ವಿಶ್ವ ಪಾಸ್ತಾ ದಿನಕ್ಕೆ ಸ್ಪೆಷೆಲ್-ಟೊಮೆಟೊ ಪಾಸ್ತಾ

ಇಟಲಿಯ ಅಡುಗೆ ಜಗತ್ತಿನಲ್ಲಿಯೇ ಪ್ರಸಿದ್ಧಿಯನ್ನು ಪಡೆದಿದೆ. ಇಟಲಿಯ ಪಿಜ್ಜಾ, ಪಾಸ್ತಾದಂತಹ ಅಡುಗೆಗಳು ಭಾರತದಲ್ಲಿ ಕೂಡ ಜನಪ್ರಿಯತೆಯನ್ನು ಗಳಿಸಿವೆ. ಅದರಲ್ಲಿ ಪಾಸ್ತಾ ಆರೋಗ್ಯಕ್ಕೆ ಒಳ್ಳೆಯದು ಹಾಗೂ ತಿನ್ನಲು ತುಂಬಾ ರುಚಿಕರವಾಗಿರುತ್ತದೆ.

ಇಂದು(ಅ. 25) ವಿಶ್ವ ಪಾಸ್ತಾ ದಿನ. ಈ ದಿನದ ವಿಶೇಷವಾಗಿ ಪಾಸ್ತಾ ಪ್ರಿಯರಿಗೆ ರುಚಿಕರವಾದ ಟೊಮೆಟೊ ಪಾಸ್ತಾದ ರೆಸಿಪಿ ನೀಡಲಾಗಿದೆ ನೋಡಿ:

ಬೇಕಾಗುವ ಸಾಮಾಗ್ರಿಗಳು:
* ಪಾಸ್ತಾ 1 ಪ್ಯಾಕೆಟ್
* ಬೆಳ್ಳುಳ್ಳಿ 7-8 ಎಸಳು
* ಈರುಳ್ಳಿ 1
* ದುಂಡು ಮೆಣಸಿನ ಕಾಯಿ 1
* ಟೊಮೆಟೊ 2
* ಹಸಿಮೆಣಸಿನ ಕಾಯಿ 2-3 (ಖಾರಕ್ಕೆ ತಕ್ಕಷ್ಟು)
* ಟೊಮೆಟೊ ಪೇಸ್ಟ್ ಅರ್ಧ ಕಪ್
* ಪುದೀನಾ ಪೇಸ್ಟ್ 1 ಚಮಚ
* ಕೆಂಪು ಮೆಣಸಿನ ಪುಡಿ ಅರ್ಧ ಚಮಚ
* ಕರಿಮೆಣಸಿನ ಪುಡಿ 1 ಚಮಚ
* ಸಕ್ಕರೆ 1 ಚಮಚ
* ನೀರು
* ಉಪ್ಪು
* ಎಣ್ಣೆ

ತಯಾರಿಸುವ ವಿಧಾನ:

* ಪಾಸ್ತಾವನ್ನು ತೊಳೆದು ಅದಕ್ಕೆ ನೀರು ಹಾಗೂ ಸ್ವಲ್ಪ ಉಪ್ಪು ಹಾಕಿ ಬೇಯಿಸಿ. ಬೇಯಿಸುವಾಗ 2 ಹನಿ ಎಣ್ಣೆ ಹಾಕಿ ಆಗ ಪಾಸ್ತಾ ಒಂದಕ್ಕೊಂದು ಅಂಟಿಕೊಳ್ಳುವುದಿಲ್ಲ. ಬೆಂದ ಪಾಸ್ತಾದ ನೀರು ಬಸಿದು ಒಂದು ಪಾತ್ರೆಯಲ್ಲಿ ಹಾಕಿಡಿ.

* ಈಗ ಬಾಣಲೆಯಲ್ಲಿ ಸ್ವಲ್ಪ ಎಣ್ಣೆ ಹಾಕಿ ಕಾಯಿಸಬೇಕು. ಎಣ್ಣೆ ಕಾದ ನಂತರ ಅದಕ್ಕೆ ಈರುಳ್ಳಿ ಹಾಗೂ ಬೆಳ್ಳುಳ್ಳಿ ಹಾಕಿ ಈರುಳ್ಳಿ ಕಂದು ಬಣ್ಣವವರೆಗೆ ಹುರಿಯಿರಿ. ನಂತರ ದುಂಡು ಮೆಣಸಿನಕಾಯಿ ಹಾಕಿ ಅದು ಬೇಯುವವರೆಗೆ ಹುರಿಯಿರಿ.

* ಈಗ ಹಸಿಮೆಣಸಿನಕಾಯಿ, ರುಚಿಗೆ ತಕ್ಕ ಉಪ್ಪು, ಸಕ್ಕರೆ, ಕರಿಮೆಣಸಿನ ಪುಡಿ ಹಾಗೂ ಟೊಮೆಟೊ ಹಾಕಿ ಟೊಮೆಟೊ ಮೆತ್ತಗಾಗುವವರೆಗೆ ಹುರಿಯಬೇಕು. ನಂತರ ಟೊಮೆಟೊ ಪೇಸ್ಟ್ ಹಾಕಿ 2 ನಿಮಿಷ ಕುದಿಸಿ ನಂತರ ಅದಕ್ಕೆ ಸಕ್ಕರೆ ಹಾಗೂ ಪುದೀನಾ ಪೇಸ್ಟ್ ಒಂದು ಚಮಚ, ಸ್ವಲ್ಪ ನೀರು ಹಾಕಿ ಚೆನ್ನಾಗಿ ಕುದಿಸಬೇಕು.

* ಈ ಮಿಶ್ರಣ ಗಟ್ಟಿಯಾದ ಗ್ರೇವಿ ರೀತಿಯಾದ ಮೇಲೆ ಅದಕ್ಕೆ ಬೇಯಿಸಿದ ಪಾಸ್ತಾವನ್ನು ಹಾಕಿ 2 ನಿಮಿಷ ಸೌಟ್ ನಿಂದ ತಿರುಗಿಸುತ್ತಾ ಬಿಸಿ ಮಾಡಿ ಉರಿಯಿಂದ ಇಳಿಸಿದರೆ ರುಚಿಕರವಾದ ಟೊಮೆಟೊ ಪಾಸ್ತಾ ರೆಡಿ.