ಕ್ಯಾರೆಟ್ ಹೆಸರು ಬೇಳೆಯ ಪಾಯಸ

ಈ ದಿನ ನವರಾತ್ರಿ ಸ್ಪೆಷಲ್ ಆಗಿ ಹೆಸರು ಬೇಳೆಯಿಂದ ಮಾಡುವ ಪಾಯಸವಾದರೂ, ನೆನ್ನೆ ನೀಡಿದ ಹೆಸರು ಬೇಳೆ ಪಾಯಸಕ್ಕಿಂತ ಭಿನ್ನ ರುಚಿಯ ಪಾಯಸದ ರೆಸಿಪಿ ನೀಡಿದ್ದೇವೆ. ಈ ಪಾಯಸಕ್ಕೆ ಕ್ಯಾರೆಟ್ ಹಾಕುವುದರಿಂದ ರುಚಿ ಭಿನ್ನವಾಗಿದ್ದು, ನಿಮಗೆ ಇಷ್ಟವಾಗುವುದು.

ಈ ಕ್ಯಾರೆಟ್ ಹೆಸರುಬೇಳೆಯ ಪಾಯಸ ಮಾಡ ಬಯಸುವುದಾದರೆ ರೆಸಿಪಿ ನೋಡಿ ಇಲ್ಲಿದೆ:

ಬೇಕಾಗುವ ಸಾಮಾಗ್ರಿಗಳು
* ಹೆಸರುಬೇಳೆ - 1 ಕಪ್
* ಕ್ಯಾರೆಟ್ - 2 (ಸಣ್ಣ ಗಾತ್ರದ್ದಾಗಿದ್ದರೆ 3-4)
* ಸಕ್ಕರೆ - 1 1/4 ಲೋಟ
* ತೆಂಗಿನಕಾಯಿ - 1/2 ಭಾಗ
* ಉಪ್ಪು - ರುಚಿಗೆ ತಕ್ಕ
* ಏಲಕ್ಕಿ ಪುಡಿ - 1 ಚಮಚ
* ದ್ರಾಕ್ಷಿ ಹಾಗೂ ಗೋಡಂಬಿ ಚೂರುಗಳು

ಮಾಡುವ ವಿಧಾನ:

* ಮೊದಲು ಕ್ಯಾರಟ್‌ ಹೆಚ್ಚಿಕೊಂಡು ಸ್ವಲ್ಪ ನೀರು ಹಾಕಿ ಅದು ಮೃದುವಾಗುವವರೆಗೆ ಬೇಯಿಸಿ.

* ಒಂದು ಲೋಟ ಹೆಸರುಬೇಳೆಗೆ ಮೂರು ಲೋಟ ನೀರು ಹಾಕಿ ಕುಕ್ಕರಿನಲ್ಲಿಟ್ಟು 2 ವಿಶಲ್ ಬರುವವರೆಗೆ ಬೇಯಿಸಬೇಕು.

* ನಂತರ ಬೇಯಿಸಿಟ್ಟ ಹೆಸರುಬೇಳೆ, ಕ್ಯಾರೆಟ್, ಉಪ್ಪು, ಸಕ್ಕರೆ, ಗೋಡಂಬಿ ಹಾಗೂ ದ್ರಾಕ್ಷಿ ಚೂರುಗಳನ್ನು ಹಾಕಿ ಬೇಕಿದ್ದರೆ ಸ್ವಲ್ಪ ನೀರನ್ನೂ ಸೇರಿಸಿ ಚೆನ್ನಾಗಿ ಕುದಿಸಬೇಕು.

* ಈಗ ತಾಜಾ ತೆಂಗಿನ ಹಾಲನ್ನು ಹಾಕಿ ಮತ್ತೊಮ್ಮೆ ಕುದಿಸಬೇಕು.

* ಕೊನೆಯಲ್ಲಿ ಏಲಕ್ಕಿ ಪುಡಿಯನ್ನು ಹಾಕಿ ಒಮ್ಮೆ ಮಿಕ್ಸ್ ಮಾಡಿದರೆ ಕ್ಯಾರೆಟ್ ಹೆಸರು ಬೇಳೆಯ ಪಾಯಸ ರೆಡಿ.