ಗರಿಗರಿಯಾದ ಸೋಯಾಬೀನ್ ಪಕೋಡ

ಪಕೋಡವನ್ನು ಅನೇಕ ಬಗೆಯಲ್ಲಿ ತಯಾರಿಸಬಹುದು. ಇವತ್ತು ನಾವು ಸೋಯಾಬೀನ್ ನಿಂದ ಪಕೋಡ ತಯಾರಿಸುವ ವಿಧಾನ ತಿಳಿಯೋಣ. ಸೋಯಾಬೀನ್ ನಲ್ಲಿ ಅಧಿಕ ಪ್ರೊಟೀನ್ ಇರುವುದರಿಂದ ಈ ಪಕೋಡ ಆರೋಗ್ಯಕ್ಕೆ ಒಳ್ಳೆಯದು ಹಾಗೂ ಸವಿಯಲೂ ರುಚಿಕರವಾಗಿರುತ್ತದೆ.

ಸೋಯಾಬೀನ್ ಪಕೋಡದ ರೆಸಿಪಿ ನೋಡಿ ಇಲ್ಲಿದೆ.

ಬೇಕಾಗುವ ಸಾಮಾಗ್ರಿಗಳು:
ಸೋಯಾಬಿನ್ 1 ಕಪ್ 100 ಗ್ರಾಂ
ಈರುಳ್ಳಿ 2 (ಕತ್ತರಿಸಿದ್ದು)
ಆಲೂಗೆಡ್ಡೆ 3 (ಬೇಯಿಸಿದ್ದು)
ಕಡಲೆಹಿಟ್ಟು 2 ಕಪ್
ಕೆಂಪು ಮೆಣಸಿನ ಪುಡಿ 1 ಚಮಚ
ಚಿಟಿಕೆಯಷ್ಟು ಅಜ್ವೈನ್
ಕೊತ್ತಂಬರಿ ಬೀಜ 1 ಚಮಚ
ಚಿಟಿಕೆಯಷ್ಟು ಅಡುಗೆ ಸೋಡಾ
ರುಚಿಗೆ ತಕ್ಕ ಉಪ್ಪು
ನೀರು
ಎಣ್ಣೆ

ತಯಾರಿಸುವ ವಿಧಾನ:

1. ಸೋಯಾಬೀನ್ಸ್ ಅನ್ನು ಅರ್ಧ ಗಂಟೆ ನೀರಿನಲ್ಲಿ ನೆನೆ ಹಾಕಿದರೆ ಅದು ಮೆತ್ತಗಾಗುತ್ತದೆ.

2. ನಂತರ ಅದನ್ನು ತೊಳೆದು ಒಂದು ಪಾತ್ರೆಯಲ್ಲಿ ಹಾಕಿ ಅದಕ್ಕೆ ಅಜ್ವೈನ್, ಕೆಂಪು ಮೆಣಸಿನ ಪುಡಿ, ರುಚಿಗೆ ತಕ್ಕ ಉಪ್ಪು, ಅಡುಗೆ ಸೋಡಾ, ಕೊತ್ತಂಬರಿ ಬೀಜ ಹಾಕಿ ಚೆನ್ನಾಗಿ ಮಿಶ್ರಣ ಮಾಡಬೇಕು. ನಂತರ ಅದಕ್ಕೆ ಕತ್ತರಿಸಿದ ಈರುಳ್ಳಿ, ಚೆನ್ನಾಗಿ ಹಿಸುಕಿದ ಆಲೂಗೆಡ್ಡೆ ಮತ್ತು ರುಚಿಗೆ ತಕ್ಕ ಉಪ್ಪು ಹಾಕಿ ಮಿಶ್ರಣ ಮಾಡಿ ಅದರಿಂದ ಉಂಡೆಕಟ್ಟಬೇಕು.

3. ಮತ್ತೊಂದು ಪಾತ್ರೆಯಲ್ಲಿ ಕಡಲೆ ಹಿಟ್ಟಿಗೆ ಚಿಟಿಕೆಯಷ್ಟು ಉಪ್ಪು ಮತ್ತು ನೀರು ಹಾಕಿ ಕಲೆಸಬೇಕು (ಮಿಶ್ರಣ ಗಟ್ಟಿಯಾಗಿರಬೇಕು).

4. ಈಗ ಬಾಣಲೆಗೆ ಅರ್ಧದಷ್ಟು ಎಣ್ಣೆ ಹಾಕಿ ಕಾಯಿಸಬೇಕು, ಕಾದ ಎಣ್ಣೆ ಸೋಯಾ ಮಿಶ್ರಣದ ಉಂಡೆಯನ್ನು ಕಡಲೆಹಿಟ್ಟಿನಲ್ಲಿ ಅದ್ದಿ ಎಣ್ಣೆಯಲ್ಲಿ ಹಾಕಿ ಕಂದು ಬಣ್ಣ ಬರುವವರೆಗೆ ಹುರಿದರೆ ರುಚಿಕರವಾದ ಸೋಯಾಬೀನ್ ಪಕೋಡ ರೆಡಿ.