ಫಟಾಫಟ್ ಮಿಲ್ಕಿ ಬಾರ್ ಚಾಕಲೇಟ್

Sweets

oi-Staff

By * ವಾಣಿ, ಬೆಂಗಳೂರು

Published: Wednesday, March 11, 2009, 16:08 [IST]

ಅಂಗಡಿಗೆ ಹೋದಾಗಲೆಲ್ಲ ನಮ್ಮ ಮಕ್ಕಳು ಅದು ಬೇಕು ಇದು ಬೇಕು ಅಂತ ಪೀಡಿಸುವುದು ಜಾಗತಿಕ ವಿದ್ಯಮಾನ. ಬಿಸ್ಕತ್ತು, ಚಾಕಲೇಟು ಪ್ರತಿಸತಿ ಕೊಡಿಸೋಕಾಗುತ್ತಾ? ಬೇಡ ಅಂದ್ರೆ ಅಲ್ಲೇ ರಂಪಾಟ ಮಾಡಿ, ನಮ್ದೂ ಕಣ್ಣು ಕೆಂಪಗಾಗುವಂತೆ ಕುಣಿದಾಡಿ, ಕೊಡಿಸುವವರೆಗೂ ಬಿಡುವುದಿಲ್ಲ. ಅದರ ಬದಲು ಮಿಲ್ಕಿ ಬಾರ್ ಚಾಕಲೇಟನ್ನು ಮನೇಲೆ ಮಾಡಿದರೆ ಹೇಗೆ? ಮಿಲ್ಕಿ ಬಾರಿಗೆ ಬೇಕಾಗುವ ಸಾಮಾನುಗಳು ಕಡಿಮೆ ಮತ್ತು ತಯಾರಿಕಾ ಕ್ರಮ ಅತಿ ಸರಳ.

ಬೇಕಾಗುವ ಸಾಮಗ್ರಿಗಳು

ಹಾಲಿನ ಪುಡಿ ಮೂರು ಕಪ್
ಸಕ್ಕರೆ ಒಂದೂವರೆ ಕಪ್
ಬೆಣ್ಣೆ ಒಂದು ಕಪ್

ಈ ಮೂರು ಸಾಮಗ್ರಿಗಳಿಂದ ಮಿಲ್ಕಿ ಬಾರ್ ತಯಾರಾಗುವುದೇ ಅಂತ ನಿಮಗೆ ಆಶ್ಚರ್ಯವಾಗಿರಬಹುದು. ಹೌದು, ಮೂರೇ ಮೂರು. ಹದಿನೈದು ನಿಮಿಷದಲ್ಲಿ ಮಿಲ್ಕಿ ಬಾರು ತಯಾರು. ನೀವು ಹೋಗುವಿರು ಮಾರು.

ಮಾಡುವ ವಿಧಾನ

ಮೊದಲು ಚಪ್ಪಟೆಯಾಗಿರುವ ನಾನ್ ಸ್ಟಿಕ್ ತವಾದಲ್ಲಿ ಸಕ್ಕರೆ ಹಾಕಿ, ಸಕ್ಕರೆ ಮುಚ್ಚುವವರೆಗೆ ನೀರು ಹಾಕಬೇಕು. ಅದನ್ನು ಕಾಯಿಸಿ ಸಕ್ಕರೆ ಕರಗಿ ತೆಳ್ಳನೆ ಪಾಕ ಆಗುವವರೆಗೆ ಸ್ಟೌ ಮೇಲೆ ಇಡಬೇಕು. ಪಾಕ ಆಗುತ್ತಿದ್ದಂತೆ ಒಲೆ ಆರಿಸಿ ತವಾವನ್ನು ಕೆಳಗೆ ಇಳಿಸಬೇಕು. ಸಕ್ಕರೆ ಪಾಕ ಬಿಸಿ ಇರುವಾಗಲೇ ಅದಕ್ಕೆ ಹಾಲಿನ ಪುಡಿ ಮತ್ತು ಬೆಣ್ಣೆ ಹಾಕಿ ಚೆನ್ನಾಗಿ ಕೂಡಿಕೊಳ್ಳುವಂತೆ ಕೈಯಾಡಿಸಬೇಕು. ಅದನ್ನು ಎಷ್ಟು ದಪ್ಪ ಬೇಕೋ ಅಷ್ಟು ದಪ್ಪ ಅಗಲವಾಗಿ ಹರಡಿ ಬೇಕಾದ ಆಕಾರದಲ್ಲಿ ಕತ್ತರಿಸಿಕೊಳ್ಳಬೇಕು. ಮಿಲ್ಕಿ ಬಾರ್ ತಯಾರ್!