ಬಾಯಲ್ಲಿ ಇಟ್ಟರೆ ಕರಗುವಂತೆ ಇರಬೇಕು-ಮಂಡಕ್ಕಿ

Snacks

oi-Reena

By Hema S

Updated: Thursday, September 20, 2012, 17:00 [IST]

ದಿ ಬೆಸ್ಟ್ ಮಂಡಕ್ಕಿ ಅಂದರೆ ಬಾಯಿಗೆ ಹಾಕಿದರೆ ಕರಗಿ ಹೋಗುವ ರೀತಿ ಇರಬೇಕು. ಅದು ತುಂಬಾ ಒಣ ಇದ್ದರೆ ತಿನ್ನಲು ಇಷ್ಟವಾಗುವುದಿಲ್ಲ. ಮಂಡಕ್ಕಿ ಮಾಡುವುದು ಸುಲಭವಾದರೂ ಎಲ್ಲರಿಗೆ ಮಂಡಕ್ಕಿ ಮಾಡುವ ಕಲೆ ಗೊತ್ತಿರುವುದಿಲ್ಲ. ಮಂಡಕ್ಕಿಯನ್ನು ರುಚಿಕರವಾಗಿ, ಬಾಯಿಗೆ ಹಾಕಿದ ತಕ್ಷಣ ಕರಗುವಂತೆ ಇರಬೇಕೆಂದರೆ ಈ ಕೆಳಗಿನ ವಿಧಾನವನ್ನು ಪಾಲಿಸಬಹುದು.

ಬೇಕಾಗುವ ಸಾಮಗ್ರಿಗಳು:

* ಕಡಲೆ ಪುರಿ - 1 ದೊಡ್ಡ ಬಟ್ಟಲು
* ಶೇಂಗಾ (ಹುರಿಗಡಲೆ) - 1/ 2 ಕಪ್
* ಸಾಸಿವೆ - 1 / 2 ಚಮಚ
* ಪುಡಿ ಉಪ್ಪು - ರುಚಿಗೆ ತಕ್ಕಷ್ಟು
* ಆಮ್ ಚೂರ್ ಪುಡಿ - ಒಂದು ದೊಡ್ಡ ಚಿಟಿಕೆ
* ಸಕ್ಕರೆ ಪುಡಿ - 1 / 2 ಚಮಚ
* ಜಜ್ಜಿದ ಬೆಳ್ಳುಳ್ಳಿ - 1 ಚಮಚ ಅಥವಾ ಇಂಗು
* ಹಸಿಮೆಣಸಿನ ಕಾಯಿ 2 (ಚಿಕ್ಕದಾಗಿ ಕತ್ತರಿಸಿರಬೇಕು)
* ಅರಿಶಿಣ - 1 / 4 ಚಮಚ
* ಮೆಣಸಿನಪುಡಿ - 1 / 2 ಚಮಚ (ಖಾರಕ್ಕೆ ತಕ್ಕಂತೆ)
* ಎಣ್ಣೆ - 4 ರಿಂದ 5 ಚಮಚ
* ಸ್ವಲ್ಪ ಕರಿಬೇವು

ಮಾಡುವ ವಿಧಾನ:

1. ಮೊದಲು ಮಂಡಕ್ಕಿಯನ್ನು ಕಾದ ಬಾಣಲೆಯಲ್ಲಿ ಹಾಕಿ 5 ನಿಮಿಷ ಸಣ್ಣ ಬೆಂಕಿಯಲ್ಲಿ ಹುರಿದು ಗರಿಗರಿಯಾಗಿ ಮಾಡಿ ತೆಗೆದಿಟ್ಟುಕೊಳ್ಳಬೇಕು.

2. ನಂತರ ಅದೇ ಬಾಣಲೆಯಲ್ಲಿ ಎಣ್ಣೆ ಕಾಯಿಸಿ, ಶೇಂಗಾ, ಸಾಸಿವೆ, ಹಸಿಮೆಣಸಿನ ಕಾಯಿ ಹಾಕಿ ಎಲ್ಲವನ್ನೂ ಚೆನ್ನಾಗಿ ಹುರಿಯಬೇಕು. ನಂತರ ಇದಕ್ಕೆ ಮೆಣಸಿನಪುಡಿ, ಅರಿಶಿಣ, ಕರಿಬೇವು ಹಾಕಿ, ಜಜ್ಜಿಕೊಂಡ ಬೆಳ್ಳುಳ್ಳಿಯನ್ನು ಸೇರಿಸಿ. ಬೆಳ್ಳುಳ್ಳಿ ಚೆನ್ನಾಗಿ ಹುರಿದ ನಂತರ ಉರಿಯಿಂದ ತೆಗೆಯಬೇಕು.

3. ಈ ಮಿಶ್ರಣಕ್ಕೆ ಉಪ್ಪು, ಸಕ್ಕರೆ, ಆಮ್ ಚೂರ್ ಪುಡಿ ಸೇರಿಸಿ ಕಲೆಸಿಕೊಂಡು, ನಂತರ ಹುರಿದಿಟ್ಟ ಮಂಡಕ್ಕಿ ಸೇರಿಸಿ ಚೆನ್ನಾಗಿ ಕೈಯಿಂದ ಕಲೆಸಬೇಕು.

4. ಕಲೆಸಿದ ನಂತರ ಉಪ್ಪು ಅಥವಾ ಸಕ್ಕರೆ ಬೇಕಿದ್ದರೆ ಸೇರಿಸಿ. ಈಗ ತಯಾರಾದ ಮಂಡಕ್ಕಿಯ ರುಚಿ ಸವಿಯಿರಿ.

ಸಲಹೆ: ಇದಕ್ಕೆ ತಿನ್ನುವಾಗ ಟೊಮೆಟೊ ಕತ್ತರಿಸಿ ಹಾಕಿ, ಸ್ವಲ್ಪ ಕೊತ್ತಂಬರಿ ಸೊಪ್ಪು ಮಿಶ್ರ ಮಾಡಿ ತಿನ್ನಬಹುದು.