಮೆಯ ಮಿತಿಮೀರಿ ಖಂಡಿತಾ ಪರೀಕ್ಷಿಸಕೂಡದು. ಬದಲಿಗೆ ನಿಮ್ಮ ಸಂಗಾತಿಗೆ ಇನ್ನಷ್ಟು ಪ್ರೇರಣೆ ನೀಡಿ ಮಾನಸಿಕ ಸ್ಥೈರ್ಯ ತುಂಬಬೇಕು.

ವಿನಾಕಾರಣ ಆರೋಪ ಹೊರಿಸಿದಾಗ

ಈ ಜಗತ್ತಿನಲ್ಲಿ ನಿತ್ಯವೂ ಚಿಕ್ಕಪುಟ್ಟ ತಪ್ಪುಗಳು ಆಗುತ್ತಲೇ ಇರುತ್ತವೆ. ನಮ್ಮ ಸಮಾಜದಲ್ಲಿ ಇದಕ್ಕೆ ಆಗುವ ಕಾರಣಕ್ಕೆ ಯಾರದ್ದಾದರೂ ಮೇಲೆ ಆರೋಪ ಹೊರಿಸುವ ಕೆಟ್ಟ ಚಾಳಿ ಇದೆ. ಆದರೆ ಈ ಚಾಳಿ ಪ್ರೀತಿಯಲ್ಲಿ ಸಲ್ಲದು. ಒಂದು ವೇಳೆ ನಿಮ್ಮ ಸಂಗಾತಿಯನ್ನು ನೀವು ಅಪಾರವಾಗಿ ಪ್ರೀತಿಸುವುದೇ ಆಗಿದ್ದಲ್ಲಿ ಅವರ ತಪ್ಪುಗಳನ್ನು ನಿಮ್ಮ ತಪ್ಪುಗಳು ಎಂದು ಒಪ್ಪಿಕೊಂಡು ಇದಕ್ಕೆ ಪರಿಹಾರ ಹುಡುಕುವುದೇ ಸರಿಯಾದ ಕ್ರಮವಾಗಿದೆ. ಬದಲಿಗೆ ತಪ್ಪಿಗಾದ ಕಾರಣವನ್ನು ಸಂಗಾತಿಯ ಮೇಲೆ ಹೊರಿಸುವ ಮೂಲಕ ಪ್ರೀತಿ ನಲುಗುತ್ತದೆ.

ಮೌನಾಚರಣೆಯ ಮೂಲಕ

ಜಗಳವಾಡದ ದಂಪತಿಗಳೇ ಈ ಜಗತ್ತಿನಲ್ಲಿಲ್ಲ. ಅಲ್ಲದೇ ಸುಖದಾಂಪತ್ಯಕ್ಕೆ ಚಿಕ್ಕ ಪುಟ್ಟ ಜಗಳಗಳು ಅನಿವಾರ್ಯ ಕೂಡಾ. ಆದರೆ ಈ ಜಗಳಗಳೆಲ್ಲಾ ಕೋಳಿ ಜಗಳದಂತೆ ಒಂದು ನಿಮಿಷಕ್ಕೆ ಮಾಡಿ ಮುಗಿಸುವಂತಹದ್ದಾಗಬೇಕೇ ವಿನಃ ರಾತ್ರಿಯೂಟದ ಬಳಿಕವೂ ಮುಂದುವರೆಯಬಾರದು. ಸಾಮಾನ್ಯವಾಗಿ ಜಗಳದ ಬಳಿಕ ಮೌನದಿಂದ ಒಬ್ಬರಿಗೊಬ್ಬರು ತೀಕ್ಷ್ಣವಾಗಿ ಇರಿಯುವ ಪರಿ ಪ್ರೀತಿಯನ್ನು ಕಡಿಮೆಮಾಡಬಹುದು. ಆದ್ದರಿಂದ ತಪ್ಪು ಯಾರದ್ದೇ ಆಗಿರಲಿ, ಜಗಳ ಯಾರಿಂದಲೇ ಪ್ರಾರಂಭವಾಗಿರಲಿ, ಒಬ್ಬರಿಗೊಬ್ಬರು ಮಾತನಾಡದೇ ಇರುವುದು ಮಾತ್ರ ಪ್ರೀತಿಗೆ ಅಪಚಾರ ಮಾಡಿದಂತೆ.

ಭವಿಷ್ಯ ಮಸುಕಾದಾಗ

ಭವಿಷ್ಯದ ಬಗ್ಗೆ ಮಾನತಾಡುವುದು, ಸೂಕ್ತ ಕ್ರಮ ಕೈಗೊಳ್ಳುವುದು ಎಲ್ಲರಿಗೂ ಅಗತ್ಯವಾಗಿದೆ. ಪ್ರೀತಿಯಲ್ಲಿರುವವರಿಗೆ ಇದು ಇನ್ನೂ ಹೆಚ್ಚು ಅಗತ್ಯ. ಒಂದು ವೇಳೆ ನಿಮ್ಮ ಭವಿಷ್ಯ ಭದ್ರವಾಗಿಲ್ಲದಿದ್ದು ಯಾವುದೇ ಸ್ಪಷ್ಟ ಮಾಹಿತಿ ಅಥವಾ ಕ್ರಮ ಕೈಗೊಂಡಿರದೇ ಇದ್ದಲ್ಲಿ ನಿಮ್ಮ ಸಂಗಾತಿ ನಿಮ್ಮ ಬಗ್ಗೆ ಸಡಿಲತೆ ತೋರಬಹುದು. ಇದು ಪ್ರೀತಿ ಕಡಿಮೆಯಾಗಲು ಕಾರಣವಾಗಬಹುದು. ಆದ್ದರಿಂದ ಭವಿಷ್ಯದ ಬಗ್ಗೆ ಸ್ಪಷ್ಟವಾಗಿ ಮಾತನಾಡಿ ನಿರ್ಧಾರಗಳನ್ನು ಕೈಗೊಳ್ಳುವ ಮೂಲಕ ಪರಸ್ಪರ ಹತ್ತಿರಾಗಲು ಸಾಧ್ಯ.